Julani

Lutani pa vo ve mukati

 NKHANI YAKUSAMBIRA YA NAMBALA 3

Mwe Akuzirwa Kwaku Yehova Chiuta Winu!

Mwe Akuzirwa Kwaku Yehova Chiuta Winu!

“Iyu wangutikumbuka po tenga akuyuyulika.”​—SUMU 136:23.

SUMU 33 Thuliya Yehova Mphingu Yaku

VO TISAMBIRENGI MU NKHANI IYI *

1-2. Kumbi ateŵeti anandi aku Yehova akumana ndi masuzgu wuli, nanga masuzgu ngenanga ngatiŵakwaska wuli?

ŴANAŴANIYANI vakuyeruzgiyapu vitatu ivi: Mubali wachinyamata amusaniya ndi matenda ngo ngamala nthazi munthu kamanakamana. Mubali wavyaka vakujumpha 50 akumutuzga ntchitu ndipu watondeka kusaniya yinyaki chinanga kuti wayesesa kupenja. Mzichi wakukota watondeka kuchita vo wachitanga kali pakuteŵete Yehova.

2 Asani namwi mukumana ndi vinthu venivi, mungajiwona kuti mwe ambula kukhumbika. Vinthu ivi vingakuchitiskani kuti muleki kukondwa, mujiwonengi kuti mwe aŵakaŵaka kweniso vingachitiska kuti ubwezi winu ndi anyinu uleki kwenda umampha.

3. Kumbi Satana kweniso wo atoliyaku maŵanaŵanu ngaki, atiwuwona wuli umoyu wa ŵanthu?

3 Mucharu ichi, ŵanthu ŵe ndi maŵanaŵanu ngaku Satana pa nkhani ya mo awone umoyu wa ŵanthu. Kwamba kali, Satana wachita vinthu nge kuti ŵanthu mbambula kukhumbika. Iyu wangukambiya Heva kuti waŵengi mwanangwa asani wangaleka kuvwiya Chiuta, chinanga kuti waziŵanga kuti wafwengi asani wangachita viyo. Satana ndiyu walongozga amalonda, andali ndipuso avisopa. Mwaviyo, tizizwa cha kuti amalonda, andali ndi alongozgi avisopa anandi atumbika cha umoyu wa ŵanthu nge mo iyu wachitiya.

4. Kumbi tikambiskanengenji mu nkhani iyi?

4 Mwakupambana ndi Satana, Yehova wakhumba kuti tijiwonengi  kuti te akuzirwa ndipu watitiwovya asani takumana ndi masuzgu ngo ngangachitiska kuti tijiwonengi nge te aŵakaŵaka. (Sumu 136:23; Aro. 12:3) Nkhani iyi, yikonkhoskengi mo Yehova watitiwovye: (1) asani titama, (2) asani tisuzgika kusaniya ndalama ndipuso (3) asani titijiwona kuti palivi cho tingachita pakuteŵete Yehova chifukwa cha ukoti. Kweni chakwamba, tikambiskanengi vifukwa vo tisimikiziya kuti te akuzirwa kwaku Yehova.

TE AKUZIRWA KWAKU YEHOVA

5. Kumbi ndi vinthu wuli vo muwone kuti ŵanthu mbakuzirwa kwaku Yehova?

5 Chinanga kuti tikulengeka kutuliya ku fuvu kweni te akuzirwa ukongwa. (Chiya. 2:7) Tiyeni tikambiskani vifukwa vinyaki vo tikambiya kuti te akuzirwa kwaku Yehova. Iyu wakutilenga mu nthowa yakuti titoliyengeku mijalidu yaki. (Chiya. 1:27) Pakuchita viyo, Yehova wakutitumbika ukongwa kuphara vinthu vinyaki vosi vo wakulenga panu pasi. Ndipuso wakutipaska mazaza pa vinthu vosi vo wakulenga pacharu chapasi.​—Sumu 8:4-8.

6. Kambani chifukwa chinyaki cho tikambiya kuti ŵanthu ambula kufikapu mbakuzirwa kwaku Yehova.

6 Adamu wati wabuda, Yehova wanguleka cha kuwona kuti ŵanthu mbakuzirwa. Iyu watitiwona kuti te akuzirwa ukongwa mwakuti wangutipaska Mwana waki wakwanjiwa Yesu, nge sembi yakupepese maubudi ngidu. (1 Yoha. 4:9, 10) Chifukwa cha sembi yeniyi, Yehova wazamuyuska ŵanthu wo akufwa chifukwa cha ubudi waku Adamu, “arunji ndi ambula urunji” viyo. (Machi. 24:15) Mazu ngaki ngalongo kuti te akuzirwa kwaku iyu, kwali titama, tilivi ndalama pamwenga te akukota.​—Machi. 10:34, 35.

7. Kumbi ndi vifukwa vinyaki nivi vo ateŵeti aku Chiuta agomezge kuti mbakuzirwa kwaku iyu?

7 Pe so vifukwa vinyaki vo tigomezge kuti te akuzirwa kwaku Yehova. Iyu wakutiguza kuti tije ateŵeti ŵaki chifukwa wanguwona mo tinguchitiya tati tavwa uthenga wamampha. (Yoha. 6:44) Tati tayamba kundere kwaku Yehova, nayu wangundere kwaku isi. (Yako. 4:8) Yehova wapatuwa so nyengu yaki kuti watisambizi, kulongo kuti te akuzirwa kwaku iyu. Waziŵa mo tiliri ndipuso kuti tingasintha. Kweniso watitilanga chifukwa watitiyanja. (Nthanthi 3:11, 12) Wenuwu mbukaboni ukulu wakulongo kuti te akuzirwa kwaku Yehova!

8. Kumbi mazu nga pa Sumu 18:27-29, ngangakwaska wuli mo tiwone masuzgu ngidu?

8 Ŵanthu anyaki awonanga kuti Davidi ngwaŵakaŵaka. Kweni mweneku waziŵanga kuti Yehova wamuyanjanga ndipuso wamuwovyanga. Kuziŵa venivi kungumuwovya kuti wangawonengi mwakwenere masuzgu ngo wangukumana nangu. (2 Samu. 16:5-7) Asani tisuzgika maŵanaŵanu pamwenga takumana ndi masuzgu, Yehova wangatiwovya kuti tiwonengi vinthu mwakwenere. Iyu wangatiwovya so kuti tikweri mpanda, pamwenga kuti timalani ndi suzgu lelosi. (Ŵerengani Sumu 18:27-29.) Asani Yehova wenasi, palivi cho chingatitondekesa kumuteŵete mwalikondwa. (Aro. 8:31) Kumbi mphanyengu niyi ukongwa po tikhumbika kukumbuka kuti Yehova watitiyanja kweniso watitiwona kuti te akuzirwa? Tikambiskanengi vakuyeruzgiyapu vitatu.

ASANI TITAMA

Kuŵerenga mazu ngaku Yehova kungatiwovya kuti tileki kuŵa ndi maŵanaŵanu ngaheni ngo munthu watuŵa nangu asani watama (Wonani ndimi 9-12)

9. Kumbi matenda ngangachitiska kuti tijiwonengi wuli?

9 Matenda ngangachitiska kuti tisuzgikengi maŵanaŵanu ndi kujiwona kuti te ambula kukhumbika. Tingachita soni asani ŵanthu awona vo titondeka kuchita pamwenga asani tithemba anyidu kuti atiwovyi. Chinanga kuti ŵanthu angaziŵa cha kuti titama kweni tingachita soni chifukwa chakutondeka kuchita vo tachitanga kali. Pa nyengu yakusuzga yeniyi, Yehova wangatichiska. Kumbi wangatichiska wuli?

10. Mwakukoliyana ndi Nthanthi 12:25, ntchinthu wuli cho chingatiwovya asani titama?

 10 Asani tatama, “mazu ngamampha” ngangatichiska. (Ŵerengani Nthanthi 12:25.) Mu Bayibolu mwe mazu ngamampha ngo ngatitikumbusa kuti te akuzirwa kwaku Yehova chinanga tingaŵa kuti titama. (Sumu 31:19; 41:3) Asani tiŵerenga Mazu ngaki, watiwovyengi kuti tileki kuŵa ndi maŵanaŵanu ngaheni ngo munthu watuŵa nangu asani watama.

11. Kumbi Yehova wangumuwovya wuli mubali munyaki?

11 Ŵanaŵaniyani vo vinguchitikiya Jorge. Iyu wangutama matenda ngo ngamala nthazi munthu kamanakamana. Nthenda iyi yingukuwa luŵi ukongwa ndipu yingumuchitiska kuti wajiwonengi kuti ngwambula kukhumbika. Jorge wangukamba kuti: “Ndaziŵanga cha mo ndingachitiya ndi maŵanaŵanu ngo ndenga nangu chifukwa cha kutama pamwenga mo ndingachitiya ndi soni asani ŵanthu atindilereska. Nthenda iyi yati yafika paheni ukongwa, ndaŵanaŵaniyanga mo vinthu viŵiyengi pa umoyu wangu. Ndenga ndi chitima ukongwa ndipu ndinguŵeyere Yehova kuti wandiwovyi.” Kumbi Yehova wangumuwovya wuli? Jorge wanguti: “Chifukwa chakuti vandisuzganga kuŵika maŵanaŵanu pa vo ndaŵerenganga, ndaŵerenganga mavesi ngamanavi nga mu buku la Sumu ngo ngalongo kuti Yehova waphwere ateŵeti waki. Ndaŵerenganga malemba ngenanga zuŵa lelosi ndipu ngandipembuzganga ukongwa. Mukuluta kwa nyengu, ŵanthu angwamba kuwona kuti ndayamba kukondwa. Yiwu akambanga kuti achiskika asani atindiwona kuti ndikondwa. Ndinguziŵa kuti Yehova wamuka mapempheru ngangu! Iyu wangundiwovya kuti ndiyambi kujiwona mwakwenere. Ndingwamba kuŵanaŵaniya vo Mazu ngaki ngakamba pa nkhani ya mo iyu watindiwone chinanga kuti nditama.”

12. Kumbi mutenere kuchitanji kuti Yehova wakuwovyeni asani mutama?

 12 Asani mutama, Yehova waziŵa vo mukumana navu. Mumupemphengi kuti wakuwovyeni kuti mujiwonengi mwakwenere. Asani mwamupempha, muŵerengengi Bayibolu kuti muziŵi mazu ngakupembuzga ngo wakulembamu. Po muŵerenga Bayibolu, muŵanaŵaniyengi mavesi ngo ngalongo kuti Yehova wawona kuti ateŵeti ŵaki mbakuzirwa ukongwa kwaku iyu. Asani muchitengi viyo, muwonengi kuti Yehova ngwamampha kwaku wosi wo atimuteŵete mwakugomezgeka.​—Sumu 84:11.

ASANI TISUZGIKA KUSANIYA NDALAMA

Kukumbuka kuti Yehova wakutilayizga kuti watipaskengi vakukhumbika, kungatiwovya asani tisuzgika kusaniya ntchitu (Wonani ndimi 13-15)

13. Kumbi mubali pamwenga mzichi yo ndi mutu wa banja wangavwa wuli asani ntchitu yamumaliya?

13 Munthu weyosi yo ndi mutu wa banja wakhumba kuti waphweriyengi banja laki. Kweni wuli asani mubali ntchitu yamumaliya ndipu ndiyu cha wachitiska kuti yimali? Iyu wayesesa kuti wasaniyi ntchitu yinyaki kweni watiyisaniya cha. Venivi vingachitiska kuti wajiwonengi kuti ngwambula kukhumbika. Kumbi kuŵanaŵaniya vo Yehova wakulayizga kungamuwovya wuli?

14. Ntchifukwa wuli Yehova wafiska vo wakulayizga?

14 Nyengu zosi Yehova wafiska vo walayizga. (Yoswa 21:45; 23:14) Iyu we ndi vifukwa vinandi vo wachitiya viyo. Chifukwa chimoza ntchakuti zina laki, pamwenga kuti mbiri yaki yinganangika asani wangaleka kuchita viyo. Yehova wakulayizga kuti waŵaphweriyengi ateŵeti ŵaki akugomezgeka ndipu wawona kuti mbudindu waki kufiska layizgu lenili. (Sumu 31:1-3) Chifukwa chinyaki ntchakuti Yehova waziŵa kuti tingadandawula asani iyu wangaleka kuphwere ŵanthu ŵaki. Iyu wakulayizga kuti watiphweriyengi mwakuliŵavu ndi mwauzimu ndipu palivi chechosi cho chingamutondekesa kufiska vo wakulayizga!​—Mate. 6:30-33; 24:45.

15. (a) Kumbi Akhristu a mu nyengu ya akutumika angukumana ndi suzgu wuli? (b) Kumbi pa Sumu 37:18, 19 patitisimikiziyanji?

 15 Asani tikumbuka vifukwa vo Yehova wafiskiya vo wakulayizga, tikayika cha kuti watiwovyengi asani tisuzgika kusaniya ndalama. Ŵanaŵaniyani vo vinguchitikiya Akhristu a mu nyengu ya akutumika. Ŵati ayamba kutombozgeka ku Yerusalemu, ‘wosi kupatuwaku akutumika angumbininika.’ (Machi. 8:1) Kumbi venivi vinguchitiska kuti akumani ndi masuzgu wuli? Yiwu asuzgikanga kusaniya ndalama! Akhristu ŵenaŵa atenere kuti anguphangika nyumba zawu ndipu ntchitu pamwenga mabizinesi ngawu ngangumala. Kweni Yehova wanguŵajowo cha ndipuso venivi vinguŵalonda likondwa lawu cha. (Machi. 8:4; Ahe. 13:5, 6; Yako. 1:2, 3) Yehova wanguŵawovya Akhristu agomezgeka ŵenaŵa ndipu nasi watiwovyengi.​—Ŵerengani Sumu 37:18, 19.

ASANI TILIMBANA NDI MASUZGU CHIFUKWA CHA UKOTI

Kuŵanaŵaniya vo tingakwaniska kuchita chinanga tingakota, kungatiwovya kuziŵa kuti Yehova wawona kuti te akuzirwa, kusazgapu uteŵeti wo tichita Wonani ndimi 16-18)

16. Kumbi ntchinthu wuli cho chingachitiska kuti tiyambi kukayikiya asani vo tichita pakuteŵete Yehova vakuzirwa?

16 Asani tikota, tingaŵanaŵana kuti tingamuchitiya vinandi cha Yehova. Fumu Davidi yitenere kuti ndimu nayu yavwiyanga yati yakota. (Sumu 71:9) Kumbi Yehova wangatiwovya wuli?

17. Kumbi vo vinguchitikiya mzichi Jheri vititisambizanji?

17 Ŵanaŵaniyani vo vinguchitikiya mzichi munyaki zina laki Jheri. Iyu wangudanika kuti waluti ku Nyumba ya Ufumu kuti wakasambiri kunozga vinthu vo vanangika. Kweni wakhumbanga cha kuluta. Iyu wangukamba kuti: “Ndakota, nde choko ndipu palivi cho ndiziŵa kuti Yehova wandigwiriskiyi ntchitu. Ndamala ntchitu.” Ndi usiku wakuti mawa laki wamukwamba kusambira, wangupemphera kwaku Yehova kutuliya pasi pamtima. Wati wafika ku Nyumba ya Ufumu, wakayikiyanga mbwenu  asani ngwakwenere kudanika. Ŵati ayamba kusambira, yumoza mwa ŵanthu wo waŵasambizanga wangukamba kuti chinthu chakukhumbika ukongwa ndi lusu cha kweni nkhukhumbisiska kusambizika ndi Yehova. Jheri wangukamba kuti: “Ndinguŵanaŵana kuti, ‘Ini ndikhumbisiska kusambizika ndi Yehova!’ Ndingwamba kuliya ndati ndaziŵa kuti Yehova wamuka pempheru langu. Iyu wangundisimikiziya kuti nde ndi chinthu chinyaki chakuzirwa cho ndingamupaska ndipuso kuti wakhumbisiskanga kundisambiza!” Pakukumbuka vo vinguchitika, Jheri wanguti: “Po ndaserenga mu Nyumba ya Ufumu, ndagongowanga kweniso ndajiwonanga kuti nde wambula kukhumbika. Kweni ndichituwa, ndinguleka kujikayikiya, ndinguchiskika ndipu ndinguwona kuti nde wakuzirwa!”

18. Kumbi Bayibolu lilongo wuli kuti Yehova wawona kuti vo tichita vakuzirwa chinanga kuti tingakota?

18 Penipo tikota, tikayika cha kuti Yehova weche ndi ntchitu yo wakhumba kuti timuchitiyi. (Sumu 92:12-15) Yesu wakutisambiza kuti chinanga tingawona kuti vo tichita pakuteŵete Yehova vambula kukhumbika, kweni iyu wawona kuti vakuzirwa. (Luka 21:2-4) Mwaviyo, muŵanaŵaniyengi vo mungakwaniska kuchita. Mwakuyeruzgiyapu, mungapharazga, kupemphere abali ndi azichi kweniso kuchiska anyinu kuti alutirizgi kuja akugomezgeka. Yehova watikuwonani kuti mwe antchitu anyaki chifukwa cha vo muchita cha kweni chifukwa chakuti mukhumbisiska kumuvwiya.​—1 Akori. 3:5-9.

19. Kumbi lemba la Aroma 8:38, 39 lititisimikiziyanji?

19 Tiwonga ukongwa kuti tisopa Chiuta yo wawona kuti ŵanthu wo atimuteŵete mbakuzirwa! Iyu wakutilenga kuti tichitengi khumbu laki ndipu kusopa kwa uneneska ndiku kutitiwovya kuti tikondwengi ndi umoyu widu. (Chivu. 4:11) Chinanga kuti ŵanthu angatiwona kuti te ambula kuzirwa, kweni Yehova wachita nasi soni cha. (Ahe. 11:16, 38) Asani tisuzgika maŵanaŵanu chifukwa cha matenda, kusoŵa ndalama pamwenga ukoti, tingaluwanga cha kuti palivi cho chingatipatuska ku chanju cha Ada ŵidu akuchanya.​—Ŵerengani Aroma 8:38, 39.

^ ndimi 5 Kumbi nyengu yinyaki mungujiwona kuti mwe ambula kwenere chifukwa cha vo vingukuchitikiyani? Nkhani iyi, yikukumbuseningi kuti mwe akuzirwa ukongwa kwaku Yehova. Yikonkhoskengi vo mungachita kuti mujiwonengi kuti mwe akukhumbika kwambula kutoliyaku kanthu vo vingakuchitikiyani.

SUMU 30 Ada Ŵangu, Chiuta Wangu Ndipuso Bwezi Langu