Julani

Lutani pa vo ve mukati

Kukambiskana mwaulemu kwe nge dongu lakuzenge nyumba lo litovya kuti nyumba yije yakukho

 ŴANTHU AKUTORANA

3: Kutumbikana

3: Kutumbikana

KUMBI KUNG’ANAMUWANJI?

Ŵanthu akutorana wo atumbikana, atanjana mbwenu chinanga mphanyengu yo apambana maŵanaŵanu. Buku linyaki likamba kuti: “Ŵanthu wo atumbikana ajapu waka cheti cha asani apambana maŵanaŵanu. M’malu mwaki, akambiskana kuti amalisi suzgu lo. Yiwu avwisiya mwaulemu asani munyawu wakamba maŵanaŵanu ngaki ndipu atijithereska kuti weyosi wakondwi.”—Ten Lessons to Transform Your Marriage.

FUNDU YA M’BAYIBOLU: “Chanju . . . chikhumba vakuchija cha.”—1 Akorinto 13:4, 5.

“Kuti ndilongo kuti nditumbika muwolu wangu, nditesesa kuwona kuti iyu ngwakuzirwa ndipu ndikhumba cha kuchita vo vingamutimbanyizga maŵanaŵanu pamwenga kutimbanyizga nthengwa yidu.”—Micah.

NTCHIFUKWA WULI NKHWAKUKHUMBIKA?

Kanandi, ŵanthu akutorana wo aleka kutumbikana, ajaliya ŵaka kupwakasana, kunyozana kweniso akambiskana mwaulemu cha. Ŵanthu wo achita kafukufuku akamba kuti venivi ndivu vichitiska kuti nthengwa zimalengi.

“Kukamba mazu ngakunyoza mwakukuluŵika pamwenga nthambwala zakunyoza vingachitiska kuti muwolu waku wajiwonengi kuti ngwambula kukhumbika, waleki kukugomezga kweniso vingatimbanyizga nthengwa yinu.”—Brian.

VO MUNGACHITA

MUKANI MAFUMBU YANGA PAKUMWIJA

Kwa sabata yimoza wonesesani vo muchita asani mukambiskana. Pavuli paki, jifumbeni kuti:

  • ‘Kumbi nkhalinga po ndasuskana ndi munthu yo ndikutorana nayu, nanga nkhalinga po ndamuwonga chifukwa cha vo wachita?’

  • ‘Kumbi ndi vinthu nivi vo ndinguchita vo ndalongo kuti nditumbika munthu yo ndikutorana nayu?’

KAMBISKANANI NDI MUNTHU YO MUKUTORANA NAYU

  • Kumbi ndi vinthu nivi vo tingachita pamwenga mazu ngo tingakamba ngo ngangachitiska kuti weyosi wajivwengi kuti wapaskika ulemu?

  • Kumbi ndi vinthu nivi vo tichita pamwenga mazu ngo tikamba ngo ngachitiska kuti weyosi wajivwengi kuti waleka kupaskika ulemu?

FUNDU ZAKOVYA

  • Lembani vinthu vitatu vo mukhumba kuti munthu yo mukutorana nayu wachitengi kuti walongo kuti watikutumbikani. Munthu yo mukutorana nayu, nayu so wachiti viyo. Sinthanani mapepala ngo mwalemba ndipu weyosi wayesesi kulongo kuti watumbika munyaki pa vinthu vo munyaki walemba.

  • Lembani mijalidu yamampha ya munthu yo mukutorana nayu yo yitikukondwesani. Pavuli paki, mukambiyeni kuti mutimuwonga ukongwa chifukwa cha mijalidu yeniyi.

“Kuti ndilongo kuti nditumbika mulumu wangu, nditesesa kuchita vinthu vo vilongo kuti nditimuwona kuti ngwakukhumbika kweniso ndikhumba kuti wakondwengi. Kanandi vinthu vimanavimana vo ndichita pamwenga kukamba ndivu vilongo kuti nditimutumbika nadi mulumu wangu.”—Megan.

Fundu yikulu njakuti, mutenere cha kuŵanaŵaniya ukongwa kuti yimwi ndimwi mutumbikika pamwenga cha, kweni muwonesesengi asani munthu yo mukutorana nayu watijivwa kuti wapaskika ulemu.

FUNDU YA M’BAYIBOLU: “Vwalani chanju chikulu, lisungu, kujiyuyuwa, kuzika ndi kuzizipizga.”—Akolose 3:12.