Julani

Lutani pa vo ve mukati

 SAMBIRU 4

Mo Mungafiskiya Udindu Winu

Mo Mungafiskiya Udindu Winu

KUMBI KUZIŴA UDINDU WO MUNTHU WENAWU KUSAZGANJIPU?

Ŵanthu wo aziŵa kuti mbudindu wawu kuchita chinthu chinyaki aja akuthembeka. Yiwu atiyichita umampha ntchitu yo apaskika ndipu atiyimaliza pa nyengu yaki.

Chinanga kuti ŵana aziŵa vinthu vimanavi, kweni angayamba kusambira kuziŵa kuti ŵe ndi udindu wakuchita vinthu pakuŵija. Buku lakuti Parenting Without Borders likamba kuti: “Asani ŵana akwanisa waka chaka ndi myezi yitatu, atamba kuchita vo apapi ŵawu aŵakambiya, ndipu asani akwanisa chaka ndi myezi 6, akhumba kuchita chechosi cho apapi ŵawu achita. Mu vigaŵa vinandi, asani ŵana akwanisa vyaka 5 kufika 7, apapi atamba kuŵasambiza mo angagwiriya ntchitu zapanyumba. Ndipu chinanga kuti ŵeche anamana, afiska kugwira umampha ntchitu zinandi.”

NTCHIFUKWA WULI NKHWAKUKHUMBIKA KUZIŴA UDINDU WO WEYOSI WENAWU?

Mazuŵa nganu, achinyamata anandi wo atuwapu pa nyumba ya apapi ŵawu ndi kwamba kuja kwakuŵija, akumana ndi masuzgu ndipu awere kwa anyinawu ndi awisewu. Nyengu zinyaki, ivi vichitika chifukwa chakuti apapi ŵawu anguŵasambiza cha mo angagwiriskiya ntchitu ndalama mwazeru, mo angaphwere banja kweniso mo angajiphwere ŵija pa umoyu wawu.

Mwaviyo, mungachita umampha kusambiza ŵana ŵinu mo angachitiya vinthu pakuŵija kuti azileki kusuzgika asani akuwa. Buku lakuti How to Raise an Adult likamba kuti: “Mukhumbika cha kuŵalekere ŵana ŵinu mpaka vyaka 18, kuti pavuli paki azisuzgikengi asani akuwa.”

KUMBI MUNGAMUSAMBIZA WULI MWANA WINU KUFISKA UDINDU WAKI?

Muŵapaskengi ntchitu zapanyumba zakuti agwirengi nyengu zosi.

FUNDU YA M’BAYIBOLU: “Munthu weyosi yo wagwira ntchitu mwaphamphu wasaniya phindu.”—Nthanthi 14:23.

Ŵana anamana akhumbisiska kugwira ntchitu pamoza ndi apapi ŵawu. Mwaviyo, apapi mungasaniriyapu mwaŵi wakuŵapaska ntchitu zo angagwira panyumba.

Apapi anyaki akhumba cha kuti ŵana ŵawu agwirengi ntchitu zapanyumba. Yiwu achita viyo chifukwa aŵanaŵana kuti ŵana ŵawu wo asambira sukulu ŵe ndi ntchitu yikulu kali yakusukulu.

Kweni, ŵana wo agwira ntchitu zapanyumba, achita so umampha kusukulu chifukwa asambira mo angagwiriya umampha ntchitu yo apaskika kweniso kuyimaliza. Kusazgapu pa fundu zo buku la Parenting Without Borders likamba, “asani titondeka kuŵapaska vakuchita ŵana ŵidu pa nyengu yo akhumbisiska kugwira ntchitu  ŵeche anamana, angayamba kuwona kuti kuwovya ŵanthu anyaki nkhwambula kukhumbika . . . Yiwu angayamba so kuwona kuti akhumbika kuryapu waka, ndipu anyawu ndiwu aŵagwiriyengi ntchitu.”

Nge mo buku ili lilongore, asani nyengu zosi ŵana agwira ntchitu zapanyumba, asambira mo angawovye ŵanthu anyaki m’malu mwakujaliya waka kuwovyeka. Mwaviyo, asani agwira ntchitu zapanyumba angayamba kuwona kuti nawu mbakukhumbika mu banja linu ndipu angavwisa kuti pe vinthu vinyaki vo nawu akhumbika kuchitaku.

Wovyani ŵana ŵinu kuziŵa kuti mbudindu wawu kunozga vo anangisa.

FUNDU YA M’BAYIBOLU: “Vwiya ulongozgi ndipu zomera kuchenyeka, kuti uzije wazeru kunthazi.”—Nthanthi 19:20.

Asani ŵana ŵinu anangisa vinthu vinyaki mungaŵabisanga cha. Mwakuyeruzgiyapu, asani mwana winu munthulumi pamwenga munthukazi wananga chinthu cha munthu munyaki mwangozi, mutenere cha kumuŵikiya kuvuli. Asani muchitengi viyo, viwovyengi ŵana ŵinu kuti azomerezengi vo anangisa, apepesengi kweniso kuweziyapu vo vanangika.

Asani ŵana aziŵa vo anangisa kweniso vo atondeka, vingaŵawovya kuchita vinthu ivi:

  • kuchita vinthu mwauneneska kweniso kuzomezereza vo anangisa

  • kuleka kumba mlandu ŵanthu anyaki

  • kuleka kujiŵikiya kuvuli

  • kupepesa asani mphakwenere