NTCHIFUKWA WULI NKHWAKUKHUMBIKA?

Ŵanthu anyaki awona kuti kufika mwaliŵi asani apangana ndi munthu kutovya kuti alekengi kusuzgika maŵanaŵanu. Kusunga nyengu kutovya so munthu kuti waje ndi mbiri yamampha. Ntchifukwa wuli ve viyo?

Kusunga nyengu kulongo kuti muchita vinthu umampha. Asani musunga nyengu, mulongo kuti muchita vinthu mwazeru. Kweni asani nyengu zosi muswera, vinthu vo mwakhumbanga kuchita ndivu vitikulamulani.

Kusunga nyengu kulongo kuti mwe akuthembeka. Asani kanandi muchigaŵa ŵanthu anandi atondeka kufiska vo alayizga, ndipuso atoliyaku kanthu cha kuchita vo apangana ndi anyawu, ŵanthu atumbika ukongwa wo atesesa kufiska vo alayizga. Ŵanthu wo athembeka apasika ulemu ndi anyawu kweniso ŵanthu a m’banja lawu. Mabwana ku ntchitu, ngathemba ŵanthu wo afika liŵi ku ntchitu kweniso wo amaliza ntchitu pa nyengu yaki. Ŵanthu wo athembeka pa ntchitu angaŵakweze malipiru kweniso mabwana ngawu ngatiŵagomeza ukongwa.

VO BAYIBOLU LIKAMBA

M’Bayibolu mwe nkhani zinandi zo zilongo kuti kusunga nyengu nkhwakukhumbika. Mwakuyeruzgiyapu, Bayibolu likamba kuti: “Vinthu vosi vichitikengi mwakwenere kweniso mwandondomeku.” (1 Ŵakorinte 14:40) Asani ŵanthu ŵaŵi apangana kuti akumani pa nyengu ndi malu nganyaki, angalongo kuti achita vinthu mwakwenere kweniso mwandondomeku asani wosi asunga nyengu. Bayibolu likamba so kuti: “Chinthu chechosi che ndi nyengu yaki, chechosi cho chichitika pacharu chapasi che ndi nyengu yaki.” (Wakutaula 3:1) Mavesi nganyaki mu chaputala ichi ngakamba kuti pe “nyengu ya kupanda ndi nyengu ya kuchesuwa.” (Wakutaula 3:2) Alimi apanda mbewu pa nyengu yaki kuti akololi vakurya vakucha umampha. M’mazu nganyaki tingakamba kuti alimi apinduwa ukongwa chifukwa chakusunga nyengu.

Bayibolu likamba chifukwa chinyaki chakukhumbika ukongwa cho titenere kusungiya nyengu: Asani tisunga nyengu, tilongo kuti titumbika anyidu kweniso tiwona kuti nyengu yawu njakuzirwa ukongwa. (Ŵafilipi 2:3, 4) Kweni wo nyengu zosi achitisa kuti anyawu aŵalindizengi, awona kuti nyengu ya anyawu njambula kukhumbika.

“Mungaŵanaŵaniyanga vakukhumba vinu pe cha, kweni muŵanaŵaniyengi so vakukhumba va anyinu.”—Ŵafilipi 2:4.

VO BAYIBOLU LIKAMBA

Bayibolu lititichiska kuti tipangiyengi limu ndondomeku ya vinthu vo tikhumba kuchita. (Nthanthi 21:5) Asani muwona kuti kanandi mufika mwakuswera pa malu ngo mwapangana ndi munthu, ndikuti mwe ndi vakuchita vinandi. Mwaviyo, mungachita umampha kuleka kuchita vinthu vambula kukhumbika kuti muleki kutaya nyengu. Asani mukhumba kugwira ntchitu yinyaki mujipasengi nyengu yinandi kweniso mufikengi mwaliŵi. Venivi vingakuwovyani asani mwakumana ndi vinthu vamabuchibuchi nge kusuzga kwa mathirasipoti pamwenga asani kwe vuwa.

Bayibolu lititichiska so kuti tijengi akujiyuyuwa. (Nthanthi 11:2) Ivi ving’anamuwa kuti muziŵengi vinthu vo mungakwanisa cha kuchita. Mwechendazomeri kuchita vinthu vinyaki, muŵanaŵaniyengi dankha asani mufiskengi nadi. Asani muzomera kuchita vinthu vinandi vo mungatondeka kufiska, mungaguŵa ndi kusuzgika maŵanaŵanu. Anyinu nawu angasuzgika maŵanaŵanu ndipuso angaguŵa.

Bayibolu lititikambiya so kuti tigwirisiyengi ntchitu umampha nyengu yidu. (Ŵaefesu 5:15, 16) Muyambengi dankha kuchita vinthu vakukhumbika ukongwa. (Ŵafilipi 1:10) Mwakuyeruzgiyapu, asani mulindiza kuti mukweri galimotu pamwenga mulindiza anyinu, mungachita umampha kugwirisiya ntchitu nyengu yeniyi kuti muŵerengengi vinthu vinyaki pamwenga kuziŵiya limu vo muchitengi pa zuŵa lo.

“Vilatu va munthu waphamphu vitimupinduliya.”—Nthanthi 21:5.