Asani mwayamba umoyu wa banja, mukumanengi ndi masuzgu ngakupambanapambana. Ivi vichitikengi chifukwa chakuti mupambana mo muŵanaŵaniya, mo muvwiya ndipuso mo muchitiya vinthu. Nyengu zinyaki masuzgu ngatuliyengi ku ŵanthu anyaki pamwenga vakuchitika vinyaki vamabuchibuchi.

Asani mwaziŵa kuti mukumanengi ndi masuzgu mukhoza kufipa mtima, kweni Bayibolu lititikambiya kuti tiyesesengi kungamaliska. (Mateyu 5:23, 24) Kugwiriskiya ntchitu fundu za mu Bayibolu kungakuwovyani kuti musaniyi nthowa zamampha ukongwa zakumalisiya masuzgu.

 1 MUKAMBISKANENGI

VO BAYIBOLU LIKAMBA: Pe “nyengu yakulongoro.” (Wakutawula 3:1, 7) Yesesani kusaniya nyengu yakukambiskiyana suzgu lo lilipu. Konkhoskani mwakufwatuka mo muvwiya kweniso maŵanaŵanu nginu pa nkhani yo. ‘Mulongorongi uneneska’ nyengu zosi ndi munthu yo mukutolana nayu. (Aefeso 4:25) Chinanga kuti mungafya mtima, yesesani kujiko kuti muleki kupindana. Kumuka mwakufwasa kutovya kuti nkhani yo mukambiskana yileki kwambisa mphindanu.—Nthanthi 15:4; 26:20.

Chinanga kuti muleki kukoliyana ndi vo munyinu wakamba, mutenere kuchita vinthu mwachanju kweniso mwaulemu. (Akolose 4:6) Muyesesengi kumaliska liŵi mphindanu ndipu mungalekanga cha kukambiskana chifukwa chakuti mwaguŵiskana.—Aefeso 4:26.

VO MUNGACHITA:

• Sankhani nyengu yakwenere yakukambiskiyana suzgu lo

• Asani munyinu ndiyu wakonkhoska, muvwisiyeni ndipu kumudumulizga cha mpaka wamalizi. Nyengu yakuti namwi mulongoropu yikwanengi

 2 MUVWISIYENGI NDI KUVWISISA

VO BAYIBOLU LIKAMBA: “Muyanjanengi ndi mtima wosi. Pa kulongorana ulemu, mujengi panthazi.” (Aroma 12:10) Muvwisiyengi ndi chilatu chakukhumba kutopu fundu pa vo munyinu wakonkhoska, ndipu kuti muchiti ivi mutenere kulongo kuti ‘mutimuŵanaŵaniya . . . ndipuso kuti mwe akujiyuyuwa.’ (1 Peturo 3:8; Yakobe 1:19) Muvwisiyengi ndi mtima wosi, kuchitiya ŵaka kuti nkhani yimalepu cha. Asani mungafiska, mulekezgengi dankha vo muchita ndi kuvwisiya vo munyinu wakamba pamwenga mungamupempha kuti mukambiskani nyengu yinyaki. Asani munthu yo mukutolana nayu mumuwonengi nge mubwezi winu, vikuwovyeningi kuti muleki kuja ndi mtima ‘wakukwiya liŵi.’—Wakutawula 7:9.

VO MUNGACHITA:

• Lutirizgani kuvwisiya ndi mtima wosi chinanga kuti vo munyinu wakonkhoska vitikukondweskani cha

• Muvwisiyengi ndi chilatu chakukhumba kutopu fundu pa vo munyinu wakonkhoska. Muwonengi mo wagwiriskiya nchitu manja ndi chisku pakulongoro kweniso mo watuzgiya mazu

3 MUCHITENGI VO MWASANKHA

VO BAYIBOLU LIKAMBA: “Munthu weyosi yo wagwira ntchitu mwaphamphu wasaniya phindu, kweni munthu yo walongoro ŵaka wakavuka.” (Nthanthi 14:23) Mumalu mwakuvwanana ŵaka pa fundu yinyaki, muyesesengi kuchita vo mwasankhiya limoza. Kuchita ivi kukhumbika phamphu, kweni pakumaliya paki muyanduwengi ukongwa. (Nthanthi 10:4) Asani mungachita vinthu mwakukoliyana, muŵengi ndi “mphotu yamampha.”—Wakutawula 4:9.

VO MUNGACHITA:

• Sankhani vo weyosi wangachita kuti wamaliski suzgu lo mwakumana nalu

• Nyengu zosi muwonengi asani musintha nadi