Julani

Lutani pa menyu yachiŵi

Lutani pa vo ve mukati

Akaboni aku Yehova

Chitonga (Malawi)

Bayibolu la pa Intaneti | BAYIBOLU LA CHARU CHIFYA LA MALEMBA NGA CHIGIRIKI NGACHIKHRISTU

1 Akorinto 15:1-58

NKHANI ZO ZE MUBUKU ILI

  • Kuyuskika kwaku Khristu (1-11)

  • Chiyuka chitovya kuja ndi chivwanu (12-19)

  • Kuyuskika kwaku Khristu kulongo kuti chiyuka chiliku nadi (20-34)

  • Liŵavu chayilu, liŵavu lauzimu (35-49)

  • Kuleka kufwa ndipuso kuleka kuvunda (50-57)

  • Kuja ndi vakuchita vinandi mu ntchitu ya Ambuya (58)

15  Sonu abali, nditikukumbusani vakukwaskana ndi uthenga wamampha wo ndingukupharazgiyani, weniwo munguwulonde, kweniso weniwo mutiwutaya cha.  Ndipuso kuziya mu uthenga wamampha wenuwu, wo ndingukupharazgiyani, mutaskika asani mutiwukoleska. Asani po cha, mbwenu kuja kwinu akugomezga nkhwaŵaka.  Pakuti pa vinthu vakwamba vo ndingukupaskani penga so vo ndingulonde, vakuti Khristu wangufwa chifukwa cha maubudi ngidu mwakukoliyana ndi Malemba.  Ndipuso kuti wanguŵikika mumasanu, wanguyuskika pa zuŵa lachitatu mwakukoliyana ndi Malemba.  Kweniso kuti wanguwoneke kwaku Kefa,* pavuli paki kwa akutumika 12.  Pavuli paki so wanguwoneke kwa abali akujumpha 500 pa nyengu yimoza, ndipu anandi mwaku yiwu teche nawu, chinanga kuti anyaki akugona tulu ta nyifwa.  Pavuli paki wanguwoneke kwaku Yakobe, ndipu pavuli paki kwa akutumika wosi.  Kweni pakumaliya paki wanguwoneke kwaku ini nge ku mwana wakuwa muteta.  Pakuti ini nde mumana ukongwa pa akutumika wosi, ndipu nde wakwenere cha kudanika kuti wakutumika, chifukwa ndatombozganga mpingu waku Chiuta. 10  Kweni chifukwa cha wezi ukulu waku Chiuta nde wakutumika. Ndipu wezi waki ukulu ukuluta paŵaka cha mwaku ini, kweni ndagwira ukongwa ntchitu kuluska wosi. Kweni ndini cha, mumalu mwaki wezi ukulu waku Chiuta wo we nani ndiwu wagwira ntchitu. 11  Sonu kwali ndini, kwali mbakutumika anyaki, nthowa yeniyi ndiyu tipharazgiya ndipu nthowa yeniyi ndiyu mungugomezge. 12  Sonu asani Khristu wapharazgika kuti wakuyuskika, ntchifukwa wuli anyaki mwaku yimwi akamba kuti akufwa azamuyuka cha? 13  Ndipu asani akufwa azamuyuka nadi cha, ndikuti Khristu wakuyuskika cha ku nyifwa. 14  Kweni asani Khristu wakuyuskika cha ku nyifwa, ndikuti kupharazga kwidu nkhwaŵaka ndipu chivwanu chinu nachu ntchaŵaka. 15  Kweniso asani akufwa azamuyuka nadi cha, ndikuti te akaboni aboza aku Chiuta, pakuti tipereka ukaboni wakususkana ndi Chiuta mwakukamba kuti wakuyuska Khristu ku nyifwa penipo iyu wakumuyuska cha. 16  Pakuti asani akufwa azamuyuka cha, ndikuti Khristu nayu wakuyuskika cha. 17  Ndipuso asani Khristu wakuyuskika cha, mbwenu chivwanu chinu ntchaŵaka kweniso mweche mu maubudi nginu. 18  Nawu so wo akugona tulu ta nyifwa mwakukoliyana ndi Khristu, ndikuti kukumala. 19  Asani tigomezga Khristu mu umoyu wunu pe, mbwenu te akuvwisa lisungu ukongwa kuluska munthu weyosi. 20  Kweni Khristu wakuyuskika ku nyifwa. Iyu ntchipasu chakwamba cha ŵanthu wo akugona tulu ta nyifwa. 21  Pakuti nyifwa yikuza kuporote mu munthu, chiyuka nachu chituza kuporote mu munthu. 22  Nge mo viliri kuti mwaku Adamu ŵanthu wosi atufwa, ndimu so viliri kuti mwaku Khristu ŵanthu wosi azamuja amoyu. 23  Kweni weyosi pamalu ngaki: Khristu chipasu chakwamba, pavuli paki aku Khristu, mu nyengu ya kuŵapu kwaki. 24  Sonu pakumaliya, wazamupereka Ufumu kwaku Chiuta waki kweniso Awisi, asani wazituzgapu maboma ngosi, mazaza ngosi kweniso nthazi. 25  Pakuti watenere kuwusa nge fumu mpaka po Chiuta waŵikiya arwani wosi kusi kwa maphazi ngaki. 26  Ndipu nyifwa, yo ndi murwani wakumaliya, yazamutuzgikapu. 27  Pakuti Chiuta “wakuthereske vinthu vosi kusi kwa maphazi ngaki.” Kweni pakukamba kuti ‘vinthu vosi vikuthereskeka,’ viwoneke limu kuti visazgapu Chiuta cha, yo wakuthereske vinthu vosi kwaku iyu. 28  Kweni asani vinthu vosi vazithereskeke kwaku iyu, Mwana nayu wazakujithereske yija kwaku Mweniyo wakuthereske vinthu vosi kwaku iyu, kuti Chiuta waje vinthu vosi kwaku weyosi. 29  Asani vingaŵa viyo cha, kumbi wo abatizika kuti aje akufwa azamuchitanji? Asani akufwa azamuyuskika cha, ntchifukwa wuli yiwu nawu abatizika kuti aje akufwa? 30  Ntchifukwa wuli tituŵa pa ngozi nyengu zosi? 31  Zuŵa lelosi ndituŵa pa ngozi yakuti ndingafwa. Nditikusimikiziyani abali kuti ndikondwa chifukwa chaku yimwi, likondwa lenili ndilu so nde nalu mwaku Khristu Yesu, Ambuyafwi. 32  Asani ndingulimbana ndi vinyama vakofya ku Efeso nge mo ŵanthu anyaki achitiya,* pe phindu wuli kwaku ini? Asani akufwa azamuyuskika cha, “tiyeni tiryi ndi kumwa, pakuti mawa tifwengi.” 33  Mungalandizgikanga cha. Kwanjana ndi ŵanthu aheni kunanga nkharu yamampha. 34  Jani azeru mu nthowa yaurunji ndipuso mungachitanga ubudi cha, pakuti anyaki atimuziŵa cha Chiuta. Ndikamba venivi kuti muchiti soni. 35  Chinanga vingaŵa viyo, munyaki wakambengi kuti: “Akufwa azamuyuskika wuli? Ndipu azamuyuka ndi liŵavu lamtundu wuli?” 36  Wambula zeru yiwi! Cho umija chingaja cha ndi umoyu kwambula kuti chafwa dankha. 37  Kweni pa nkhani ya cho umija, umija liŵavu lo limengi cha, kweni nje chayiyu, kwali yingaŵa ya tirigu pamwenga nje yinyaki yeyosi. 38  Kweni Chiuta watiyipaska liŵavu nge mo wakhumbiya, ndipu nje yeyosi watiyipaska liŵavu lakilaki. 39  Minofu yosi yiyanana cha, kweni pe mnofu wa munthu, pe mnofu wa ng’ombi, pe mnofu wa kayuni ndipuso unyaki ngwa somba. 40  Ndipuso pe maliŵavu ngakuchanya ndi ngapacharu chapasi, kweni unkhankhu wa maliŵavu ngakuchanya ngunyaki, unkhankhu wa maliŵavu ngapacharu chapasi nawu ngunyaki. 41  Unkhankhu wa lumwi ngunyaki, unkhankhu wa mwezi ngunyaki, unkhankhu wa nyenyezi ngunyaki ndipu unkhankhu wa nyenyezi zakupambanapambana ngwakupambanapambana so. 42  Ndimu so viŵiya pa nkhani ya kuyuka ku nyifwa. Liŵavu lo limijika ndakuti lingavunda; ndipu lo liyuskika ndakuti lingavunda cha. 43  Lo limijika liyuyulika; lo liyuskika lija ndi unkhankhu. Lo limijika lija lambula nthazi; lo liyuskika lija lanthazi. 44  Limijika liŵavu chayilu; liyuskika liŵavu lauzimu. Asani pe liŵavu chayilu, pe so liŵavu lauzimu. 45  Ndimu vikulembeke kuti: “Munthu wakwamba Adamu wanguja munthu wamoyu.” Adamu wakumaliya, wanguja mzimu wakupaska umoyu. 46  Kweni cho chitamba, ntchauzimu cha. Chakuliŵavu ndichu chitamba, pavuli paki chauzimu. 47  Munthu wakwamba ngwakutuliya pacharu kweniso ngwakupangika ndi dongu. Ndipu munthu wachiŵi ngwakutuliya kuchanya. 48  Nge mo waliri yo wakupangika ndi dongu, ndimu so aliri wo akupangika ndi dongu; ndipu mo waliri wakuchanya ndimu so aliri akuchanya. 49  Nge mo tikutoliyaku chikozgu chaku yo wakupangika ndi dongu, tazamutoliyaku so chikozgu chaku yo wakutuliya kuchanya. 50  Kweni nditikukambiyani abali kuti mnofu ndi ndopa, vingahara cha Ufumu waku Chiuta, kweniso cho chingavunda, chingahara cha chambula kuvunda. 51  Awonani! nditikukambiyani chisisi chakupaturika kuti: Ndi tosi cha tazamugona mu tulu ta nyifwa, kweni tosi tazamusambusika 52  mu kanyengu kamanavi, mu kumphone* ŵaka kwa jisu, mu nyengu ya mbata yakumaliya. Pakuti mbata yazamuliya, akufwa azamuyuskika ndi liŵavu lakuti lingavunda so cha ndipu tazamusambusika. 53  Pakuti liŵavu ili lo lingavunda, litenere kuvwala lo lingavunda cha, ndipu ili lo lingafwa, litenere kuvwala lo lingafwa cha. 54  Kweni asani ili lo livunda lazivwala lo lingavunda cha, ndipu ili lo litufwa lazivwala lo lingafwa cha, penipo ndipu ngazamufiskika mazu ngo ngakulembeka ngakuti: “Nyifwa yamezeka kwamuyaya.” 55  “Yiwi nyifwa, kuthereska kwaku kwe pani? Yiwi nyifwa, liwozga laku le pani?” 56  Ubudi ndiwu liwozga lo libala nyifwa, ndipu nthazi ya ubudi yituliya mu Dangu.* 57  Kweni wawongeki Chiuta pakuti watitiwovya kuthereska nyifwa kuporote mwa Ambuyafwi, Yesu Khristu! 58  Mwaviyo abali ŵangu akwanjiwa, mani gwa, mungasukunyikanga cha, jani ndi vakuchita vinandi mu ntchitu ya Ambuya, pakuziŵa kuti ntchitu yinu yosi mwa Ambuya, yituwa paŵaka cha.

Mazu Ngam'mphata

Wadanika so kuti Peturo.
Panyaki kuti, “nge mo ŵanthu awone.”
Pamwenga kuti, “kuphayiya.”
Wonani Mazu ngo Ngakonkhoskeka.