Asani mwana wawaku, mukhoza kukondwa kweniso kufipa mtima. Mungazizwa ukongwa kuwona kuti sonu mumaliyengi nyengu ndi nthazi zinandi pakuphwere mwana. Chanju chinu chingayamba kusintha chifukwa chakufuŵizga tulu kweniso kutimbanyizgika maŵanaŵanu. Mosi mwaŵaŵi mukhumbika kusintha vinthu vinyaki kuti muphwere mwana winu kweniso kuti mutaski nthengwa yinu. Kumbi ulongozgi wa mu Bayibolu ungakuwovyani wuli kuti mumalani ndi masuzgu ngenanga?

 1 UZIŴANI MO MWANA WASINTHIYA VINTHU PA UMOYU

VO BAYIBOLU LIKAMBA: “Chanju chizikira ndipuso ntchalisungu.” Ndipuso chanju “chikhumba vakuchija pe cha ndipuso chikwiya cha.” (1 Akorinto 13:4, 5) Asani mwana wawaku, kanandi mwanthukazi mumaliya nyengu pakuphwere mwana. Ivi vichitiska kuti mulumu winu wayambi kuwona kuti mutimutoliyaku kanthu cha, mwaviyo, mungaluwanga cha kuti iyu wakhumba so kuti muchezengi nayu. Muyesesengi kumuwovya mwakuzikira ndipuso mwaulemu kuti wajivwengi kuti ngwakukhumbika kweniso kuti nayu we ndi udindu wakuphwere mwana.

“Yimwi anthulumi akuto, lutirizgani kuja nawu mwakuŵaziŵa umampha awolu ŵinu.” (1 Peturo 3:7) Mutenere kuziŵa kuti muwolu winu wamaliyengi nthazi zinandi pakuphwere mwana. Kumbukani kuti sonu we ndi vakuchita vinandi kuluska kali ndipu ivi vingachitiska kuti wavukengi ukongwa pamwenga kutimbanyizgika maŵanaŵanu. Nyengu zinyaki wangakukwiyiyani, kweni muyesesengi kuzizipizga chifukwa “munthu yo waleka kukwiya liŵi ngwamampha kuluska munthu wanthazi.” (Nthanthi 16:32) Muwovyengi muwolu winu pa vo wakhumba, ndipu venivi vilongongi kuti muchita vinthu mwakuwamu.—Nthanthi 14:29.

VO MUNGACHITA:

• Ada: Muwovyengi muwolu winu kuphwere mwana chinanga ungaŵa usiku. Yesani kusintha unandi wa nyengu yo mumaliya pa vinthu vinyaki kuti musaniyi nyengu yinandi yakucheze ndi muwolu winu kweniso mwana

• Ama: Asani mulumu winu wakhumba kukuwovyani kuphwere mwana, mungakananga cha. Asani watondeka kuphwere umampha mwana, kumuchombola cha kweni mwaulemu mulongoni ŵaka mo wangachitiya

 2 MUYESESENGI KUKHORESKA UBWEZI WINU

VO BAYIBOLU LIKAMBA: “Yiwu azamuja liŵavu limoza.” (Genezesi 2:24) Chinanga kuti mu banja linu mwe mwana, mungaluwanga cha kuti imwi ndi munthu yo mukutolana nayu mweche “liŵavu limoza.” Mwaviyo, muyesesengi kuchita vinthu vo vingawovya kuti ubwezi winu ulutirizgi kuja wakukho.

Anthukazi, muwongengi ukongwa vo mulumu winu watikuchitiyani. Vo mungakamba ndi kuchita pakumuwonga vingaŵa nge munkhwala ‘wakuchizga.’ (Nthanthi 12:18) Anthulumi, mukambiyengi muwolu winu kuti mutimuyanja ukongwa kweniso kuti ngwakukhumbika ukongwa kwaku imwi. Mumulumbengi pa vo wachita kuti waphwere banja losi.—Nthanthi 31:10, 28.

“Munthu weyosi wangapenjanga vakukhumba vaki pe cha, kweni walutirizgi kupenja vakukhumba va munyaki.” (1 Akorinto 10:24) Nyengu zosi muchitiyengi vinthu vamampha munthu yo mukutolana nayu. Musaniyengi nyengu yakukambiskana, kuwongana kweniso kuvwisiya vo munyinu wakamba. Mungachitanga vinthu mwambunu cha pa nkhani yakugonana. Muŵanaŵaniyengi vo munyinu wakhumba. Bayibolu likamba kuti: “Munganolananga cha kupatuwaku asani mosi mwavwanana kuti muleki dankha.” (1 Akorinto 7:3-5) Mwaviyo, mukambiskanengi nkhani iyi mwakufwatuka. Kuchita vinthu mwakuzikira kweniso kuvwisisa, kungawovya kuti ubwezi winu uje wakukho.

VO MUNGACHITA:

• Mungaluwanga cha kusaniya nyengu yakucheze ndi muwolu winu kweniso mulumu winu

• Muchitengi tinthu timanatimana to tingachitiska munthu yo mukutolana nayu kujivwa kuti mutimuyanja, nge kumutumiziya timazu tachanju pafoni pamwenga kumuguliya kanthu kanyaki

 3 MUSAMBIZENGI MWANA WINU

VO BAYIBOLU LIKAMBA: “Kutuliya pa ulitema wasambira malemba ngakupaturika, ngo ngangakuwovya kuti uje ndi zeru zakuti utaskikiyi.” (2 Timote 3:15) Nozgekiyani limu vo mwazamuchitanga kuti musambizi mwana winu. Mwana wasambira vinthu munthowa yakuziziswa limu chinanga mphanyengu yo wechendaweku. Mwana winu weche m’moyu, wakhoza kuŵanika mazu nginu kweniso kuchita mwakukoliyana ndi mo imwi muvwiya. Mumuŵerengiyengi mazu ngaku Chiuta weche bonda. Chinanga kuti wangavwisisa cha vo muŵerenga, kweni vingamuwovya kuti waziyanjengi kuŵerenga asani wakuwa.

Mwaviyo, bonda watondeka cha kuvwa vo mukamba vakukwaskana ndi Chiuta. Mupempherengi kwaku Yehova mwana winu wachivwa. (Dotoronome 11:19) Chinanga mphanyengu yo museŵe nayu, mukambengi vakukwaskana ndi vinthu vo Chiuta wakulenga. (Salimo 78:3, 4) Mwana winu wachikuwa, wawonengi yija kuti mutanja Yehova ndipu nayu wayambengi kumuyanja.

VO MUNGACHITA:

• Mupemphengi Yehova kuti wakupaskeni zeru zakusambiziya mwana winu

• Mukambengi mwakuwerezawereza mazu ndipuso fundu zakukhumbika kuti mwana winu wayambi kusambira vinthu weche bonda