Yehova wakhumba kuti taŵanthu tije‘ akugomezgeka.’ (Mika 6:8) Kugomezgeka nkhwakukhumbika ukongwa munthengwa chifukwa kutovya kuti mugomezganengi. Ndipu chanju chikuwa ukongwa asani mwaŵanthu akutorana mugomezgana.

Mazuŵa nganu, ŵanthu anandi akutorana agomezgeka cha. Kuti nthengwa yinu yileki kuwayawaya, mutenere kwesesa kuchita vinthu viŵi.

 1 MUCHITENGI VINTHU VAKULONGO KUTI NTHENGWA YINU NJAKUZIRWA UKONGWA

VO BAYIBOLU LIKAMBA: “Musimikizi kuti vinthu vakukhumbika ukongwa ndi nivi.” (Afilipi 1:10) Nthengwa yinu ye m’gulu la vinthu vakukhumbika ukongwa pa umoyu winu. Mwaviyo, muyiwonengi kuti njakuzirwa ukongwa.

Yehova wakhumba kuti muŵanaŵaniyengi ukongwa munthu yo mukutolana nayu ndipuso kuti mukondwiyengi limoza. (Wakutawula 9:9) Iyu wakhumba cha kuti muswayanengi, kweni muchitengi vinthu vo vingakuwovyani kuti mukondweskanengi. (1 Akorinto 10:24) Munthu yo mukutolana nayu wajivwengi kuti ngwakukhumbika ndipuso mumulumbengi.

VO MUNGACHITA:

• Muwonesesengi kuti nyengu zosi musaniya nyengu yakucheze ndi munthu yo mukutolana nayu, kwambula kutimbanyizgika ndi vinthu vinyaki

• Nyengu zosi asani mukhumba kuchita vinthu mukumbukengi kuti mwe mwija cha kweni mwe ŵaŵi

 2 MUVIKIRIYENGI MTIMA WINU

VO BAYIBOLU LIKAMBA: “Weyosi yo walutirizga kulereska munthukazi mwakumukhumbira, wachita nayu kali chigololu mumtima mwaki.” (Mateyu 5:28) Asani munthu walutirizga kuŵanaŵana vinthu va ureŵi, tingakamba kuti iyu ngwambula kugomezgeka kwa munthu yo wakutorana nayu.

Yehova wakamba kuti mukhumbika ‘kuvikiliya ukongwa mtima winu.’ (Nthanthi 4:23; Yeremiya 17:9) Kuti mufiski kuchita ivi, mutenere kuvikiliya masu nginu. (Mateyu 5:29, 30) Yesesani kuyezga Yobu yo wangupangana ndi masu ngaki kuti wangawonanga munthukazi munyaki cha ndi chilatu chakumukhumbira. (Yobu 31:1) Mungayesiyanga ndi dalavi cha kuja ndi mtima wakukhumba kuwonere vinthu vakusikuwa. Ndipu tcheŵani kuti mungamalikiyanga munthu munyaki yo ndi muwolu pamwenga mulumu winu cha.

VO MUNGACHITA:

• Muchitengi vinthu vo vingawovya kuti ŵanthu aziŵengi kuti mutanja yo mukutolana nayu ndi mtima winu wosi

• Asani mutanjana ndi ŵanthu wo muwolu pamwenga mulumu winu watiŵawona kuti mbamampha cha, muŵanaŵaniyengi ukongwa mo iyu wavwiya ndipu mungalutirizganga cha kwanjana nawu