Julani

Lutani pa vo ve mukati

Kulimbikiya ntchitu kwe nge kuchita masaza ngakutchimbiya. Kungakuwovyani sonu kweniso kwazakukuwovyani munthazi

 ACHINYAMATA

11: Kulimbikiya Ntchitu

11: Kulimbikiya Ntchitu

KUMBI KUNG’ANAMUWANJI?

Ŵanthu wo agwira ntchitu mwakulimbikiya, athaŵa cha kugwira ntchitu. M’malu mwaki, yiwu akondwa kugwira ntchitu mwaphamphu kuti asaniyi vinthu vakukhumbika pa umoyu kweniso kuti awovyi ŵanthu anyaki chinanga kuti ntchitu yo agwira yingawoneka yakunyozeka.

NTCHIFUKWA WULI NKHWAKUKHUMBIKA?

Fundu yauneneska njakuti, weyosi watuŵa ndi vakuchita vinandi paumoyu. Ŵanthu anandi akondwa cha kugwira ntchitu mwaphamphu. Mwaviyo, kulimbikiya ntchitu kungakupaskani mwaŵi wakuti musaniyengi vo mukhumbikiya.—Wakutaula 3:13.

“Ndasambira kuti asani munthu wagwira ntchitu mwakulimbikiya wakondwa kweniso wakhorwa ndi vo wachita. Venivi vandichitiska kuti ndiyanjengi kugwira ntchitu. Kugwira ntchitu mwakulimbikiya kungakuwovyani so kuti muje ndi mbiri yamampha.”—Reyon.

FUNDU YA M’BAYIBOLU: “Munthu wayanduwa asani walimbikiya kugwira ntchitu yeyosi.”—Nthanthi 14:23.

VO MUNGACHITA

Gwiriskiyani ntchitu fundu zo zalembeka mumphata kuti muwonengi kuti kulimbikiya ntchitu nkhwakukhumbika.

Mukhumbisiskengi kusambira kuchita vinthu umampha. Kwali mugwira ntchitu za pa nyumba, mulemba homuweki pamwenga mugwira ntchitu yakulembeka, ntchitu yeyosi mukhumbika kuyigwira ndi mtima wosi. Chinanga kuti mufiska kugwira ntchitu yinyaki, yesani kusaniya nthowa zo zingakuwovyani kuti muyigwirengi umampha ukongwa pamwenga mwaliŵi. Lusu lo mwe nalu lingakuwovyani kuti mugwirengi ntchitu mwakukondwa.

FUNDU YA M’BAYIBOLU: “Kumbi mwamuwona munthu walusu pa ntchitu yaki? Iyu wamengi pamasu pa mafumu; pa masu pa ŵanthu bweka cha.”—Nthanthi 22:29.

Muŵanaŵaniyengi mo vikwaskiya ŵanthu anyaki. Ŵanthu anyaki ayanduwa asani mufiska udindu wo mwenawu pa vakuchitika vakupambanapambana. Mwakuyeruzgiyapu, asani mulimbikiya kugwira ntchitu za pa nyumba, mutovya kuti weyosi mu banja linu wachitengi vinthu vimanavi.

FUNDU YA M’BAYIBOLU: “Kupaska kuchitiska kuti munthu wakondwengi ukongwa kuluska kulonde.”—Machitidu 20:35.

Mugwirengi ntchitu kuluska mo yakhumbikiyanga. M’malu mwakuti muchiti ŵaka vinthu vimanavi, muyesesengi kuchita vinandi kuluska vo vakhumbikanga. Asani muchita viyo, vikuwovyeningi kuti muchitengi vinthu mwakukhumba mwija m’malu mwakuchita kuchichizgika.—Mateyu 5:41.

FUNDU YA M’BAYIBOLU: “Ntchitu zaku zamampha zichitiki mwambula kuchichizgika kweni mwakukhumba wija.”—Filimoni 14.

Muchitengi vinthu mwambula kujumpha mwesu. Ŵanthu wo agwira ntchitu mwakulimbikiya achita vinthu mwaulesi cha kweniso agwira ntchitu mwakujumphisa mwesu cha. Yiwu achita vinthu mwachikatikati ndipu akondwa ndi ntchitu yo agwira mwaphamphu kweniso asaniya nyengu yakupumuliya.

FUNDU YA M’BAYIBOLU: “Kupumuwa kamanavi nkhwamampha kuluska kugwira ntchitu mwaphamphu ndipuso kutchimbiza mphepu.”—Wakutaula 4:6.