Julani

Lutani pa vo ve mukati

 NKHANI YAKUSAMBIRA YA NAMBALA 1

Lutani Mukasambizengi Ŵanthu Kuti Aje Akusambira

Lutani Mukasambizengi Ŵanthu Kuti Aje Akusambira

LEMBA LA CHAKA CHA 2020: “Mwaviyo, lutani mukasambizengi ŵanthu . . . kuti aje akusambira ŵangu, mukaŵabatizengi.”​—MATE. 28:19.

SUMU 79 Asambizeni Kuti Aje Akukho

VO TISAMBIRENGI MU NKHANI IYI *

1-2. Kumbi mungelu wanguŵakambiyanji anthukazi pa muwunda waku Yesu, nanga Yesu wanguŵatumanji?

NDI mlenji pa Nisani 16, mu chaka cha 33 C.E., anthukazi anyaki wo ŵenga ndi chitima chikulu anguluta ku masanu ko anguŵika Ambuya a Yesu Khristu. Pangujumpha mazuŵa ngaŵi kutuliya po angumuŵikiya. Ŵati afika pa muwunda kuti apaki vakununkhirisiya ndipuso mafuta ngakununkhira thupi laku Yesu, anguzizwa ukongwa kuwona kuti muwunda ngwamwazi! Mungelu wanguŵakambiya kuti Yesu wayuka. Wanguŵakambiya so kuti: ‘Wadanjiyapu waluta ku Galileya. Mwakumuwona kweniko.’​—Mate. 28:1-7; Luka 23:56; 24:10.

2 Anthukazi yaŵa ŵati aweku ku masanu, Yesu wangukumana nawu ndipu wanguŵakambiya kuti: “Lutani mukakambiyi abali ŵangu kuti aluti ku Galileya, kweniko ndiku akundiwona.” (Mate. 28:10) Yesu watenere kuti wenga ndi uthenga wakuzirwa ukongwa wakuti wakakambiyi akusambira ŵaki. Tikamba viyo chifukwa yaka kenga kakwamba kukumana ndi akusambira ŵaki kutuliya po wanguyuskikiya!

KUMBI YESU WANGULAMULA AYANI KUTI AKASAMBIZENGI ŴANTHU?

Yesu wati wayuskika wangukumana ndi akutumika kweniso ŵanthu anyaki ku Galileya ndipu wanguŵakambiya kuti ‘aluti akasambizengi ŵanthu .  . . kuti aje akusambira’ (Wonani ndimi 3-4)

3-4. Ntchifukwa wuli tingakamba kuti pa Mateyu 28:19, 20, Yesu wangulamula akutumika pe cha kuti ndiwu apharazgengi? (Wonani chithuzi cho che pachikonkhombi.)

3 Ŵerengani Mateyu 28:16-20. Yesu wati wakumana ndi akusambira ŵaki, wanguŵatuma ntchitu yakukhumbika ukongwa. Ntchitu yeniyi ndiyu nasi tichita mazuŵa nganu. Yesu wangukamba kuti: “Mwaviyo, lutani mukasambizengi ŵanthu amitundu yosi, . . . mukaŵasambizengi kuti asungengi vinthu vosi vo ndikukulamulani.”

4 Yesu wakhumba kuti akusambira ŵaki wosi apharazgengi.  Iyu wangulamula akutumika 11 pe cha kuti ndiwu achitengi ntchitu iyi. Kumbi tiziŵa wuli venivi? Pa nyengu yo Yesu walamulanga akusambira ŵaki paphiri ku Galileya kuti akasambizengi ŵanthu, penga akutumika ŵaki pe cha. Tiziŵa wuli? Kumbukani kuti mungelu wangukambiya anthukazi kuti: “Mwakumuwona [ku Galileya].” Mwaviyo, anthukazi yaŵa nawu atenere kuti ŵengapu pa nyengu yo Yesu waperekanga dangu ili. Kweni penga akutumika ndi anthukazi yaŵa pe cha. Wakutumika Paulo wangukamba kuti Yesu “wanguwoneke kwa abali akujumpha 500 pa nyengu yimoza.” (1 Akori. 15:6) Kumbi wanguŵawoneke nunkhu?

5. Kumbi tisambiranji pa 1 Akorinto 15:6?

5 Pe vifukwa vakuvwika vo tikambiya kuti pa 1 Akorinto 15:6, Paulo watenere kuti wakambanga unganu wo ukambika pa Mateyu chaputala 28. Chifukwa chakwamba ntchakuti akusambira anandi aku Yesu atuliyanga ku Galileya. Mwaviyo, ku Galileya ndiku kwenga kwamampha kukumana ndi mzinda ukulu wa ŵanthu mumalu mwakukumana nawu munyumba ku Yerusalemu. Chifukwa chachiŵi ntchakuti Yesu ndipu wakumana nawu kali akutumika 11 munyumba ku Yerusalemu. Asani Yesu wakhumbanga kuti akutumika pe ndiwu apharazgengi ndi kusambiza ŵanthu kuti aje akusambira, watingi wakumanengi nawu ku Yerusalemu mumalu mwakukambiya akutumika, anthukazi ndi ŵanthu anyaki kuti wakakumani nawu ku Galileya.​—Luka 24:33, 36.

6. Kumbi pa Mateyu 28:20, palongo wuli kuti Yesu wangulamula Akhristu akwambiriya pe cha kuti akasambizengi ŵanthu? Nanga ŵanthu avwiya wuli dangu lenili?

6 Wonani so chifukwa chinyaki cho tikambiya kuti Yesu wangulamula akutumika ŵaki 11 pe cha kuti akapharazgengi. Yesu wangulamula Akhristu akwambiriya pe cha kuti akasambizengi ŵanthu. Tiziŵa wuli? Po Yesu wakambiyanga akusambira kuti akapharazgengi, wangumaliza ndi mazu ngakuti: “Ndiŵengi namwi limoza mazuŵa ngosi mpaka pakumaliya pa mugonezi.” (Mate. 28:20) Nge mo Yesu wangukambiya, mazuŵa nganu abali ndi azichi anandi asambiza ŵanthu kuti aje akusambira. Ŵanaŵaniyani ŵaka! Ŵanthu pafufupi 300,000 abatizika chaka chechosi kuti aje akusambira aku Yesu Khristu!

7. Kumbi sonu tikambiskanengenji, ndipu ntchifukwa wuli tikambiskanengi venivi?

7 Ŵanthu anandi wo asambira Bayibolu abatizika. Kweni anyaki wo tisambira nawu, atopa kuja akusambira aku Yesu. Yiwu atanja kusambira Bayibolu kweni abatizika cha. Asani musambira Bayibolu ndi munthu, tikayika cha kuti mukhumba kumuwovya kuti wachitengi vo wasambira kweniso kuti waje wakusambira waku Khristu. Nkhani iyi yikonkhoskengi vo tingachita kuti tiŵafikengi pamtima ŵanthu wo tisambira nawu Bayibolu ndipuso mo tingaŵawovye kuti aluti panthazi mwauzimu. Ntchifukwa wuli tikhumbika kukambiskana nkhani iyi? Chifukwa nyengu yinyaki tingakhumbika kuwona asani mphakwenere kulutirizga kusambira ndi munthu pamwenga cha.

MUYESESENGI KUTI MUŴAFIKENGI PAMTIMA

8. Ntchifukwa wuli vingaŵa vakusuzga kuŵafika pamtima ŵanthu wo tisambira nawu Bayibolu?

8 Yehova wakhumba kuti ŵanthu amuteŵetiyengi chifukwa chakuti atimuyanja. Mwaviyo, tisambira ndi ŵanthu kuti tiŵawovyi kuziŵa kuti Yehova watiŵaphwere weyosi pakuyija ndipuso kuti watiŵayanja ukongwa. Tikhumba kuti Yehova amuwonengi kuti ndi “wisi wa mwana wambula awisi kweniso wavikiliya vyoko.” (Sumu 68:5) Asani wo musambira nawu aziŵa kuti Chiuta watiŵayanja, akwaskikengi ndipu ayambengi kumuyanja ukongwa. Ŵanthu anyaki wo asambira Bayibolu, vitiŵasuzga kuwona Yehova nge Ada achanju chifukwa chakuti awisewu aŵalongonga cha kuti atiŵayanja. (2 Timo. 3:1, 3) Asani musambira Bayibolu ndi ŵanthu, mutenere kuŵakonkhoske mwakuvwika umampha mijalidu yaku Yehova. Muŵawovyengi kuti aziŵi kuti  Chiuta widu wachanju wakhumba kuti azisaniyi umoyu wamuyaya ndipu ngwakunozgeka kuŵawovya. Kumbi ndi vinthu wuli vinyaki vo tingachita?

9-10. Kumbi titenere kugwiriskiya ntchitu mabuku nanga pakusambira Bayibolu ndi ŵanthu, ndipu ntchifukwa wuli tikhumbika kuchita viyo?

9 Mugwiriskiyengi ntchitu buku lakuti Kumbi Tingasambiranji m’Bayibolu? ndi lakuti Kodi Mungatani Kuti Mulungu Azikukondani? Mabuku yanga ngakulembeka kuti ngatiwovyi kuŵafika pamtima ŵanthu wo tisambira nawu Bayibolu. Mwakuyeruzgiyapu, mutu 1 mu buku lakuti Tingasambiranji m’Bayibolu umuka mafumbu ngakuti: Kumbi Chiuta watitiyanja pamwenga ngwankhaza?, Kumbi Chiuta wakondwa asani ŵanthu asuzika?, Kumbi mungaja bwezi laku Yehova? Nanga buku lakuti Mulungu Azikukondani? Buku ili, litovya munthu yo tisambira nayu Bayibolu kuti waziŵi mo umoyu waki ungasinthiya asani wangagwiriskiya ntchitu fundu za mu Bayibolu ndipuso kuti wangaŵa pa ubwezi ndi Yehova asani wachita viyo. Chinanga mungaŵa kuti mukusambirapu kali mabuku yanga ndi ŵanthu, kweni  mutenere mbwenu kunozgeke umampha asani muluta kuchisambira ndi munthu. Pakunozgeke mukhumbika kuŵanaŵaniya vo vingawovya munthu yo mwamusambira nayu.

10 Kweni wuli asani munthu yo musambira nayu wakufumbani fumbu lo kwamuka kwaki kusanirika mu buku linyaki lo tileka kusambiziya ŵanthu? Panyaki mungamukambiya kuti wakaŵerengi yija. Venivi vingawovya kuti mulutirizgi kusambira nayu mabuku ngo tisambiziya ŵanthu Bayibolu ngo tangazumbuwa mu ndimi 9.

Mupempherengi dankha mwechendayambi kusambira (Wonani ndimi 11)

11. Kumbi tingayamba zukwanji kwamba ndi kumaliza ndi pempheru asani tayamba kusambira Bayibolu ndi munthu, ndipu tingamuwovya wuli kuti waziŵi kukhumbika kwa pempheru?

11 Mupempherengi dankha mwechendayambi kusambira. Kanandi vituŵa umampha kwamba ndi kumaliza ndi pempheru asani pajumpha waka masabata ngamanavi kutuliya po mwayambiya kusambira ndi munthu. Titenere kovya munthu yo tisambira nayu kuti waziŵi kuti tingavwisa Mazu ngaku Chiuta pija asani mzimu waki ungatiwovya. Abali ndi azichi anyaki aŵerenga Yakobe 1:5 kuti awovyi munthu yo asambira nayu kuti waziŵi kukhumbika kwa pempheru. Lemba ili likamba kuti: “Asani munthu munyaki wasoŵa zeru, walutirizgi kupempha kwaku Chiuta.” Pavuli paki atimufumba kuti, “Kumbi tingamupempha wuli zeru Chiuta?” Tikayika cha kuti munthu yo tisambira nayu wamukengi kuti titenere kupemphera kwaku Chiuta.

12. Kumbi mungagwiriskiya wuli ntchitu Sumu 139:2-4 kuti muwovyi munthu yo musambira nayu kuti wakambiskanengi mwakufwatuka ndi Yehova?

12 Musambizengi yo musambira nayu mo wangapemphere. Mumusimikiziyengi kuti Yehova wakhumba kuvwa mapempheru ngaki ngakutuliya pasi pamtima. Mumukambiyengi kuti asani tipemphera pakutija tingakambiya Yehova vinthu vo tingatondeka kukambiya munthu weyosi. Ndipu Yehova waziŵa kali vo ve mumtima mwidu. (Ŵerengani Sumu 139:2-4.) Tingamuchiska so kuti wapemphengi Chiuta kuti wamuwovyi kusintha maŵanaŵanu ngaheni ngo wenangu ndipuso kuti waleki vinthu viheni vo watanja. Mwakuyeruzgiyapu, tiyeruzgiyi kuti munthu munyaki yo musambira nayu, watanja kukondwere Khrisimasi. Iyu waziŵa kuti mbuheni kukondwere Khrisimasi chifukwa yikutuliya ku chisopa chaboza kweni pe vinthu vinyaki vakukwaskana ndi Khrisimasi vo vitimukondwesa. Mumuchiskengi kuti wakambiyengi Yehova mo wavwiya kweniso kuti wamuwovyi kwanja vinthu vo Chiuta watanja.—Sumu 97:10.

Mumudanengi mwaluŵi munthu yo musambira nayu kuti wayambi kuwungana (Wonani ndimi 13)

13. (a) Ntchifukwa wuli tikhumbika kuŵadaniyaku mwaluŵi ku maunganu ŵanthu wo tisambira nawu? (b) Kumbi tingamuwovya wuli munthu yo tisambira nayu kuti wakaleki kuchita phukwa ku Nyumba ya Ufumu?

13 Mumudanengi mwaluŵi munthu yo musambira nayu kuti wayambi kuwungana. Vo munthu wangavwa ndi kuwona ku maunganu vingamukwaska ndipu vingamuwovya kuti waluti panthazi. Mukhumbika kumulongo vidiyo yakuti Kumbi ndi Vinthu Wuli vo Vichitika pa Nyumba ya Ufumu? ndipu mungamupempha kuti muzilongozgani pakuluta ku maunganu. Asani walivi ndalama zakwende, mungamukambiya kuti mumulipiliyengi asani mungafiska. Mungachita umampha kwenda ndi abali ndi azichi akupambanapambana pakuluta ku sambiru linu. Kuchita viyo kungawovya kuti munthu yo musambira nayu waziŵiliyani ndi abali pamwenga azichi a mu mpingu winu. Venivi vingamuwovya kuti wakaleki kuchita phukwa asani waziluta ku maunganu.

MUWOVYENGI YO MUSAMBIRA NAYU KUTI WAKUWI MWAUZIMU

14. Ntchinthu wuli cho chingawovya munthu kuti wakuwi mwauzimu?

14 Tisambira Bayibolu ndi munthu kuti timuwovyi kuti waluti panthazi mwauzimu. (Aefe. 4:13) Asani munthu wazomera kuti tisambirengi nayu Bayibolu, panyaki wangazomere ŵaka kuti Bayibolu limuwovyi iyu mweneku. Kweni asani wayamba kumuyanja ukongwa Yehova, tikayika cha kuti wangayamba kuŵanaŵaniyapu  kuti nayu wawovyengi anyaki, kusazgapu abali ndi azichi mu mpingu. (Mate. 22:37-39) Pa nyengu yakwenere, mungamukambiya kuti nayu we ndi udindu wakuperekaku ndalama zakovya pa ntchitu ya Ufumu.

Mumusambizengi vo wangachita asani wakumana ndi masuzgu (Wonani ndimi 15)

15. Kumbi tingamuwovya wuli munthu yo tisambira nayu Bayibolu kuti wazichitengi vinthu mwazeru asani wazikumana ndi masuzgu?

15 Mumusambizengi vo wangachita asani wakumana ndi masuzgu. Mwakuyeruzgiyapu, tiyeruzgiyi kuti munthu yo musambira nayu ndi mupharazgi wambula kubatizika. Iyu watikukambiyani kuti munthu munyaki mu mpingu wamukwiyiska. Mumalu mwakumujaliya kuvuli pamwenga munthu yo wamukwiyiska, mungamukambiya vo Malemba ngakamba. Wangamugowoke waka mubali pamwenga wangakambiskana nayu mwaulemu kweniso mwachanju. Iyu watenere kuchita viyo kuti ‘wawezi mubali waki.’ (Yeruzgiyani ndi Mateyu 18:15.) Mumuwovyengi mo wanganozgeke vo wangachikamba. Mumulongongi mo wangagwiriskiya ntchitu JW Library®, Kabuku Kakufufuziya Nkhani ka Akaboni aku Yehova ndi webusayiti yidu ya jw.org® kuti wasambiri vo vingamuwovya kumalana ndi suzgu lo wakumana nalu. Asani wasambira vinandi wechendabatiziki, wazamuja mwachimangu ndi abali ndi zichi mu mpingu asani wazibatizika.

16. Kumbi pe phindu wuli asani tiluta ndi abali ndi azichi akupambanapambana ku sambiru lidu?

16 Mudanengi ŵanthu anyaki mu mpingu, kusazgapu wakuwonere dera asani waza pa mpingu winu, kuti akajepu pa sambiru. Chifukwa? Kusazgiyapu pa vifukwa vo takambapu kali, apharazgi anyaki angamuwovya mu nthowa zinyaki zo yimwi mungafiska cha. Mwakuyeruzgiyapu, tiyeruzgiyi kuti munthu wayesapu kananandi ŵaka kuti waleki kukweŵa foja kweni watondeka. Mungadana munthu yo wakuleka kukweŵa foja pavuli pakuyesesa kananandi ŵaka kuti waleki kukweŵa. Iyu wangapereka ulongozgi wo ungawovya sambiru linu. Asani mutopa kuchitiska sambiru pamasu pa mubali pamwenga mzichi walusu, mungamupempha kuti wachitiski ndiyu. Mwemosi mo vingaŵiya, sambiru linu lingayanduwa ndi lusu la mubali pamwenga mzichi yo mwayenda nayu. Mungaluwanga cha kuti tisambira Bayibolu ndi munthu kuti timuwovyi kuti wakuwi mwauzimu.

KUMBI NDILEKI ŴAKA KUSAMBIRA NAYU?

17-18. Kumbi mutenere kuŵanaŵaniya vinthu wuli asani mukhumba kuleka kusambira ndi munthu?

17 Asani munthu yo musambira nayu waluta panthazi cha, mungajifumba kuti, ‘Kumbi ndileki ŵaka kusambira nayu?’ Kweni mwechendaleki, mutenere kuŵanaŵaniya mo munthu yo wachitiya asani musambira nayu. Ŵanthu anyaki aswera cha kuluta panthazi penipo anyaki vitiŵatole nyengu. Jifumbeni kuti: ‘Kumbi munthu yo ndisambira nayu waluta panthazi mwakukoliyana ndi mo vinthu viliri pa umoyu waki?’ ‘Kumbi wakwambapu “kusunga,” pamwenga kuti kuchita vinthu vo wasambira?’ (Mate. 28:20) Pangajumpha nyengu yitali kuti munthu waje wakusambira waku Yesu. Kweni watenere kusintha kamanakamana.

18 Kweni wuli asani muwona kuti munthu yo mwasambira nayu kwa nyengu yitali walongo kuti vo wasambira vakukhumbika cha kwaku  iyu? Ŵanaŵaniyani chakuyeruzgiyapu ichi: Munthu yo musambira nayu wamaliza kusambira buku lakuti Tingasambiranji m’Bayibolu pamwenga panyaki mwayamba kusambira nayu buku lakuti Mulungu Azikukondani, kweni wechendazeku chinanga ndi zuŵa limoza ku maunganu ndi ku Chikumbusu viyo! Ndipu kanandi wagwentha kusambira pa vifukwa vambula kuvwika. Asani ndimu wachitiya, mbwenu mukhumbika kukambiskana nayu mwambula kubisa. *

19. Kumbi mungamukambiyanji munthu yo wawona kuti vo wasambira vambula kukhumbika? Ndipu vo wangamuka vingakuwovyani wuli?

19 Mungamufumba kuti, ‘Kumbi ntchinthu wuli cho mutopa ukongwa asani mungaja Kaboni waku Yehova?’ Iyu wangamuka kuti, ‘Nditanja kusambira Bayibolu kweni ndazamujapu cha Kaboni waku Yehova!’ Asani ndimu waŵanaŵaniya pavuli pakuti mwasambira nayu kwa nyengu yitali, kumbi pe chifukwa chakulutirizgiya kusambira nayu? Kweni nyengu zinyaki wangakukambiyani cho chitimutondekeska kuja Kaboni. Mwakuyeruzgiyapu, wangakukambiyani kuti wangakwaniska cha kupharazga kunyumba ndi nyumba. Asani mwaziŵa mo waŵanaŵaniya, mungaziŵa mo mungamuwovye.

Lekani kumaliya nyengu kusambira ndi munthu yo waleka kuluta panthazi (Wonani ndimi 20)

20. Kumbi pa Machitidu 13:48, pangatiwovya wuli kuziŵa munthu yo tikhumbika kulutirizga kusambira nayu?

20 Ntchachitima kuti ŵanthu anyaki wo tisambira nawu Bayibolu, ŵenge Ayisirayeli wo ŵengaku mu nyengu yaku Ezekiele. Pakukamba va ŵanthu yaŵa, Yehova wangukambiya Ezekiele kuti: “Awona! Yiwi we nge sumu yachanju kwaku yiwu, yakumbika ndi mazu ngasalala kweniso yakumbika mwalusu ndi chakumbiya cha vingwi. Yiwu azamukuvwa mazu ngaku, kweni azamuchitapu kanthu cha.” (Ezeki. 33:32) Vingaŵa vakusuza kukambiya munthu kuti tilekengi kusambira nayu. Kweni “nyengu yo yajaku yafupikiskika.” (1 Akori. 7:29) Mumalu mwakumaliya nyengu kusambira ndi munthu yo waleka kuluta panthazi, tikhumbika kupenja munthu yo walongo kuti we ndi ‘maŵanaŵanu ngamampha ngakumuwovya kuti wazisaniyi umoyu wamuyaya.’—Ŵerengani Machitidu 13:48.

Muchigaŵa chinu mungaŵa ŵanthu anyaki wo apemphera kuti aziŵi uneneska (Wonani ndimi 20)

21. Kumbi lemba la chaka cha 2020 ndakuti wuli, nanga litiwovyengi kuchitanji?

21 Lemba la chaka cha 2020, litiwovyengi kuti tiŵanaŵaniyengi mo tingasazgiyaku lusu lidu lakusambiza ŵanthu kuti aje akusambira. Mu lemba ili, mwe mazu ngo Yesu wangukamba pa unganu wo wanguchitiska paphiri ku Galileya. Iyu wangukamba kuti: “Mwaviyo, lutani mukasambizengi ŵanthu . . . , kuti aje akusambira ŵangu, mukaŵabatizengi.” Mate. 28:19.

Mphanyi taŵikiyapu mtima kuti tisazgiyeku lusu lidu lakusambiza ŵanthu kuti aje akusambira kweniso kuŵawovya kuti abatiziki (Wonani ndimi 21)

SUMU 70 Fufuzani Ŵanthu wo Mbakwenere

^ ndimi 5 Lemba la chaka cha 2020 lititichiska kuti ‘tisambizengi ŵanthu kuti aje akusambira.’ Dangu ili likwaska ateŵeti wosi aku Yehova. Kumbi tingaŵafika wuli pamtima ŵanthu wo tisambira nawu Bayibolu kuti aje akusambira aku Khristu? Nkhani iyi yikonkhoska mo tingawovye wo tisambira nawu Bayibolu kuti aje pa ubwezi ndi Yehova. Yikonkhoska so mo tingaziŵiya asani mphakwenere kulutirizga kusambira ndi munthu pamwenga cha.

^ ndimi 18 Woneriyani vidiyo yakuti Mo Tingaleke Kusambira ndi Munthu yo Waleka Kuluta Panthazi pa JW Broadcasting® pamwenga mungachita dawunilodi vidiyo yeniyi pa JW Library. Lutani po palembeka kuti OUR MEETING AND MINISTRY > IMPROVING OUR SKILLS.