Chinanga kuti mungayesesa wuli kuti muje ndi nthengwa kweniso banja lalikondwa, vinthu vamabuchibuchi vingakutondekeskani kulutirizga kuja alikondwa. (Wakutawula 9:11) Asani tikumana ndi masuzgu, Chiuta watitiwovya chifukwa chakuti watitiyanja. Asani mugwiriskiya ntchitu fundu za mu Malemba, imwi ndi banja linu mukhoza kumalana ndi masuzgu chinanga ngangaŵa ngakulu.

 1 MUGOMEZGENGI YEHOVA

VO BAYIBOLU LIKAMBA:“Muchiponya paku iyu vosi vo vitikufipiskani mtima, chifukwa iyu watikuŵanaŵaniyani.” (1 Peturo 5:7) Nyengu zosi mukumbukengi kuti Chiuta ndiyu wachitiska kuti mukumanengi ndi masuzgu cha. (Yakobe 1:13) Kweni iyu wakuwovyeningi chifukwa chakuti mutesesa kundere kufupi ndi iyu. (Yesaya 41:10) Mwaviyo, “mujuliyeni mitima yinu.”—Salimo 62:8.

Asani muŵerenga ndi kusambira Bayibolu zuŵa lelosi, mupembuzgikengi ukongwa. Ndipu muwonengi mo Yehova ‘watitipembuzgiya mu mayeseru ngidu ngosi.’ (2 Akorinto 1:3, 4; Aroma 15:4) Yehova walayizga kuti wakupaskeningi “chimangu chaku Chiuta cho chiluska kuziŵa vinthu kosi.”—Afilipi 4: 6, 7, 13.

VO MUNGACHITA:

• Mupemphengi Yehova kuti wakuwovyeni kuja akufwasa kweniso akuŵanaŵana umampha

• Wonani so umampha vosi vo mukhumba kuchita ndipu sankhani vo vingakuwovyani pe

2 MUJIPHWERIYENGI KWENISO MUPHWERIYENGI BANJA LINU

VO BAYIBOLU LIKAMBA: “Mtima wa munthu wakuvwisa vinthu, uja wakuziŵa vinthu, ndipu gutu la munthu wazeru lipenja kuziŵa vinthu.” (Nthanthi 18:15) Muziŵengi vo vichitikiya weyosi mu banja linu kweniso vo weyosi wakhumba. Mukambiskanengi nawu ndipuso muŵavwisiyengi.—Nthanthi 20:5.

Kumbi mungachita wuli asani munthu yo mutanja watayika? Mungawopanga cha kuliya. Kumbukani kuti Yesu nayu “wanguliya.” (Yohane 11:35; Wakutawula 3:4) Kupumuwa ndipuso kugona mwakukwana nkhwakukhumbika. (Wakutawula 4:6) Venivi vingakuwovyani kuti muleki kusuzgika maŵanaŵanu.

VO MUNGACHITA:

• Muyanjengi kukambiskana ndi banja linu kaŵikaŵi masuzgu ngechendakuwiyeni. Ivi vingawovya kuti mukambiskanengi mwakufwatuka asani banja linu lakumana ndi masuzgu

• Kambiskanani ndi ŵanthu wo akukumanapu ndi masuzgu ngakuyanana ndi ngo mwakumana nangu

 3 MUPEMPHENGI ANYINU KUTI AKUWOVYENI

VO BAYIBOLU LIKAMBA: “Bwezi chayilu litanja nyengu zosi ndipu ilu ndi mubali yo wakubalika kuti wakuwovyi pa nyengu ya suzgu.” (Nthanthi 17:17) Anyinu angayanja kukuwovyani, kweni angaziŵa cha vo angachita kuti akuwovyeni. Mwaviyo, mungatondekanga cha kuŵakambiya vo mukhumba kuti akuchitiyeni. (Nthanthi 12:25) Mukhumbika so kupempha ŵanthu wo avwisa umampha fundu za mu Bayibolu kuti akuwovyeni kulutirizga kuja pa ubwezi ndi Yehova. Ulongozgi wa mu Bayibolu wo angakupaskani ungakuwovyani.—Yakobe 5:14.

Kwanjana ndi ŵanthu wo agomezga nadi Chiuta ndi malayizgu ngaki, kungakuwovyani asani mwakumana ndi masuzgu. Mungapembuzgika so ukongwa asani mutovya wo akumana ndi masuzgu. Muŵakambiyengi vo mugomezga kweniso vo Chiuta walayizga. Muyesesengi kovya ŵanthu wo akumana ndi masuzgu kweniso kucheza ndi ŵanthu wo atikuyanjani ndi kukuŵanaŵaniyani.—Nthanthi 18:1; 1 Akorinto 15:58.

VO MUNGACHITA:

• Asani mwakumana ndi masuzgu, mukonkhoskiyengeku mubwezi winu wapamtima kuti wakuwovyeni

• Mungabisanga cha vo mukhumba kuti anyinu akuchitiyeni ndipu mukambengi mwakufwatuka