1 Akorinto 10:1-33

  • Vakuwoniyapu vakutitcheŵeska va mbiri ya Ayisirayeli (1-13)

  • Kutcheŵeska pa nkhani ya kusopa angoza (14-22)

    • Thebulu laku Yehova, thebulu la viŵanda (21)

  • Wanangwa kweniso kuŵanaŵaniya ŵanthu anyaki (23-33)

    • “Chitani vinthu vosi kuti mukankhuski Chiuta” (31)

10  Sonu abali, ndikhumba kuti muziŵi kuti apapi ŵidu wosi akali ŵenga pasi pa mtambu ndipu wosi anguporota panyanja.  Kweniso wosi angubatizika mwaku Mozesi mwakugwiriskiya ntchitu mtambu ndipuso nyanja.  Ndipu wosi angurya chakurya chauzimu chimoza,  wosi angumwa so chakumwa chauzimu chimoza, chifukwa amwanga kutuliya pa mwa wauzimu wo waŵalondonga, ndipu mwa wo wenga* Khristu.  Chinanga kuti venga viyo, Chiuta wangukondwa nawu cha anyaki mwaku yiwu, ndipu angubayikiya muchipululu.  Sonu vinthu venivi vinguja vakuwoniyapu kwaku isi, kuti tileki kukhumbira vinthu viheni nge mo yiwu anguvikhumbiriya.  Tingasopanga angoza cha nge mo anyaki aku yiwu anguchitiya. Anguchita nge mo vikulembeke kuti: “Ŵanthu anguja pasi kuti aryi ndi kumwa. Pavuli paki angusoka kuti akondwi.”  Tingachitanga cha malusu ngaheni ngakugonana,* nge mo anyaki mwaku yiwu anguchitiya malusu ngaheni ngakugonana,* mwakuti anyaki mwaku yiwu akukwana 23,000, angufwa mu zuŵa limoza.  Tingamuyesanga cha Yehova nge mo anyaki mwaku yiwu angumuyese, mwakuti angulumika ndi njoka ndipu angufwa. 10  Kweniso tingaŵanga akudinginyika cha nge mo anyaki mwaku yiwu angudinginyikiya, ndipu wakubaya yo wanguŵamala. 11  Sonu vinthu venivi vinguŵachitikiya kuti vije vakuwoniyapu ndipu vikulembeka kuti vititcheŵeski, isi umaliru wa mugonezi watifikiya. 12  Sonu yo waŵanaŵana kuti wama, waphwere kuti wangawa. 13  Palivi mayeseru ngo ngakuwiyani ngakuluska ngo ngawiya ŵanthu wosi. Kweni Chiuta ngwakugomezgeka ndipu wazomerezengi cha kuti muyeseki kujumpha po mungakunthiyapu. Ndipu asani muyeseka iyu wanozgengi nthowa yakuti mufiski kukunthiyapu. 14  Mwaviyo abali ŵangu akwanjiwa, thaŵani kusopa angoza. 15  Ndilongoro nge kuti ndikamba ndi ŵanthu akuwamu. Sankhani mwija pa vo ndikamba asani vauneneska pamwenga vaboza. 16  Asi kapu ya vitumbiku yo titumbika nkhusangana ndopa zaku Khristu? Asi chiŵandi cho timenya nkhusangana liŵavu laku Khristu? 17  Chifukwa chakuti pe chiŵandi chimoza, isi te liŵavu limoza chinanga kuti te anandi, pakuti tosi tiryaku chiŵandi cho. 18  Ŵanaŵaniyani vakuchitika va Ayisirayeli akuliŵavu: Asi wo aturya sembi, asangana ndi malu ngakuperekiyapu sembi?* 19  Kumbi ndikhumba kukambanji? Kumbi sembi zakuperekeka ku angoza, nkhanthu, pamwenga ngoza nkhanthu? 20  Awa; kweni ndikamba kuti sembi zo ŵanthu amitundu yinyaki apereka, atizipereka kwaku Chiuta cha, kweni ku viŵanda. Ndikhumba cha kuti yimwi muje akusangana ndi viŵanda. 21  Vingachitika cha kuti mumwi kapu yaku Yehova ndi kapu ya viŵanda. Vingachitika cha kuti muryi “va pathebulu laku Yehova” ndi va pathebulu la viŵanda. 22  Pamwenga ‘tichitiska sanji Yehova’? Kumbi isi te ndi nthazi kuluska iyu? 23  Vinthu vosi vakuzomerezeka,* kweni ndi vinthu vosi cha vakovya. Vinthu vosi vakuzomerezeka,* kweni ndi vinthu vosi cha vakuzenga. 24  Munthu weyosi wangapenjanga vakukhumba vaku iyu yija cha, kweni walutirizgi kupenja vakukhumba va munyaki. 25  Muryengi chechosi cho chigulisika pamsika wanyama, mungafumbanga cha kuchitiya njuŵi yinu. 26  Pakuti “charu ndi vinthu vosi vo ve mwenimo vaku Yehova.” 27  Asani munthu wambula kugomezga wakudanani ndipu mukhumba kuluta, karyeni chechosi cho wakukupaskani, mungachifumbanga cha chifukwa cha njuŵi yinu. 28  Kweni asani munthu munyaki wakukambiyani kuti, “Ivi vakuperekeka sembi ku angoza,” kurya cha chifukwa cha munthu yo wakukambiyani kweniso chifukwa cha njuŵi. 29  Ndikamba njuŵi yinu cha, kweni ndikamba njuŵi ya munthu munyaki. Ntchifukwa wuli wanangwa wangu ungayeruzgika ndi njuŵi ya munthu munyaki? 30  Asani nditurya ndawonga kwaku Chiuta, ntchifukwa wuli ndinyozeka pa vinthu vo ndawonga kwaku Chiuta? 31  Mwaviyo, kwali muturya, kwali mutumwa pamwenga muchita chinthu chinyaki chechosi, chitani vinthu vosi kuti mukankhuski Chiuta. 32  Lekani kuja chakuguŵiska kwa Ayuda, kwa Agiriki ndipuso ku mpingu wosi waku Chiuta. 33  Kweni ini ndikondwesa ŵanthu wosi mu vinthu vosi, kwambula kupenja vakukhumba vangu, kweni va ŵanthu anandi kuti ataskiki.

Mazu Ngam'mphata

Pamwenga kuti, “wang’anamuwanga.”
Mu Chigiriki, por·neiʹa. Wonani Mazu ngo Ngakonkhoskeka.
Mu Chigiriki, por·neiʹa. Wonani Mazu ngo Ngakonkhoskeka.
Pamwenga kuti, “ndi jotcheru.”
Pamwenga kuti, “Dangu lizomereza vinthu vosi.”
Pamwenga kuti, “Dangu lizomereza vinthu vosi.”