Akaboni aku Yehova agwira ntchitu yakukhumbika ukongwa kuti awovyi ŵanthu mu vyaru vakujumpha 200. Kweni pa vyaru venivi ndi vyaru 35 pe vo vilonde chovyu chakukwana kuti alipiriyi vinthu vakukhumbika. Kumbi tigwiriskiya wuli ntchitu ndalama kuti ziwovyi mu vyaru vikavu?

 Wupu Wakulongozga wa Akaboni aku Yehova uŵanaŵaniya vo Akaboni aku Yehova pacharu chosi akhumbika kuti alutirizgi kusopa Yehova kweniso kupharazga. Yiwu agwiriskiya ntchitu ndalama mwakwenere. Mwakuyeruzgiyapu, asani ofesi ya nthambi yalonde ndalama zinandi kuluska zo zikhumbika kuti zigwiriskikiyi ntchitu pa vakuchitika vinyaki, ndalama zo zajaku atizitumiza so ku vyaru vinyaki ko kukhumbika chovyu. Ndondomeku yeniyi yiyanana waka ndi vo vachitikanga munyengu ya Akhristu akwambiriya wo awovyananga “ndi chilatu chakuti paŵi kuyanana.” (2 Akorinto 8:14) Yiwu agwiriskiyanga ntchitu ndalama zinandi zo ŵenga nazu kuti ziwovyi pa kupereŵere kwa Akhristu wo ŵenga ndi zimanavi.

 Kumbi abali wo alonde ndalama kutuwa ku maofesi nganyaki nga nthambi atuvwa wuli? Yiwu akondwa ukongwa. Mwakuyeruzgiyapu, ku Tanzania, ŵanthu akujumpha hafu ya chiŵerengeru cha ŵanthu asaniya ndalama yimana ukongwa pa zuŵa. Mwaviyo, ndalama zo ofesi ya nthambi yinyaki yingutumiza mu charu ichi zinguwovya kuti anozge Nyumba ya Ufumu ya mpingu wa Mafinga. Abali mu mpingu uwu angulemba kuti: “Kutuwa waka po tikunozge Nyumba yidu ya Ufumu, chiŵerengeru cha ŵanthu wo atuza ku maunganu chakwera ukongwa! Titiliwonga ukongwa gulu laku Yehova kweniso abali ndi azichi pacharu chosi chifukwa cha mtima wawu wakupaska. Venivi vatiwovya kuti tije ndi malu ngakutowa ngakusopiyapu.”

 Anyaki mwa abali ŵidu ku Sri Lanka ŵengavi chakurya chakukwana chifukwa cha mulili wa COVID-19. Mzichi Imara Fernando ndi mwana waki munthulumi zina laki Enosh, mbamoza mwa abali ŵenaŵa. Kweni yiwu awonga ukongwa chovyu cho angulonde cho chingutuwa mu vyaru vinyaki. Mu kalata yo angulemba yiwu angukamba kuti: “Titiŵawonga ukongwa abali ndi azichi wo angutilongo chanju pa nyengu yakusuzga yeniyi. Tikondwa ukongwa kuja mu banja la pacharu chosi la abali ndi azichi ndipu tipempha Yehova kuti walutirizgi kuwovya abali ndi azichi wosi mu mazuŵa nganu ngakumaliya.”

 Abali ndi azichi ŵidu kwekosi ko ŵali, mbakukhumbisisa kugaŵiyaku anyawu vo ŵenavu. Mwakuyeruzgiyapu, Enosh, wakupanga kabokosi kakuti wasungengemu ndalama ndi chilatu chakuti wawovye ŵanthu wo akhumbika chovyu. Guadalupe Álvarez nayu walongo mzimu wakupaska. Iyu waja kuchigaŵa chinyaki cha ku Mexico ko ŵanthu amanavi ŵaka ndiwu alonde ndalama yikulu. Chinanga kuti ve viyo, nayu wapereka ndalama yo wangafiska. Iyu wangulemba kuti: “Nditimuwonga ukongwa Yehova chifukwa cha lisungu kweniso chanju chaki chambula kumala. Ndiziŵa kuti ndalama zo ndipereka zisazgikengi pamoza ndi za ŵanthu anyaki ndipu ziŵawovyengi abali ndi azichi wo akhumbika chovyu.”

 Abali ku maofesi nga nthambi ngo ngatumiza ndalama ku malu ko kukhumbika chovyu nawu akondwa ukongwa. Mubali Anthony Carvalho yo wateŵete mu Komiti ya Nthambi ku Brazil wangukamba kuti “Kwa vyaka vinandi, kuti ntchitu yakupharazga yigwiriki umampha mucharu chidu pakukhumbika ndalama. Chovyu cho abali ku vyaru vinyaki angutitumiziya chingutiwovya ukongwa. Pasonu panu nasi ofesi yidu ya nthambi ye ndi ndalama zakukwana ndipu nasi titovya so ŵanthu anyaki. Abali ndi azichi ŵidu aziŵa kukhumbika kwa ntchitu yakupharazga pacharu chosi ndipu awona kuti ndi mwaŵi kutumiza ndalama ku ofesi ya nthambi mucharu chinyaki ko kukhumbika chovyu.”

 Kumbi Akaboni aku Yehova angaŵawovya wuli abali ndi azichi ŵawu wo akhumbika chovyu? Angachita venivi mwa kupereka ndalama kuti ziwovyi pa ntchitu yapacharu chosi. Ndipu angapereka ndalama izi mumabokosi ngo nge mu Nyumba za Ufumu ngo ngakulembeka kuti “Ntchitu Yapacharu Chosi” pamwenga kuziya pa donate.jw.org. Tiwonga ukongwa chifukwa cha ndalama zo mupereka.