Yehova a Chiuta ndiyu wangukwatiska nthengwa yakwamba. Bayibolu likamba kuti iyu wangupanga munthukazi wakwamba ndipu “wanguza nayu ku munthulumi.” Adamu wati wamuwona, wangukondwa ukongwa ndipu wanguti: “Uyu sonu ntchiwanga cha viwanga vangu ndipuso mnofu wa mnofu wangu.” (Genezesi 2:22, 23) Mazuŵa nganu napu, Yehova wakhumba kuti ŵanthu akutolana ajengi mwalikondwa.

Asani mwaŵanthu mwatolana ŵaka, muwona nge kuti mukumanengi ndi suzgu lelosi cha. Kweni uneneska ngwakuti chinanga munthulumi ndi munthukazi ayanjani wuli, akumana mbwenu ndi masuzgu chifukwa chakuti wosi mbakubuda. (1 Akorinto 7:28) Mukabuku yaka, mwe fundu za m’Bayibolu zo zingakuwovyani kuja ndi nthengwa yalikondwa asani mungazigwiriskiya ntchitu.—Salimo 19:8-11.

 1 MUFISKENGI UDINDU WO YEHOVA WAKUKUPASKANI

VO BAYIBOLU LIKAMBA: Munthulumi ndiyu mutu wa banja.—Aefeso 5:23.

Asani mukuto, Yehova wakhumba kuti mumuphweriyengi umampha ukongwa muwolu winu. (1 Peturo 3:7) Iyu wangumupanga kuti waje wakukuwovyani kweniso munyinu wakwenere, ndipu wakhumba kuti mumupaskengi ulemu kweniso mumuyanjengi. (Genezesi 2:18) Asani mutimuyanja ukongwa muwolu winu, muyesesengi kudanjizga vakukhumba vaki mumalu mwakudanjizga vakukhumba vinu.—Aefeso 5:25-29.

Asani mukuyirwa, Yehova wakhumba kuti mutumbikengi ukongwa mulumu winu ndipu mumuwovyengi kufiska udindu waki nge mutu. (1 Akorinto 11:3; Aefeso 5:33) Mukoliyanengi ndi mulumu winu pa vo wasankha ndipuso mumuwovyengi ndi mtima wosi. (Akolose 3:18) Asani muchitengi viyo, mujengi munthukazi wakutowa ukongwa kwa mulumu winu kweniso kwaku Yehova.—1 Peturo 3:1-6.

VO MUNGACHITA:

• Fumbani munthu yo mukutolana nayu kuti wakukambiyeni vo mungachita kuti muje munthulumi pamwenga munthukazi wamampha. Vwisiyani mwakuphwere ndipu yesesani kusintha

• Muzikirengi. Vitongi nyengu yitali kuti muziŵi vo mungachita kuti weyosi wakondwengi

2 MUŴANAŴANIYENGI UKONGWA MO MUNYINU WAVWIYA

VO BAYIBOLU LIKAMBA: Muyesesengi kuziŵa vo munthu yo mukutolana nayu watanja. (Afilipi 2:3, 4) Mumuwonengi kuti ngwakuzirwa ukongwa ndipu mungaluwanga cha kuti Yehova wakhumba kuti mteŵeti ŵaki weyosi wajengi “wakuzika ku ŵanthu wosi.” (2 Timote 2:24) “Mazu ngakukambika mwambula kuŵanaŵana umampha, ngagwaza nge lipanga, kweni lilimi la munthu wazeru lichizga.” Fundu iyi, yititisambiza kuti tiŵanaŵanengi dankha techendalongoro. (Nthanthi 12:18) Mzimu waku Yehova ukuwovyeningi kuti mulongorongi mwaulemu kweniso mwachanju.—Agalatiya 5:22, 23; Akolose 4:6.

VO MUNGACHITA:

• Mwechendakambiskani nkhani yikulu ndi munthu yo mukutolana nayu, pempherani dankha kuti Chiuta wakupaskeni mtima wakuzikira ndipuso kuti mukambiskani mwakufwatuka

• Muŵanaŵaniyengi dankha vo mukhumba kukamba kweniso mo mungakambiya

 3 MUKAMBIRANENGI VO MUŴANAŴANA

VO BAYIBOLU LIKAMBA: Asani mwatolana, muja “liŵavu limoza.” (Mateyu 19:5) Chinanga kuti ve viyo, mwe ŵanthu ŵaŵi akupambana ndipu mungaja ndi maŵanaŵanu ngakuyanana cha. Mwaviyo, mukhumbika kusambira mo mungachitiya kuti mukoliyanengi ndi maŵanaŵanu nga munyinu kweniso muvwengi nge mo wavwiya. (Afilipi 2:2) Kukoliyana nkhwakukhumbika ukongwa asani musankha vakuchita. Bayibolu likamba kuti: “Chifukwa cha kukambiskana, vinthu vifiskika.” (Nthanthi 20:18) Mwaviyo, mugwiriskiyengi ntchitu fundu za mu Bayibolu kuti zikuwovyeningi kusankhiya limoza vinthu vakukhumbika.—Nthanthi 8:32, 33.

VO MUNGACHITA:

• Mukambiyengi munthu yo mukutolana nayu maŵanaŵanu nginu kweniso mo muvwiya

• Mwechendazomeri kuchita chinthu chinyaki chechosi, mukambiyengi dankha munthu yo mukutolana nayu