Julani

Lutani pa vo ve mukati

Asani mwe ndi mbiri yamampha, mungalutirizga kuja akugomezgeka chinanga mungakumana ndi masuzgu nga nge chimphepu chikulu

 ACHINYAMATA

9: Mbiri Yinu

9: Mbiri Yinu

KUMBI YING’ANAMUWANJI?

Mbiri yinu yisazgapu vinandi kuluska ŵaka zina linu ndipuso mo muwoneke. Yisazgapu fundu zo mutende, vo mugomezga kweniso nkharu yinu. Mbiri yinu yikonkhoska vosi vakukwaskana ndi yimwi kwali ndi mijalidu yinu kweniso mo ŵanthu atikuziŵiyani.

NTCHIFUKWA WULI NJAKUKHUMBIKA?

Asani muziŵa fundu zo mutende pa umoyu winu, musuzgika cha kukamba vo mugomezga m’malu mwakuti muyendiyengi ŵaka maŵanaŵanu nga achinyamata anyinu.

“Ŵanthu anandi ŵe nge vidoli vo tiwona mumashopu nga vakuvwala. Vidoli venivi visankha cha vakuvwala vo ativivwalika, kweni ŵanthu ndiwu achita kuvisankhiya.”—Adrian.

“Ndasambira mo ndingasankhiya kuchita vinthu vamampha chinanga kuti vingaŵa vakusuzga kuchita viyo. Ndingaziŵa kuti yaŵa ndiwu anyangu chayiwu chifukwa cha mo achitiya vinthu kweniso mo ini ndichitiya nawu vinthu.”—Courtney.

FUNDU YA M’BAYIBOLU: “Lekani kuwumbika ndi mugonezi wunu, kweni sambukani mwakusintha maŵanaŵanu nginu.”—Aroma 12:2.

VO MUNGACHITA

Ŵanaŵaniyani mo muchitiya vinthu sonu kweniso mo mungazichitiya vinthu kunthazi mwa kuwona vinthu vo mufiska kuchita, vo mutondeka kufiska kweniso chifukwa cho mugomezge vinthu vinyaki. Kuti muziŵi venivi, mukhumbika kumuka mafumbu yanga.

Vo mufiska kuchita: Kumbi nde malusu wuli kweniso ndifiska kugwira ntchitu nizi? Nanga nde ndi mijalidu niyi yamampha? (Mwakuyeruzgiyapu: Kumbi ndisunga nyengu? Kumbi nditijiko? Kumbi ndilimbikiya ntchitu? Kumbi nde ndi mtima wakupaska?) Kumbi ndi vinthu vamampha nivi vo ndichita?

FUNDU YAKOVYA: Kumbi musuzgika kusaniya vinthu vamampha vo mufiska kuchita? Fumbani apapi ŵinu pamwenga munthu munyaki yo mutimugomezga kuti wakukambiyeni vinthu vamampha vo wawona kuti mufiska kuchita kweniso chifukwa cho wakambiya viyo.

FUNDU YA M’BAYIBOLU: “Weyosi wasandi vakuchita vaki, ndipu pavuli paki waŵengi ndi chifukwa chakukondwe pa vo iyu mweneku wachita, kweni mwakujiyeruzgiya ndi munthu munyaki cha.”—Agalatiya 6:4.

Vo mutondeka kufiska: Kumbi ndi mijalidu niyi yamampha yo ndikhumbika kuyesesa kuja nayu? Kumbi ndi nyengu niyi yo kanandi ndiyeseka kuti ndichiti chinthu chiheni? Kumbi mpha vakuchitika nivi po ndikhumbika kuyesesa kuja wakujiko?

FUNDU YA M’BAYIBOLU: “Asani tikamba kuti, ‘Tilivi ubudi,’ titijilandizga ndipu mwaku isi mulivi uneneska.”—1 Yohane 1:8.

Vifukwa vo mugomezge vinthu vinyaki: Kumbi ndi fundu za mijalidu yamampha nizi zo nditende ndipu ntchifukwa wuli? Kumbi ndigomezga kuti Chiuta waliku? Kumbi ndi maukaboni nanga ngo ngatindisimikiziya kuti Chiuta waliku nadi? Kumbi ndi vinthu wuli vo nditiviwona kuti vambula urunji, nanga ntchifukwa wuli nditiviwona viyo? Kumbi ndi vinthu wuli vo ndigomezga kuti vazamuchitika kunthazi?

FUNDU YA M’BAYIBOLU: “Kuŵanaŵana umampha kukuphweriyengi, ndipu kuwamu kukuvikiliyengi.”—Nthanthi 2:11.