Ziŵani Mijalidu Yaku Yehova
Ziŵani Mijalidu Yaku Yehova
“Muŵi ŵakumwezga Chiuta, uli mbana ŵakwanjiwa.”—ŴAEF. 5:1.
KUMBI MUNGAMUKA WULI?
Kumbi tingachita wuli kuti tiziŵi mijalidu yaku Yehova?
Nchinthu wuli cho chichitiska munthu kuja wakufikirika?
Kumbi tingachita wuli kuti tije ndi jalidu laku Yehova lambula sankhu?
1. (a) Kumbi Mkhristu wakhumbika kuŵanaŵaniya mijalidu niyi yaku Yehova? (b) Kumbi tiyanduwengi wuli asani tisanda mijalidu yaku Chiuta?
ASANI muŵanaŵana za mijalidu yaku Yehova, kumbi mukumbuka mijalidu niyi? Tanandi tikumbuka chanju, urunji, zeru ndi nthazi. Kweni Yehova we ndi mijalidu yinandi yamampha. Kukamba uneneska, tikhoza kuzumbuwa mijalidu yakujumpha 40 yaku Yehova ndipu jalidu lelosi likukonkhoskeka m’mabuku ngidu. Ŵanaŵaniyani mijalidu yakukondwesa yaku Yehova, yo tingayisaniya pakuchita sambiru la pakutija ndipuso pa kusopa kwa pabanja. Kumbi tingayanduwa wuli ndi sambiru la viyo? Vingachitiska kuti tiŵaziŵi ukongwa Auskefwi akuchanya. Asani timuziŵengi ukongwa Yehova, tikhumbisiskengi kuja nayu pa ubwezi ndipuso timuyezgengi.—Yos. 23:8; Sumu 73:28.
2. (a) Konkhoskani mo tingaziŵiya mijalidu yaku Yehova. (b) Kumbi tikambiskanengenji?
2 Kumbi mungachita wuli asani mukhumba kuziŵa chinthu chinyaki? Tiyeruzgiyi kuti mukhumba kuyesa chakurya cho mwechendaryepu. Chakwamba, mungaziŵa kuti nchakunowa asani mwavwa ŵaka mo chinunkhiriya ndipu pavuli paki, mutichilaŵa. Asani mwawona kuti nchakunowa, mubika mwija. Mwakuyanana ŵaka, tingaliziŵa umampha jalidu laku Yehova asani tiŵanaŵaniya za jalidu lo ndipu pavuli paki titiligwiriskiya nchitu pa umoyu widu. (Ŵaef. 5:1) Chilatu cha nkhani iyi ndipuso zinyaki ziŵi zakulondopu nchakuti, tiziŵi mijalidu yaku Chiuta yo kanandi titiyiŵanaŵaniya cha. Pa jalidu lelosi, tikambiskanengi mo Yehova watililongole ndipuso mo tingamuyezge.
YEHOVA NGWAKUFIKIRIKA
3, 4. (a) Kumbi mungamuziŵa wuli munthu wakufikirika? (b) Kumbi Yehova watitisimikizgiya wuli kuti ngwakufikirika?
3 Chakwamba tiyeni tikambiskani jalidu lakufikirika. Kumbi mungamuziŵa wuli munthu wakufikirika? Mungakamba kuti, munthu wakufikirika ‘waja walisungu, wambula kusuzga kukambiskana nayu ndipuso wakuchezgeka.’ Mungaziŵa kuti munthu ngwakufikirika pamwenga cha, mwakuvwa vo waŵereŵeta kweniso mo chisku chaki chiwoneke asani waŵereŵeta.
4 Kumbi Yehova walongo wuli kuti ngwakufikirika? Chinanga kuti ngwanthazi zosi ndipuso ndi Mulengi wa chilengedu chosi, Yehova watitisimikizgiya kuti wakhumbisiska kuvwisiya marombu ngidu ndipuso kungamuka. (Ŵerengani Sumu 145:18; Yesaya 30:18, 19.) Tingakambiskana ndi Chiuta kwa nyengu yitali, kwekosi ko tingaŵa ndipuso nyengu yeyosi. Tingamufikiya mwambula kusuzga chifukwa tiziŵa kuti wangatikwiyiya cha. (Sumu 65:2; Yak. 1:5) Bayibolo litimukonkhoska Yehova nge munthu kuti ŵanthu akambiskanengi nayu mwakufwatuka. Mwakuyeruzgiyapu, wakulemba sumu Davidi, wakulemba kuti, “masu nga Ambuya [Yehova] nge” paku isi ndipuso kuti ‘janja laki lamaryi latikoreze.’ (Sumu 34:15; 63:8) Mchimi Yesaya wanguyeruzgiya Yehova ndi mliska mwakukamba kuti: “Wakawunjikanga twana mbereri mumanja ngaki wakatinyamuwanga pa chifuŵa chaki.” (Yes. 40:11) Venivi vakukondwesa ukongwa! Yehova wakhumba kuti tindere kufupi ukongwa ndi iyu nge mo kachitiya kamwana ka mbereri pachifuŵa cha mliska wachanju. Te ndi Awuskefwi akufikirika ukongwa! Kumbi tingamuyezga wuli Yehova pa jalidu lenili?
JALIDU LAKUKHUMBIKA UKONGWA KWA ŴARA
5. Nchifukwa wuli ŵara akhumbika kuja akufikirika?
5 Pambula kuswera yapa, abali ndi azichi a muvyaru vakupambanapambana, angufumbika kuti, “Kumbi ndi jalidu nili lo mukhumba kuti ŵara ajengi nalu?” Abali ndi azichi anandi angumuka kuti, “kufikirika.” Kukamba uneneska, Mkhristu weyosi wakhumbika kuja ndi jalidu lenili nyengu zosi kweni ukongwa ŵara. (Yes. 32:1, 2) Mzichi munyaki wangukamba chifukwa cho jalidu lenili ndakukhumbika ukongwa, iyu wangukamba kuti: “Tingayanduwa ndi jalidu linyaki lelosi lamampha lo mura wangaŵa nalu pijapija asani ngwakufikirika.” Kumbi muwona kuti vo wangukamba mzichi uyu vauneneska? Nchinthu wuli cho chichitiska munthu kuja wakufikirika?
6. Kumbi mura wakhumbika kuchitanji kuti waje wakufikirika?
6 Kuti munthu waje wakufikirika, wakhumbika kulongo kuti watanja ŵanthu. Asani mura watanja abali ndi azichi ŵaki kusazgapu ŵana ndipu ngwakunozgeka kuŵawovya, yiwu aziŵengi kuti mura yo we ndi jalidu lakufikirika. (Marko 10:13-16) Carlos wa vyaka 12 wakukamba kuti, “Asani ndiwona ŵara amwemwete ndipuso achita vinthu mwachanju ndi ŵanthu mu Nyumba ya Ufumu, vitindichitiska kuti ndiŵayanjengi ukongwa.” Kukamba uneneska, nkhwakukwana cha kuti mura wakambengi kuti we ndi jalidu lakufikirika, kweni wakhumbika kuti walilongongi. (1 Yoh. 3:18) Kumbi mura wangachita wuli venivi?
7. Nchifukwa wuli kanandi kuvwala baji la unganu kuchitiska kuti tiyambi kukambiskana ndi ŵanthu, nanga tingasambiranjipu?
7 Ŵanaŵaniyani chakuyeruzgiyapu ichi. Pambula kuswera yapa, mubali wanguluta ku unganu wo unguchitikiya ku charu chinyaki. Wachiweku wanguvwala baji lo lenga ndi mutu wa unganu wakuti, ‘Ufumu Waku Chiuta Uzi!’ Yo watovya ŵanthu mu ndegi wati waŵerenga baji lo, wangukambiya mubali yo kuti, “Uzi nadi, titenere kukambiskana fundu zinyaki pa nkhani yeniyi.” Ŵati akambiskana, munthu yo wangukondwa ukongwa kulonde magazini. Tanandi takumanapu ndi venivi. Nchifukwa wuli baji la unganu kanandi lichitiska kuti tiyambi kukambiskana ndi ŵanthu? Chifukwa lija nge likambiya ŵanthu kuti: “Jani akufwatuka kukambiskana nani. Ndifumbeni ko ndiluta.” Baji, liziŵiska ŵanthu kuti te akunozgeka kuŵakambiya vo tigomezga. Mwakuyanana ŵaka, ŵara achikhristu akhumbika kuja nge baji kuti akambiyengi Akhristu anyawu kuti: “Jani akufwatuka kukambiskana nani.” Kumbi yiwu angachita wuli venivi?
8. Kumbi ŵara alongo wuli kuti atanja abali ndi azichi, ndipu venivi vitiŵakwaska wuli abali ndi azichi mu mpingu?
8 Mbuneneska kuti midawuku yipambana mu vyaru vinandi, kweni kanandi asani titiŵamwemwete abali ndi azichi, titiŵapaska moni wa mumanja ndipuso titiŵatawuzga mwachanju tilongo kuti titiŵayanja ukongwa. Kumbi ndiyani wakhumbika kwamba kuchita viyo? Wonani vo Yesu wanguchita. Bayibolo likamba kuti panyengu yo Yesu wangukumana ndi akusambira ŵaki, iyu “wanguza, wangulongoro nawu.” (Mat. 28:18) Mwakuyanana ŵaka, ŵara ndiwu ayambengi kukambiskana ndi abali kweniso azichi. Kumbi venivi vingaŵakwaska wuli abali ndi azichi mu mpingu? Muzichi munyaki wa vyaka 88, yo wachita upayiniya wangukamba kuti: “Asani ŵara atindimwetuliya ndi kundichiska panyengu yo ndisere mu Nyumba ya Ufumu, vitindichitiska kuti ndiŵayanjengi.” Muzichi munyaki wakugomezgeka wangukamba so kuti: “Chinanga kuti chingawoneka nge chinthu chimana, kweni asani mura wamwemwete pakundilondere ku ma unganu, nchinthu chakukhumbika ukongwa kwaku ini.”
MUJENGI AKUFIKIRIKA
9, 10. (a) Kumbi Yehova walongo chakuwoniyapu wuli chamampha? (b) Kumbi ŵara angalongo wuli kuti mbakufikirika?
9 Kukamba uneneska, asani tikhumba kuti abali ndi azichi akambengi nasi mwakufwatuka, tikhumbika kusaniya nyengu yakukambiskana nawu. Yehova, nchakuwoniyapu chamampha pa nkhani iyi. Iyu “we kutali cha kwaku yosi waku ifwi.” (Mac. 17:27) Ŵara angalongo kuti mbakufikirika asani asaniya nyengu yakukambiskana ndi abali kweniso azichi, ŵara ndi anamana, mawunganu ngechandayambi ndipuso asani ngamala. Mubali munyaki yo wachita upayiniya wangukamba kuti: “Asani mura watuma panyengu yo watinditawuzga ndipu wavwisiya vo ndimuka, ndiwona kuti nde wakukhumbika.” Muzichi munyaki yo waja wachiteŵete Yehova kwa vyaka pafupifupi 50, wangukamba kuti: “Asani ŵara asaniya nyengu yakukambiskana nani pakumaliya pa unganu, ndiwona kuti nde wakukhumbika.”
10 Mbuneneska kuti aliska achikhristu akhumbika kuchita nchitu zinyaki, kweni chinthu chakwamba, akhumbika kusaniya nyengu yakuchezge ndi abali kweniso azichi asani ŵe pa mawunganu.
YEHOVA WALIVI SANKHU
11, 12. (a) Kumbi kuŵavi sankhu kung’anamuwanji? (b) Kumbi Bayibolo lilongo wuli kuti Yehova walivi sankhu?
11 Kuŵavi sankhu ndi jalidu linyaki lo Yehova wenalu. (Mac. 10:34) Kumbi kuŵavi sankhu kung’anamuwanji? Kung’anamuwa kuchitiya ŵanthu vinthu mwambula kwanjiya. Kweni asani tikhumba kuchita vinthu mwambula kwanjiya, chakwamba tikhumbika kugomezga kuti ŵanthu wosi akhumbika kuŵachitiya vinthu mwakuyanana. Munthu wambula sankhu, watanja ŵanthu chifukwa cha mo awoneke cha pamwenga kuŵayanja chifukwa chakuti mbakukhupuka. Iyu watanja ŵanthu wosi mwambula kuphwere kanthu mo aliri.
12 Yehova nchakuwoniyapu chamampha ukongwa pa nkhani ya kuŵavi sankhu. Mazu ngaki ngakamba kuti iyu ndi “mrumbachisku cha.” (Ŵerengani Machitidu 10:34, 35; Marangu 10:17.) Nkhani yinyaki yo yinguchitika mu nyengu yaku Mosese, yilongo fundu yeniyi.
13, 14. (a) Kumbi ŵana ankhondi anthukazi aku Zelofehada angukumana ndi suzgu wuli? (b) Kumbi Yehova wangulongo wuli kuti walivi sankhu?
13 Ayisraele ŵechendasere m’Charu Chakulayizgika, ŵana anthukazi ankhondi aku Zelofehada angukumana ndi suzgu. Kumbi yenga suzgu wuli? Awiskewu angufwa ndipu yiwu atingi aharengi cha malu nga awiskewu. Chifukwa wuli? Chifukwa mwakukoliyana ndi Chilangulu, ŵana anthurumi pe ndiwu aharanga malu. Kweni awiskewu angufwa kwambula mwana munthurumi. (Maŵ. 26:33, 52-55) Kumbi malu ngenanga ngatingi ngaperekekengi kwa abali ŵa awiskewu? Kumbi ŵana anthukazi aku Zelofehada anguchitanji?
14 Ŵana ankhondi ŵenaŵa, anguluta kwaku Mosese ndi kumufumba kuti: “Chifukwa nchine likatuzgikangamu zina la uskefwi mu mbumba yaki, kumbi chifukwa nchakuti po wengavi mwana munthurumi?” Yiwu angupempha kuti: “Tipaskeni chihara mukati mu ŵabali ŵa awuskefwi.” Kumbi Mosese wangukamba kuti ‘palivi dangu lo likamba venivo’? Awa! Iyu “wangupereka mlandu wawu paurongo pa Ambuya.” (Maŵ. 27:2-5) Kumbi Yehova wangumukanji? Iyu wangukambiya Mosese kuti: “Ŵana ŵaku Zelofehada ŵarunjika; uŵapaski chigaŵa cha chihara mukati mu abali ŵa awiskewu ndipu uwezge chihara cha awiskewu kwaku yiwu.” Iyu wangukambiya Mosese kuti vo ŵana yaŵa angupempha viŵikiki m’Chilangulu, Yehova wangulutirizga kukamba kuti: “Asani munthu wafwa, wambura mwana munthurumi, ukawezgiyanga chihara chaki ku mwana waki munthukazi.” (Maŵ. 27:6-8; Yos. 17:1-6) Kutuliya pa nyengu yeniyi, anthukazi wosi achiyisraele wo atingi akumanengi ndi suzgu nge yeniyi, atingi alondiyengi chihara.
15. (a) Kumbi Yehova wachita wuli vinthu ndi ŵanthu ŵaki wosi, kusazgapu wo alivi wakuŵamiya? (b) Kumbi ndi nkhani nizi zinyaki zo ze m’Bayibolo, zo zilongo kuti Yehova walivi sankhu?
15 Vo Yehova wanguchita vingulongo kuti iyu ngwalisungu ndipuso walivi sankhu. Yehova wanguŵachitiya mwaulemu anthukazi ŵenaŵa, wo ŵengavi munthu wakuŵamiya, nge mo wachitiyanga ndi Ayisraele wosi wo ŵenga ndi ŵanthu akuŵamiya. (Sumu 68:5) Iyi ndi nkhani yimoza mwa nkhani zinandi zo ze m’Bayibolo, zo zilongo uneneska wa fundu yakuti, Yehova wachitiya vinthu ateŵeti ŵaki wosi mwambula sankhu.—1 Sam. 16:1-13; Mac. 10:30-35, 44-48.
TIKHOZA KUJA NDI MIJALIDU YAKU YEHOVA
16. Kumbi tingachita wuli kuti nyengu zosi tijengi ndi jalidu lambula sankhu?
16 Kumbi tingachita wuli kuti tije ndi jalidu laku Yehova lambula sankhu? Kumbukani kuti, asani tikhumba kuchita vinthu mwambula kwanjiya, chakwamba tikhumbika kugomezga kuti ŵanthu wosi akhumbika kuŵachitiya vinthu mwakuyanana. Kukamba uneneska, tosi titanja kuŵanaŵana kuti ndisi akufwatuka ndipuso tilivi sankhu. Mungazomerezga kuti nkhwakusuzga kujisanda mwauneneska mo tiwone ŵanthu anyaki. Kumbi tingachita wuli kuti tiziŵi asani ŵanthu atitiwona kuti ndisi ambula sankhu? Pa nyengu yo Yesu wakhumbanga kuziŵa mo ŵanthu amuwoniyanga, iyu wangufumba mabwezi ngaki ngakugomezgeka kuti: Kumbi “ŵanthu atiti Mwana wa munthu ndi yani?” (Mat. 16:13, 14) Tingachita umampha kulondo chakuwoniyapu chaku Yesu. Mungafumba munyinu yo mutimugomezga kuti wakukambiyeni mwauneneska asani ŵanthu akamba kuti mulivi sankhu. Kumbi mutenere kuchitanji asani mubwezi winu watikukambiyani kuti nyengu zinyaki mutanja ŵanthu a mtundu unyaki kuruska a mtundu unyaki, mutanja ŵanthu akukhupuka kweniso akusambira ukongwa? Mukhumbika kumukambiya Yehova mo muvwiya, mupempheni kuti wakuwovyeni kusintha maŵanaŵanu nginu, kuti nyengu zosi mulongongi jalidu laku Yehova lambula sankhu.—Mat. 7:7; Ŵakol. 3:10, 11.
17. Kumbi tingalongo wuli kuti tilivi sankhu?
17 Mu mpingu wachikhristu, tilongo kuti tikhumba kuja ndi jalidu lambula sankhu nge Yehova mwakulongo ulemu ndipuso chanju ku abali ndi azichi ŵidu. Mwakuyeruzgiyapu, asani tikhumba kudaniya ŵanthu kunyumba kwidu, tikhumbika kudana Akhristu a mitundu yosi kusazgapu a midawuku yakupambana ndi yidu, asawuchi, wo apapi ŵawu akutayika kweniso vyoko. (Ŵerengani Ŵagalatia 2:10; Yakobe 1:27.) Kusazgiyapu pa venivi, asani te mu uteŵeti, tisankha cha pakupharazga uthenga wamampha wa Ufumu, tipharazga chinanga nkhu wo atuliya vyaru vinyaki. Tikondwa ukongwa chifukwa chakuti mabuku ngakukonkhoska Bayibolo ngasanirika mu vineneru vakujumpha 600. Uwu mbukaboni wakuwoneke limu kuti tilivi sankhu!
18. Kumbi imwi mutenere kuchitanji asani muŵanaŵaniya kuti Yehova ngwakufikirika ndipuso ngwambula sankhu?
18 Kukamba uneneska, asani tija ndi nyengu yakuŵanaŵaniya kuti Yehova ngwakufikirika ndipuso walivi sankhu, vitichitiskengi kuti timuziŵi ukongwa. Asani tamuziŵa, tilondongi mijalidu yaki nyengu zosi, tiyigwiriskiyengi nchitu pakuchita vinthu ndi Akhristu anyidu kweniso ŵanthu wo titiŵapharazgiya.
[Mafumbu]
[Chithuzi papeji 7]
[Chithuzi papeji 8]
“Ambuya ŵe pafupi kwaku wosi wo atiŵadana.”—Sumu 145:18 (Wonani pa ndimi 9)
“Ambuya [Yehova] Chiuta winu . . . walereska chisku cha munthu cha.”—Mar. 10:17 (Wonani pa ndimi 17)
[Chithuzi papeji 10]
Ŵana anthukazi aku Zelofehada anguziŵa kuti Chiuta ngwambula sankhu (Wonani pa ndimi 13, 14)
