Nge po mwasambiriya kali mu kabuku yaka, Bayibolu le ndi fundu zinandi zo zingakuwovyani pamoza ndi banja linu. Yehova wakhumba kuti mujengi alikondwa. Iyu walayizga kuti asani mutanja kumusopa, “vosi visazgikiyengeku kwaku yimwi.” (Mateyu 6:33) Uwu mbukaboni wakuti iyu wakhumba kuti muje nayu pa ubwezi. Mwaviyo, muyesesengi kuchita vinthu vo vingakuwovyani kuti mulutirizgi kuja pa ubwezi ndi Chiuta. Ndipu wenuwu ndi mwaŵi ukulu wo munthu wangaja nawu.—Mateyu 22:37, 38.

 1 MUCHITENGI VINTHU VO VINGAWOVYA KUTI UBWEZI WINU NDI YEHOVA UJE WAKUKHO

VO BAYIBOLU LIKAMBA: “Ini ndazamuja wusemwi ndipu yimwi mwazamuja ŵana ŵangu anthulumi ndi anthukazi.” (2 Akorinto 6:18) Chiuta wakhumba kuti imwi muje nayu pa ubwezi wakukho. Kupemphera ndi nthowa yimoza yo yingakuwovyani kuti mufiski kuchita venivi. Yehova watikupemphani kuti: “Mupempherengi nyengu zosi.” (1 Atesalonika 5:17) Iyu wakhumbisiska kuvwa maŵanaŵanu ndi masuzgu nginu. (Afilipi 4:6) Asani mupemphere limoza ndi banja linu, muliwovyengi kuwona kuti namwi muthemba ukongwa Chiuta.

Mukambiskanengi ndi Chiuta kweniso mumuvwiyengi. Mungachita ivi asani musambira Mazu ngaki kweniso mabuku ngo ngakonkhoska Bayibolu. (Salimo 1:1, 2) Mulungurukengi pa vo musambira. (Salimo 77:11, 12) Kuwungana nyengu zosi kulongo kuti muvwiya Chiuta.—Salimo 122:1-4.

Chinthu chinyaki so cho chingakuwovyani kuti mulutirizgi kuja pa ubwezi wakukho ndi Yehova, nkhukambiyaku ŵanthu vakukwaskana ndi iyu. Asani mulutirizga kuchita venivi, mujengi nayu pafupi ukongwa.—Mateyu 28:19, 20.

VO MUNGACHITA:

• Zuŵa lelosi musaniyengi nyengu yakuŵerenge Bayibolu ndi kupemphera

• Muyanjengi ukongwa kusambira vakukwaskana ndi Chiuta nge banja, kuluska kwanja ŵaka vakukondweska ndi masaza

2 MUKONDWENGI NDI KUSOPA KWA PABANJA

VO BAYIBOLU LIKAMBA: “Ndereni kufupi ndi Chiuta, ndipu nayu wanderengi kufupi ndi yimwi.” (Yakobe 4:8) Mutenere kupanga ndondomeku yakusopa kwa pabanja ndipu mungapingiyanga cha. (Genezesi 18:19) Kweni ndi venivi pe cha. Mukhumbika so kwanja ukongwa Chiuta pa umoyu winu. Kuti banja linu lilutirizgi kuja pa ubwezi wakukho ndi Yehova, mukambiskanengi vakukwaskana ndi iyu ‘asani mwaja pasi munyumba zinu, asani mutenda munthowa, asani mugona ndipuso asani muyuka.’ (Dotoronome 6:6, 7) Mutenere kuchita vinthu nge Yoswa yo wangukamba kuti: “Ini ndi a munyumba yangu, titeŵetiyengi Yehova.”—Yoswa 24:15.

VO MUNGACHITA:

• Musambirengi limoza ndi banja linu nyengu zosi ndipu mukambiskanengi fundu zo zingawovya weyosi mu banja linu