1 Yohane 5:1-21

  • Kuja ndi chivwanu mwaku Yesu kuthereska charu (1-12)

    • Vo kwanja Chiuta kung’anamuwa (3)

  • Kugomezga nthazi ya pempheru (13-17)

  • Jivikiliyeni ku charu chiheni (18-21)

    • Charu chosi che mu nthazi ya muheni yo (19)

5  Weyosi yo wagomezga kuti Yesu ndi Khristu, wakutuliya kwaku Chiuta, ndipu munthu weyosi yo watanja Ada, watanja so Mwana yo wakutuliya kwaku yiwu.  Pa chifukwa chenichi, tiziŵa kuti titanja ŵana aku Chiuta asani titanja Chiuta ndipuso tivwiya marangu ngaki.  Pakuti kwanja Chiuta kung’anamuwa kusunga marangu ngaki; ndipu marangu ngaki ngazitu cha,  chifukwa weyosi yo watuliya kwaku Chiuta, wathereska charu.* Ndipu chivwanu chidu ndichu chatiwovya kuti tithereski charu.  Kumbi ndiyani yo wangathereska charu? Asi ndi yo we ndi chivwanu kuti Yesu ndi Mwana waku Chiuta?  Ndipu Yesu Khristu ndiyu wakuza kuporote mu maji ndi ndopa, kuporote mu maji pe cha, kweni mu maji ndi ndopa. Ndipu mzimu ujaliya ukaboni, chifukwa mzimu ndiwu uneneska.  Pakuti pe akaboni atatu:  mzimu, maji ndipuso ndopa; ndipu vosi vitatu vikoliyana.  Asani tizomereza ukaboni wa ŵanthu, ndikuti ukaboni waku Chiuta ngukulu ukongwa. Chifukwa wenuwu ndiwu ukaboni wo Chiuta wapereka, ukaboni wo Chiuta wapereka wakukwaskana ndi Mwana waki. 10  Munthu yo wavwana mu Mwana waku Chiuta, we ndi ukaboni mwaku iyu. Munthu yo wavwana cha mwaku Chiuta, watimuchitiska kuŵa waboza, chifukwa wavwana cha mu ukaboni wo Chiuta wapereka wakukwaskana ndi Mwana waki. 11  Ndipu ukaboni waki ngwakuti Chiuta wakupereka umoyu wamuyaya, ndipu wakutipaska umoyu wenuwu kuporote mu Mwana waki. 12  Munthu yo we ndi Mwana, we ndi umoyu wenuwu, ndipu munthu yo walivi Mwana waku Chiuta, walivi umoyu wenuwu. 13  Nditikulembiyani vinthu venivi yimwi muvwana mu zina la Mwana waku Chiuta, kuti muziŵi kuti mwe ndi umoyu wamuyaya. 14  Ndipu te ndi chigomezgu chenichi* mwaku iyu, kuti chechosi cho tingapempha mwakukoliyana ndi khumbu laki watitivwa. 15  Ndipu asani tiziŵa kuti watitivwa pa chechosi cho tipempha, tiziŵa kuti cho tapempha, watipaskengi pakuti tapempha kwaku iyu. 16  Asani munthu wawona mubali waki wachichita ubudi wo ungachitiska nyifwa cha, wamupemphere, ndipu Chiuta wamupaskengi umoyu munthu yo, kweni wapaskengi munthu yo wachita ubudi wo ungachitiska nyifwa cha. Pe ubudi wo uchitiska nyifwa. Ndikamba kuti wapempheriyengi munthu yo wachita ubudi wamtundu uwu cha. 17  Vinthu vambula urunji vosi mbubudi, kweni pe ubudi wo uchitiska nyifwa cha. 18  Tiziŵa kuti weyosi yo wakutuliya kwaku Chiuta, walivi chiziŵiliza chakuchita maubudi, kweni yo wakutuliya kwaku Chiuta,* watimuwona ndipu muheni yo wangamuko* cha. 19  Tiziŵa kuti tikutuliya kwaku Chiuta, kweni charu chosi che mu nthazi ya muheni yo. 20  Kweni tiziŵa kuti Mwana waku Chiuta wakuza, ndipu wakutipaska zeru* kuti tiziŵi yo ngwauneneska. Ndipu kuporote mu Mwana waki Yesu Khristu, isi te akukoliyana ndi yo ngwauneneska. Iyu ndi Chiuta chayiyu ndipuso umoyu wamuyaya. 21  Mwaŵana, jivikiliyeni ku angoza.

Mazu Ngam'mphata

Mazu ngaki chayingu, “chechosi cho chituliya kwaku Chiuta, chithereska charu.”
Pamwenga kuti, “te ndi wanangwa wakulongoro wenuwu.”
Kung’anamuwa Yesu Khristu Mwana waku Chiuta.
Pamwenga kuti, “wangamufyeka.”
Mazu ngaki chayingu, “kuwamu.”