Julani

Lutani pa vo ve mukati

2 Akorinto 12:1-21

NKHANI ZO ZE MUBUKU ILI

  • Viwona vaku Paulo (1-7a)

  • “Minga muliŵavu” laku Paulo (7b-10)

  • Ndi mumana cha kwa akutumika apachanya ukongwa (11-13)

  • Paulo wafipiya mtima Akorinto (14-21)

12  Nditenere kujiŵikamu. Kujiŵikamu kulivi phindu, kweni ndilutirizgengi kuwona vakuziziswa ndipuso vinthu vakuvumbulika ndi Ambuya.  Ndiziŵa munthu munyaki wakukoliyana ndi Khristu, mweniyo vyaka 14 kuvuli uku, wangukwamphulikiya kuchanya kwachitatu, kwali wenga muliŵavu pamwenga kubwalu kwa liŵavu, ndiziŵa cha, kweni Chiuta ndiyu waziŵa.  Nditimuziŵa munthu mwenuyu, kwali muliŵavu pamwenga muliŵavu cha, ndiziŵa cha; Chiuta ndiyu waziŵa,  mweniyo wangukwamphulikiya kuparadayisu ndi kuvwa mazu ngo ngangakambika cha, ndipuso ngambula kwenere kuti munthu wangakambi.  Ndijiŵikengemu vakukwaskana ndi munthu mwenuyu, kweni ndijiŵikengemu cha vakukwaskana ndi ndamweni kupatuwaku kulopwa kwangu.  Pakuti chinanga ndingakhumba kujiŵikamu, ndijengi muzeleza cha, chifukwa ndikambengi uneneska. Kweni ndichitengi cha venivi, kuti paŵevi munthu wakundilumba ukongwa kuluska vo wawona mwaku ini pamwenga vo watuvwa kwaku ini,  chifukwa cha vinthu vapade vo Chiuta wandivumbuliya. Kuti ndileki kujikuzga ukongwa, ndingupaskika minga muliŵavu, mungelu waku Satana, kuti walutirizgi kundiwomba makofi* ndi chilatu chakuti ndileki kuja wakujikuzga ukongwa.  Katatu kosi ndingupempha Ambuya pa nkhani yeniyi, kuti minga wenuwu utuwemu mwaku ini.  Kweni angundikambiya kuti: “Wezi wangu ukulu ngwakukwana kwaku yiwi, pakuti nthazi yangu yija yakufikapu mu kulopwa.” Mwaviyo ndikondwengi ukongwa ndi kulopwa kwangu, kuti nthazi yaku Khristu yijaliriyi paku ini nge chihema. 10  Mwaviyo chifukwa chaku Khristu ndikondwa asani ndilopwa, ndinyozeka, ndisoŵa vinthu vakukhumbika, nditombozgeka kweniso ndikumana ndi masuzgu. Pakuti asani ndalopwa, penipo ndipu ndija ndi nthazi. 11  Ndaŵa muzeleza. Yimwi ndimwi mwandichitiska venivi, pakuti mwakhumbikanga kundilumba. Ve viyo chifukwa chakuti mu kanthu kekosi ndingulongo kuti nde mumana cha kwa akutumika ŵinu wo mutiŵawona kuti mbapachanya ukongwa chinanga kuti nde munthu ŵaka. 12  Kukamba uneneska, ukaboni wakuti nde wakutumika unguwoneka pakati pinu mwakukunthiyapu kukulu. Unguwoneka mwa visimikizu, mwa vakuziziswa ndipuso mwa ntchitu zanthazi. 13  Kumbi yimwi munguyanjika wuli kamanavi kuluska mipingu yosi? Kumbi panyaki chingaŵa chifukwa chakuti ndinguja mphingu cha kwaku yimwi? Chondi mundigowoke chifukwa cha kunanga kwenuku. 14  Awonani! Yaka nkhachitatu kunozgeka kuti ndizi kwinu, ndipu ndazamukuŵa mphingu cha. Pakuti ndipenja katundu winu cha, kweni yimwi. Chifukwa ŵana ndiwu atenere kusungiya chuma apapi ŵawu cha, kweni apapi ndiwu atenere kusungiya ŵana. 15  Pakuti ini ndikondwengi ukongwa kugwiriskiya ntchitu vinthu vangu, ndipu ndijiperekengi ukongwa chifukwa chaku yimwi. Sonu asani ini nditikuyanjani ukongwa viyo, kumbi ini ndini nditenere kwanjika kamanavi? 16  Chinanga kuti vingaŵa viyo, ndinguŵa mphingu cha kwaku yimwi. Kweni mukamba kuti ndenga “muryarya” ndipuso ndakuwonjaningi “mwakuchenje.” 17  Ndingukugololiyani cha kuporote mwaku wo ndinguŵatuma, asi viyo? 18  Ndingupempha Tito ndipuso ndingutuma mubali limoza ndi iyu. Tito wangukugololiyani cha, asi viyo? Asi tingwenda mu mzimu umoza? Tingwenda mumaphazi ngamoza, asi viyo? 19  Kumbi nyengu yosi iyi mwaja muchiŵanaŵana kuti titijivikiliya kwaku yimwi? Tilongoro venivi pa masu paku Chiuta mwakukoliyana ndi Khristu. Kweni akwanjiwa, vosi venivi titivichita kuti tikuzengeni. 20  Pakuti nditopa kuti panyaki asani ndaza, ndingazileka kukusaniyani mo ndikhumbiya, ndipuso kuti ndingazileka kuchita vinthu nge mo mukhumbiya, kweni mumalu mwaki ndingazisaniya ndewu, sanji, ukali, mphindanu, kunenana kwambula mweneku kuziŵa, mitokutoku,* kujikuzga kweniso chimtimbaheka. 21  Panyaki asani ndaza so ko, Chiuta wangu wazakundilengesa ndipuso ndingaziliriya ŵanthu anandi wo kuvuli uku akuchita ubudi kweni akulapa cha unyakazi wawu, malusu ngaheni ngakugonana* kweniso jalidu liheni lambula soni,* venivo achitanga.

Mazu Ngam'mphata

Pamwenga kuti, “walutirizgi kundipuma.”
Pamwenga kuti, “kukamba vinthu viheni va ŵanthu anyaki.”
Mu Chigiriki, por·neiʹa. Wonani Mazu ngo Ngakonkhoskeka
Mu Chigiriki, a·selʹgei·a. Wonani Mazu ngo Ngakonkhoskeka.