2 Akorinto 2:1-17

  • Paulo wakhumba kuza ndi likondwa (1-4)

  • Munthu wagowokereka ndi kuwezeke mu mpingu (5-11)

  • Paulo ku Trowa ndi ku Makedoniya (12, 13)

  • Uteŵeti kweniso kwenda mwakuguba (14-17)

    • Tichita malonda cha ndi mazu ngaku Chiuta (17)

2  Ndasimikiza kuti ndileki kuza so kwaku yimwi ndi chitima.  Pakuti asani ndingakuchitiskani chitima, ndiyani wazakundikondwesa, kupatuwaku wo ndaŵachitiska chitima?  Ndingulemba vo ndinguchita kuti asani ndaza ndileki kuzichita chitima chifukwa cha ŵanthu wo ndikhumbika kuŵakondwesa, pakuti ndigomezga kuti vo vitindichitiska kuti ndikondwengi, vichitiska so mosi kuti mukondwengi.  Pakuti ndingukulembiyani kalata nde mu masuzgu ngakulu, ndichipwetekeka mtima ndipuso ndi masozi nganandi, kuti ndikuchitiskeni chitima cha, kweni kuti muziŵi kuti nditikuyanjani ukongwa.  Sonu asani munthu munyaki wachita vinthu vakuchitiska chitima, wachitiska chitima ini cha, kweni pamalu panyaki wachitiska chitima yimwi mosi. Kweni ndakhumba cha kulongoro mwanthazi.  Kuchenya kwenuku ko kwachitika ndi ŵanthu anandi, nkhwakukwana ku munthu waviyo.  Kweni mumalu mwaki, mumugowoke ndi mtima wosi kweniso mumupembuzgi, kuti chitima chikulu chileki kumumeza.  Mwaviyo, nditikupemphani kuti mumusimikiziyi kuti mutimuyanja.  Pakuti ndichu chifukwa chaki so ndakulembiyani: kuti ndiziŵi asani mungalongo ukaboni wakuti muvwiya mu vinthu vosi. 10  Asani mugowoke munthu weyosi pa chechosi, nani so ndichita viyo. Kukamba uneneska, chechosi cho ndagowoka (asani ndagowokapu chinthu chechosi) ndachitiya chifukwa chaku yimwi pa masu paku Khristu, 11  kuti Satana waleki kutichenjere, pakuti mauryarya ngaki titingaziŵa umampha. 12  Sonu ndati ndafika ku Trowa kuchipharazga uthenga wamampha wakukwaskana ndi Khristu ndipuso khomu lati landijulikiya mwa Ambuya, 13  ndinguvwa umampha cha mumtima chifukwa mubali wangu Tito ndingumusaniya cha. Mwaviyo, ndingulayirana nawu ndipu ndingusoka kuluta ku Makedoniya. 14  Kweni wawongeki Chiuta yo nyengu zosi watitilongozga kuti tigubiyengi limoza ndi Khristu ndipuso kuporote mwaku isi fungu lakuti titimuziŵa Chiuta lisapaliya kwekosi! 15  Pakuti kwaku Chiuta te fungu lamampha, laku Khristu pakati paku wo ataskika, kweniso wo atufwa; 16  kwaku wo atufwa, fungu la nyifwa lakulongozge ku nyifwa, kwaku wo ataskika, fungu la umoyu lakulongozge ku umoyu. Ndipu ndiyani yo ngwakwenere kuchita vinthu venivi? 17  Isi ndisi te akwenere, pakuti tichita malonda cha ndi* mazu ngaku Chiuta nge mo ŵanthu anandi achitiya, kweni tilongoro mwakutuliya pasi pa mtima nge akutumika ndi Chiuta, pa masu paku Chiuta kweniso mwakukoliyana ndi Khristu.

Mazu Ngam'mphata

Pamwenga kuti, “pakuti tisaniriyapu phindu cha pa.”