1 Timote 4:1-16

  • Kutcheŵeska vakukwaskana ndi visambizu va viŵanda (1-5)

  • Mo munthu wangajaliya mteŵeti wamampha waku Khristu (6-10)

    • Masaza ndi kujipereka kwaku Chiuta (8)

  • Uphweriyengi ndi vo usambiza (11-16)

4  Kweni mazu ngakutuliya kwaku Chiuta ngakamba* mwakuvwika umampha kuti kunthazi ŵanthu anyaki azamuleka kuja ndi chivwanu, ndipu azamukwamba kuvwiya mauthenga ngakulandizga ngakuwoneka nge kuti ngatuliya kwaku Chiuta* ndipuso kuvwiya visambizu va viŵanda,  mwakugwiriskiya ntchitu chinyengu cha ŵanthu wo akamba maboza, ŵeniwo njuŵi zawu zikukulungundiya nge kuti aziwotcha ndi chisulu chamotu.  Yiwu akaniza kuto pamwenga kuyirwa, ndipu alamula ŵanthu kuti akanengi vakurya vo Chiuta wakuvilenga kuti ŵanthu wo ŵe ndi chivwanu kweniso wo atiwuziŵa umampha uneneska, aryengi mwakuwonga.  Pakuti chechosi cho chikulengeka ndi Chiuta ntchamampha, ndipu palivi cho chitenere kukanizika asani chilondereka mwakuwonga,  chifukwa chakuti chitoweseka ndi mazu ngaku Chiuta kweniso ndi pempheru.  Asani upereka ulongozgi wenuwu kwa abali, ujengi mteŵeti wamampha waku Khristu Yesu, wakulereka ndi mazu nga chivwanu ndipuso nga chisambizu chamampha cho utichilondo mwakuphwere.  Kweni ukanengi nkhani zaboza ndipuso zakunyoza nge zo anthukazi akukota akamba. Mumalu mwaki ujisambizengi wamweni ndipu uje ndi chilatu chakuti ulongo kuti we wakujipereka kwaku Chiuta.  Pakuti masaza ngatovya kamanavi, kweni kujipereka kwaku Chiuta kutovya pa vinthu vosi, chifukwa kwe ndi layizgu la umoyu wunu, kweniso umoyu wo utuza.  Mazu ngenanga ngakugomezgeka, ndipu ngakwenere kungalonde ndi mtima wosi. 10  Ndichu chifukwa chaki tigwira ntchitu mwaphamphu kweniso titijipereka ndi mtima wosi pakuti chilindizga chidu che mwaku Chiuta wamoyu, mweniyo ndi Mtaski wa ŵanthu amitundu yosi, ukongwa ŵanthu akugomezgeka. 11  Lutirizga kupereka marangu ngenanga kweniso kusambiza. 12  Munthu wangakudeleranga cha chifukwa cha msinkhu waku. Mumalu mwaki, uje chakuwoniyapu ku ŵanthu akugomezgeka mu vakukamba, mu vakuchita, mu chanju, mu chivwanu ndipuso mu nkharu yambula kufipiskika. 13  Mpaka po ndiziyengi, lutirizga kujipereka pa nkhani ya kuŵerenga pa gulu la ŵanthu, kuchiska ndipuso kusambiza. 14  Ungayiziŵanizanga cha mphasu yo wenayu, yo ukupaskika kuporote mu uchimi pa nyengu yo wupu wa ŵara unguŵika manja paku yiwi. 15  Ulungurukengi vinthu venivi; tangwanika ndi venivi, kuti ŵanthu wosi awoni kuti uluta panthazi. 16  Nyengu zosi uphweriyengi ndi vo uchita ndipuso vo usambiza. Ulutirizgi kuchita venivi, pakuti asani uchita viyo, ujitaskengi wamweni ndipuso utaskengi wo atuvwa vo usambiza.

Mazu Ngam'mphata

Mazu ngaki chayingu, “Kweni mzimu ukamba.”
Mazu ngaki chayingu, “kuvwiya mizimu yakulandizga.”