Yehova wachiyambisa banja, wangupaska apapi udindu wakusambiza ŵana ŵawu. (Akolose 3:20) Mbudindu winu apapi kusambiza mwana winu kuti wayanjengi Yehova ndipuso kuti wakuwi umampha. (2 Timote 1:5; 3:15) Mukhumbika so kuziŵa vo ve mumtima wa mwana winu. Mutenere kuziŵa kuti vo imwi muchita, vingawovya ukongwa mwana winu. Kuti mufiski kusambiza mwana Mazu Ngaku Yehova, mukhumbika dankha kungaŵika mumitima yinu.—Salimo 40:8.

 1 WOVYANI ŴANA ŴINU KUTI AKAMBISKANENGI NAMWI MWAKUFWATUKA

VO BAYIBOLU LIKAMBA: “Munthu weyosi waŵi mpusu kuvwa, wakusweriyapu kulongoro.” (Yakobe 1:19) Muchitengi vinthu vo vingaŵovya kuti ŵana ŵinu akambiskanengi namwi mwakufwatuka. Yiwu atenere kuziŵa kuti imwi mwe akunozgeka kuvwisiya pa nyengu yo akhumba kulongoro namwi. Muyesesengi kuchita vinthu mwachimangu panyumba pinu, kuti ŵana ŵinu akambiskanengi namwi mwakufwatuka. (Yakobe 3:18) Asani mutanja kuŵakalipiya pamwenga kuŵachenya nyengu zosi, angafwatukirana namwi cha. Muchitengi nawu vinthu mwakuzizipizga, ndipu nyengu zosi muŵalongongi kuti mutiŵayanja.—Mateyu 3:17; 1 Akorinto 8:1.

VO MUNGACHITA:

• Asani ŵana ŵinu akhumba kukambiskana namwi, mungaŵakaniyanga cha

• Mukambiskanengi ndi ŵana ŵinu pafupipafupi, kukambiskana nawu asani pe masuzgu pe cha

2 MUYESESENGI KUVWISISA VO AKAMBA

VO BAYIBOLU LIKAMBA: “Munthu yo walongo zeru pa chinthu chechosi vinthu vimuyendiyengi umampha.” (Nthanthi 16:20) Asani ŵana ŵinu akonkhoska maŵanaŵanu ngawu, nyengu zinyaki muvwisiyengi ndi chilatu chakukhumba kuvwisisa mo avwiya. Mbuneneska kuti ŵana anandi atanja kukuskiyaku nkhani pamwenga kukamba vinthu mwakupekula. Kweni Bayibolu likamba kuti “Munthu yo wamuka nkhani wechendayivwisi, ndi muzereza.” (Nthanthi 18:13) Mwaviyo, mungathaŵiriyanga cha kukwiya.—Nthanthi 19:11.

VO MUNGACHITA:

• Muyesesengi kuwuko mtima kuti asani ŵana ŵinu akonkhoska maŵanaŵanu ngawu, mungaŵadumulizganga pamwenga kuŵakalipiya cha

• Mukumbukengi mo imwi mwavwiyanga kweniso vinthu vo mwayanjanga pa nyengu yo mwenga msinkhu wawu

3 MUCHITENGI VINTHU MWAKUKOLIYANA

VO BAYIBOLU LIKAMBA: “Wamwana wangu, vwiya ulongozgi wa awusu, ndipu ungawujowonga cha ulongozgi wa anyoku.” (Nthanthi 1:8) Yehova wakupaska mazaza ngakulunguchizga ŵana kwa apapi wosi ŵaŵi. Mwaviyo, muyesesengi kusambiza ŵana ŵinu kuti akutumbikeningi ndi kukuvwiyani. (Aefeso 6:1-3) Ŵana akhoza kuziŵa kuti apapi ŵawu mbambula ‘kukoliyana.’ (1 Akorinto 1:10) Asani mwaguŵiskana, yesani kukambiskana kumphepeti, chifukwa asani mungapindana pamasu pa ŵana, akutumbikeningi cha.

VO MUNGACHITA:

• Mukambiskanengi vo mungachita kuti musambizengi ŵana ŵinu ndipu muchitengi vinthu mwakukoliyana

• Asani mwe ndi maŵanaŵanu ngakupambana pa nkhani ya mo mugasambiziya ŵana ŵinu, yesesani kuvwisa vo munyinu wang’anamuwa

 4 NOZGEKIYANI LIMU

VO BAYIBOLU LIKAMBA: “Sambiza mnyamata nthowa yo watenere kwendamu.” (Nthanthi 22:6) Mutenere kuchita phamphu kuti musambizi umampha ŵana ŵinu. Mukhumbika kunozgeke limu vo mwazamuchita kuti musambizi ndi kulunguchizga ŵana ŵinu. (Salimo 127:4; Nthanthi 29:17) Kusambiza ŵana nkhuŵalanga pe cha, kweni kusazgapu kuŵawovya kuti avwisisi chifukwa cho mwajalikiskiya marangu. (Nthanthi 28:7) Asambizeni so kuti ayanjengi ndi kuvwisa fundu za mu Mazu Ngaku Yehova. (Salimo 1:2) Ivi vingaŵawovya kuti aje ndi njuŵi yamampha.—Aheberi 5:14.

VO MUNGACHITA:

• Muyesesengi kuwovya ŵana ŵinu kuti awonengi Chiuta nge Munthu chayiyu yo angamuthemba

• Awovyeni kuti aŵanikengi ndi kukhwecha mijalidu yiheni nge yo yisanirika pa Intaneti ndipuso malu nganyaki ngakucheze nga pa Intaneti. Asambizeni mo angankhweche ŵanthu wo angaŵachichizga kugonana nawu