Kuti tiphwere umampha mabanja ngidu, tosi tikhumbika kuja ndi ndalama. (Nthanthi 30:8) Ndipuso Bayibolu likamba kuti “ndalama nazu zivikiliya.” (Wakutawula 7:12) Nyengu zinyaki vija vakusuzga kukambiskana nkhani zakukwaskana ndi ndalama ndi munthu yo mukutolana nayu, kweni mungazomerezganga cha kuti ndalama ziyambisengi masuzgu munthengwa yinu. (Aefeso 4:32) Ŵanthu akutolana atenere kugomezgana ndi kuchitiya vinthu limoza asani akhumba kusankha mo angagwiriskiya ntchitu ndalama.

 1 NOZGEKIYANI UMAMPHA

VO BAYIBOLU LIKAMBA: “Ndiyani waku yimwi yo asani wakhumba kuzenga nyumba yakuthopoka waleka kuja dankha pasi ndi kuŵerengese kuti wawoni asani we ndi ndalama zakukwana kuti wayimalizi?” (Luka 14:28) Fundu iyi yilongo kuti mutenere kukambiskana mo mungagwiriskiya nchitu ndalama zinu. (Amosi 3:3) Sankhani vinthu vo mukhumba kugula ndi unandi wa ndalama zo mungagwiriskiya nchitu. (Nthanthi 31:16) Mungagulanga ŵaka vinthu chifukwa chakuti mwe ndi ndalama cha. Mugwiriskiyengi nchitu ndalama zo mwe nazu pe ndipu mungalambanga bweka cha.—Nthanthi 21:5; 22:7.

VO MUNGACHITA:

• Asani pakufika kukumaliya kwa mwezi mwaja ndi ndalama zinyaki, mukambiskani mo mungazigwiriskiya ntchitu

• Asani ndalama zikupereŵeliyeningi, yesani kusintha vinthu vinyaki. Mwakuyeruzgiyapu, mumalu mwakugula vakumwiya tiyi, mubikengi vo mulima mwaŵeni

 2 MUCHITENGI VINTHU MWAKUFWATUKA

VO BAYIBOLU LIKAMBA: “Tiphwere vinthu vosi mwauneneska, pa masu paku Yehova, ndi pa masu pa ŵanthu.” (2 Akorinto 8:21) Mungamubisanga cha munthu yo mukutolana nayu ndalama zo musaniya ndi kugwiriskiya nchitu.

Asani mukhumba kugwiriskiya ntchitu ndalama pa vinthu vikuluvikulu, mukambiskanengi dankha ndi munthu yo mukutolana nayu. (Nthanthi 13:10) Kukambiskana nkhani zakukwaskana ndi ndalama, kungawovya kuti mujengi mwachimangu munthengwa yinu. Ndalama zo musaniya mungazitonga nge zakumwija cha kweni za banja linu losi.—1 Timote 5:8.

VO MUNGACHITA:

• Kambiskanani ndi kuvwanana unandi wa ndalama zo weyosi wangagwiriskiya nchitu kwambula kukambiya munyaki

• Nyengu zosi mukambiskanengi mo mungagwiriskiya ntchitu umampha ndalama, mungakambiskananga asani mwakumana ndi masuzgu pe cha