Julani

BAYIBOLU LISINTHA ŴANTHU

Sonu Ndiwona Kuti Ndingawovya Ŵanthu Anyaki

Sonu Ndiwona Kuti Ndingawovya Ŵanthu Anyaki
  • NDIKUWA MU: 1981

  • CHARU CHO NDIKUWIYA: GUATEMALA

  • MBIRI YANGU: NDINGUKUMANA NDI MASUZGU NGAKULU NDECHE MWANA

UMOYU WANGU WAKALI:

Ndikuwiya mutawuni ya Acul yo ye kuchigaŵa chamapiri kuzambwi kwa charu cha Guatemala. Apapi ŵangu ŵenga a fuku la Ixil lo likutuliya mumtundu wa Amaya. Kusazgiyapu pa Chisipanishi cho ndalongoronga, ndalongoronga so chineneru chakumuzi cho ndinguchiziŵa ndeche mwana. Ndichikuwa ndipu ku Guatemala kuchitika nkhondu yakofya ukongwa ya mafuku. Nkhondu iyi yinguchitika kwa vyaka 36 ndipu ŵanthu anandi afuku lidu angufwa pa nkhondu yeniyi.

Pa nyengu yo ndenga ndi vyaka vinayi, mku wangu yo wenga ndi vyaka7, zuŵa linyaki waseŵeresanga bomba lo lingumuphulikiya mwangozi. Masu ngangu ngangunangikiya penapa ndipu ndinguleke penipo kuwona chifukwa cha ngozi yeniyi. Vachitima kuti mku wangu wakufwa pa ngozi yeniyi. Pavuli paki, ndinguchiyamba sukulu ya ŵana ambula kuwona, mutawuni ya Guatemala. Kwenuku ndiku ndingusambira kuŵerenga mabuku nga ŵanthu ambula kuwona. Kweni penga chinthu chinyaki cho chandiziziswanga. Wo atiwoneriyanga akhumbanga cha kuti ini ndichezengi ndi ŵana asukulu anyangu ndipu ŵana asukulu anyangu nawu andikhumbanga cha. Kanandi ndasanirikanga kuti nde ndija ndipu ndachitanga phukwa ukongwa, mwakuti myezi yiŵi ya holidi yo atipaskanga chaka chechosi ndawonanga nge kuti yiswera kuti ndiluti kunyumba kuchiwona ama ŵangu wo andiyanjanga ukongwa. Vachitima so kuti nawu angufwa nde ndi vyaka 10. Yapa ndinguchita chitima chikulu ukongwa chifukwa ndingusiyana ndi munthu yo wandiyanjanga ukongwa kuluska munthu munyaki weyosi pacharu.

Ndati ndafika vyaka 11, ndinguwere so kwidu ko ndajanga ndi mku wangu munyaki ndi banja laki. Andiphweriyanga nadi mwakuliŵavu ndipu andipaskanga chechosi chakukhumbika, kweni ndasuzgikanga mbwenu maŵanaŵanu. Nyengu zinyaki ndaliyanga ndipu ndafumbanga Chiuta mupempheru kuti: “Ntchifukwa wuli ama ŵangu akufwa? Ntchifukwa wuli ndikuja wambula kuwona?” Ŵanthu andikambiyanga kuti masuzgu ngosi ngenanga lenga khumbu laku Chiuta. Ndingwamba kuja ndi maŵanaŵanu ngakuti Chiuta watoliyaku kanthu cha masuzgu ngo ndakumananga nangu kweniso ndawonanga kuti wachita vinthu mwambula urunji. Ndakhumbanga kujibaya kweni yandisoŵanga waka nthowa yakuti ndichitiyi venivi.

Chifukwa chakuti nde wambula kuwona, ndasuzgikanga maŵanaŵanu ukongwa chifukwa ndawonanga kuti nde wambula kuvikilirika ku nkhaza zakupambanapambana. Pa nyengu yo ndenga mnyamata, ŵanthu akundikoleriyapu kananandi waka kweni ndikukambiyapu weyosi cha chifukwa ndawonanga kuti palivi yo watingi wandiwovyengi. Ŵanthu ayanjanga cha kulongoro nani ndipu nani ndayanjanga cha kulongoro ndi ŵanthu. Kanandi ndajipatuwanga ndipu palivi munthu yo ndamugomezganga.

MO BAYIBOLU LINGUSINTHIYA UMOYU WANGU:

Ndati ndafika vyaka 13, banja linyaki la Akaboni aku Yehova linguza kusukulu kwidu pa nyengu yakupumuwa ndipu angukambiskana nani. Chifukwa chakuchita chitima ndi mo vinthu venge pa umoyu wangu, msambizi widu munyaki munthukazi ndiyu wangupempha banja lenili kuti lizikumani nani. Yiwu angundikambiya layizgu la mu Bayibolu lakuti akufwa azamuyuka ndipuso kuti ambula kuwona nawu azamukwamba kuwona. (Yesaya 35:5; Yohane 5:28, 29) Vo andisambizanga vandifikanga pa mtima limu kweni suzgu yenga yakuti ndafwatukanga cha kulongoro nawu chifukwa ndinguziŵiriya kuleka kulongoro ndi ŵanthu. Chinanga kuti venga viyo, yiwu avitoliyanga kanthu cha. Achitanga nani vinthu mwaulemu ndipuso mwakuzikira ndipu ayesesanga kuza kunyumba kuti andisambizengi Bayibolu. Ayendanga mtunda wa makilomita 10 kutuwa kwawu kuzifika kwidu.

Mku wangu wangundikonkhoske umampha mo ŵanthu yaŵa awonekiyanga. Iyu wangukamba kuti Akaboni ŵenaŵa avwalanga umampha chinanga kuti awonekanga kuti mbakavu. Kweni ini vandisuzganga mbwenu kulongoro nawu mwakufwatuka. Yiwu angukunthiyapu nani ndipu andiyanjanga ukongwa mwakuti nyengu zinyaki andipingiyanga timphasu. Yapa ndingwamba kuwona kuti Akhristu auneneska pe ndiwu angaŵa ndi mtima wakujipereka viyo.

Ndasambiranga Bayibolu mwakugwiriskiya ntchitu mabuku nga vilembu va ŵanthu ambula kuwona. Ndavwisanga nadi vo ndasambiranga kweni penga vinthu vinyaki vo ndatondekanga kuvizomereza. Mwakuyeruzgiyapu, vandisuzganga kuzomereza kuti Chiuta watindiŵanaŵaniya nani nge munthu pakundija, kweniso ndakayikanga kuti pangasanirika ŵanthu anyaki wo angandiwovya kuti ndiziŵi mo Chiuta watindiwone. Ndinguvwisa nadi chifukwa cho Yehova wazomereze kuti vinthu viheni vichitikengi pacharu, kweni ndasuzgikanga kugomezga kuti Yehova wangaja nadi Ada achanju. *

Kweni mukuluta kwa nyengu, vo ndasambiranga mu Bayibolu vingundiwovya kuti ndisinthi maŵanaŵanu ngangu. Mwakuyeruzgiyapu, ndingwamba kuwamu kuti Chiuta watiŵavwiya chitima ukongwa ŵanthu wo asuzgika. Pakukamba za ateŵeti ŵaki wo atombozgekanga, iyu wangukamba kuti: “Ndawona nadi masuzgu ngo ŵanthu ŵangu . . . akumana nangu ndipu . . . ndiziŵa umampha mo apwetekeke.” (Ekisodo 3:7) Ndati ndavwisa mijalidu yamampha ukongwa yo Yehova wenayu, ndingujipaturiya kwaku iyu. Mu 1998, ndingubatizika nge Kaboni waku Yehova.

Yapa nde ndi mku wangu yo wangundito kuti ndijengi nayu

Pati pajumpha pafufupi chaka chimoza kutuliya po ndingubatizikiya, ndinguchiyamba sukulu ya ŵanthu ambula kuwona, pafupi ndi tawuni ya Escuintla. Mura munyaki mumpingu widu wawonanga mo ndasuzgikiyanga kuti nkhasaniriki pa maunganu. Mpingu wo wenga kufupiku wenga kumapiri ko kwatuliyanga banja lo landisambizanga Bayibolu, so kwandiŵiyanga kutali kuti nkhawunganengi kweniko. Mwaviyo, abali ŵara angupempha banja linyaki kuti ndilu ndijengi nalu kuti ndisanirikengi pa maunganu. Mpaka msanawale wunu, banja lenili leche kundisunga nge mwana wawu chayiyu.

Pe vinandi vamampha vo abali ndi azichi andichitiya pa umoyu wangu, mwakuti lumwi lingachisere asani ndingakonkhoska chimoza ndi chimoza. Kweni kukamba mwakudumuwa, po ndiliri panu songu nge Kaboni waku Yehova ndisimikiza ndi mtima wosi kuti nde pakati pa Akhristu auneneska nadi.—Yohane 13:34, 35.

VITUMBIKU VO NDASANIYA:

Sonu ndikuleka kujiwona kuti nde munthu wambula kukhumbika. Kweniso ndikuwamu kuti pe vinandi vo ndingachita pa umoyu wangu. Mwakuyeruzgiyapu, ndigwiriskiya ntchitu nyengu yangu yinandi pakusambiza ŵanthu Bayibolu. Venivi vitindiwovya kuti ndilekengi kudandawula ukongwa ndi masuzgu nga paliŵavu langu. Kweniso nditeŵete nge mura ndipu kanandi ndikamba nkhani zakutuliya mu Bayibolu mumpingu widu kweniso mumipingu yinyaki. Ndikamba so nkhani pa maunganu ngakulungakulu.

Ndikamba nkhani mwakugwiriskiya ntchitu Bayibolu la vilembu va ŵanthu ambula kuwona

Mu 2010, ndingusere sukulu ya MTS (yo sonu yidanika kuti Sukulu ya Apharazgi a Ufumu) yo yichitikiya ku El Salvador. Sukulu yeniyi yikundiwovya ukongwa kuti ndichitengi umampha ntchitu za mpingu. Kusere sukulu iyi kungundiwovya so kuwona kuti Yehova ndi Chiuta wachanju nadi, yo wafiska kusambiza weyosi yo wakhumba kuti wagwiri ntchitu yaki.

Yesu wangukamba kuti: “Kupaska kuchitiska kuti munthu wakondwengi ukongwa kuluska kulonde.” (Machitidu 20:35) Panu sonu ndikamba mwakutuliya pasi pa mtima kuti ndikondwa ukongwa chinanga kuti kali ndawonanga kuti vingachitika cha kukondwa viyo.

^ ndimi 13 Kuti muziŵi vinandi pa nkhani yakuti ntchifukwa wuli Chiuta wazomereza kuti vinthu viheni vichitikengi pacharu, wonani mutu 11 mubuku lakuti Kumbi Bayibolo Lisambizanji Weniukongwa?, lakupharazgika ndi Akaboni aku Yehova.