1 Akorinto 1:1-31

  • Moni (1-3)

  • Paulo wawonga Chiuta chifukwa cha Akorinto (4-9)

  • Achiskika kuti aje akukoliyana (10-17)

  • Khristu, ndi nthazi yaku Chiuta kweniso ndi zeru zaku Chiuta (18-25)

  • Kumalikiya mwaku Yehova pe (26-31)

1  Ini Paulo wakudanika kuti ndije wakutumika waku Khristu Yesu mwa khumbu laku Chiuta, limoza ndi Sositeni mubali widu,  ndilembe mpingu waku Chiuta wo we ku Korinto, yimwi mukutoweseka mwakukoliyana ndi Khristu Yesu, akudanika kuŵa akupaturika, limoza ndi wo ŵe kwekosi wo adaniya pa zina la Ambuya Yesu Khristu, Ambuyawu kweniso Ambuyafwi kuti:  Wezi ukulu kweniso chimangu vakutuliya kwaku Chiuta, Awusefwi kweniso kwa Ambuya Yesu Khristu, viŵi namwi.  Ndiwonga Chiuta nyengu zosi chifukwa chaku yimwi, pakuti wakukupaskani wezi ukulu mwaku Khristu Yesu.  Chifukwa mu vinthu vosi mwe akukhupuka kuporote mwaku iyu, mufiska kulongoro ndipuso muziŵa vinthu ukongwa,  nge mo ukaboni wakukwaskana ndi Khristu wakhole pakati pinu.  Ve viyo kuti muleki kusoŵa mphasu yeyosi muchilindizga kuvumbulika kwa Ambuyafwi Yesu Khristu.  Namwi so wazakukuwovyani kuti muje akukho mpaka pakumaliya kuti muzileki kuja ndi mulandu mu zuŵa la Ambuyafwi Yesu Khristu.  Chiuta mweniyo wakukudanani kuti muje akukoliyana* ndi Mwana waki Yesu Khristu, Ambuyafwi, ngwakugomezgeka. 10  Sonu nditikupemphani abali mu zina la Ambuyafwi Yesu Khristu, kuti mulongorongi mwakukoliyana ndipuso pakati pinu paŵevi kugaŵikana. Kweni muje akukoliyana mwakuja ndi mtima umoza ndipuso maŵanaŵanu ngamoza. 11  Pakuti ŵanthu anyaki a mubanja laku Kulowe andikambiya vakukwaskana ndi yimwi abali ŵangu kuti pakati pinu pe mphindanu. 12  Vo nding’anamuwa vakuti, weyosi waku yimwi wakamba kuti: “Ini nde waku Paulo,” anyaki, “Kweni ini nde waku Apolo,” anyaki, “Kweni ini nde waku Kefa,”* penipo anyaki akamba kuti, “Kweni ini nde waku Khristu.” 13  Kumbi Khristu wagaŵikana? Kumbi Paulo ndiyu wakubayikiya pachimiti chifukwa chaku yimwi? Pamwenga kumbi mukubatizika mu zina laku Paulo? 14  Ndiwonga Chiuta kuti ndikubatizapu munthu weyosi cha waku yimwi kupatuwapu Khrisipu ndi Gayo, 15  kuti paŵevi munthu wakukamba kuti mukubatizika mu zina langu. 16  Mbuneneska kuti ndikubatiza a munyumba yaku Stefana. Kweni ndiziŵa cha asani pe munyaki so yo ndikubatizapu pakati paku yimwi mosi. 17  Pakuti Khristu wakundituma kuti ndibatizengi cha, kweni kuti ndipharazgengi uthenga wamampha; mwambula kujilongo kuti ndilongoro mwazeru, kuti chimiti chakutombozgekiyapu* chaku Khristu chileki kuja chambula ntchitu. 18  Pakuti kukamba vakukwaskana ndi chimiti chakutombozgekiyapu* nkhupusa ku ŵanthu wo anangika, kweni kwaku isi titaskika, ndi nthazi yaku Chiuta. 19  Pakuti kukulembeka kuti: “Ndazamunanga zeru za ŵanthu azeru, ndipu ndazamukana* zeru za ŵanthu akuziŵa vinthu.” 20  Kumbi munthu wazeru we pani? Kumbi mlembi* we pani? Kumbi wakususka wa mu mugonezi wunu* we pani? Asi Chiuta wachitiska zeru za charu ichi kuŵa zakupusa? 21  Pakuti mu zeru zaku Chiuta, charu chingumuziŵa cha Chiuta kuporote mu zeru za charu, ndipu Chiuta wanguwona kuti nkhwamampha kuti kuporote mu kupusa kwa vo vipharazgika, wataski ŵanthu wo agomezga. 22  Pakuti Ayuda akhumba chisimikizu ndipu Agiriki apenja zeru, 23  kweni isi tipharazga va kubayika kwaku Khristu pachimiti, ndipu venivi vakuguŵiska kwa Ayuda, ndipu ku ŵanthu amitundu yinyaki nkhupusa. 24  Kweni ku ŵanthu akudanika wosi, Ayuda ndi Agiriki, Khristu ndi nthazi yaku Chiuta kweniso zeru zaku Chiuta. 25  Pakuti chinthu chakupusa chaku Chiuta ntchazeru kuluska ŵanthu, ndipu chinthu chakulopwa chaku Chiuta ntchanthazi kuluska ŵanthu. 26  Pakuti muwona abali mo iyu wakukudaniyani, kuti pe anandi cha azeru mwakuliŵavu, mbanandi cha anthazi, ndipuso mbanandi cha akutuliya mu mabanja ngakuzirwa. 27  Kweni Chiuta wakusankha vinthu vakupusa va mucharu kuti walengesi ŵanthu azeru ndipu wakusankha vinthu vakulopwa va mucharu kuti walengesi vinthu vanthazi. 28  Ndipu Chiuta wakusankha vinthu vambula kuzirwa va charu ndipuso vinthu vakumaliyapu, vinthu vakuti kulivi, kuti vinthu vo viliku paŵevi, 29  kuti paŵevi munthu wakumalika pa masu paku Chiuta. 30  Kweni chifukwa chaku Chiuta, mwe akukoliyana ndi Khristu Yesu, yo wativumbuliya zeru zakutuliya kwaku Chiuta kweniso urunji. Ndipu tatoweseka kweniso tafwatulika chifukwa cha sembi yaki yakuwombole, 31  kuti vije nge mo vikulembeke kuti: “Yo wamalika, wamalikiyi mwaku Yehova.”

Mazu Ngam'mphata

Pamwenga kuti, “kuti muchitiyengi vinthu limoza.”
Wadanika so kuti Peturo.
Wonani Mazu ngo Ngakonkhoskeka.
Wonani Mazu ngo Ngakonkhoskeka.
Pamwenga kuti, “ndazamututuzgiya pamphepeti.”
Kung’anamuwa, wakuziŵa Dangu.
Pamwenga kuti, “mu nyengu yinu.” Wonani Mazu ngo Ngakonkhoskeka.