Kumbi ndi zukwanji po maboma nga ŵanthu ngazamudaniriza kuti “chimangu ndi kuvikilirika”?

Nge mo tikukonkhoske mu nkhani ya mu Chigongwi cha Mlinda, a ya pambula kuswera yakuti “Vo Akuŵerenga Afumba,” pambula kuswera yapa Yehova wazamuŵika ‘maŵanaŵanu ngaki’ mumitima ya “masengwi 10,” ngo ngamiya maboma ngosi nga ŵanthu. Maŵanaŵanu ngaki ngakuti maboma yanga ngapereki nthazi kweniso mazaza ngawu ku “chinyama chakofya chiyera ukongwa” cho chimiya wupu wa United Nations. Chinyama chakofya chenichi chidanika so kuti “chikozgu cha chinyama chakofya.” (Chivu. 13:​14, 15; 17:​3, 16, 17) Pavuli paki, “masengwi 10” kweniso chinyama chakofya cho chazamuja kuti chapaskika ŵaka nthazi, vazamutuzgapu visopa vosi vaboza pacharu chosi. Kumbi maboma nga ŵanthu ngazamudaniriza kuti “chimangu ndi kuvikilirika” b visopa vaboza vechendabwanganduliki pamwenga pavuli pakuti vabwangandulika?—1 Ate. 5:3.

Pasonu panu, tiziŵa nyengu chayiyu cha yo maboma nga ŵanthu ngazamudaniriziya kuti “chimangu ndi kuvikilirika.” Asani taziŵiyanga limu chechosi pa nkhani yeniyi, ndikuti tingakhumbika so cha kuja masu. Kweni Yesu wangukambiya akusambira ŵaki mwakuwerezawereza kuti akhumbika ‘kulutirizga kuja masu.’ (Mate. 24:42; 25:13; 26:41) Sonu tiyeni tikambiskani uchimi wo wakutumika Paulo wangulemba mukalata yaki yakuluta kwa Akhristu aku Tesalonika.

Paulo wangulemba kuti: “Pa nyengu yo azamukambiya kuti, ‘Chimangu ndi kuvikilirika!’ penipo, pharanyiku  lamabuchibuchi lazakuŵawiya.” (1 Ate. 5:​2, 3) Kanandi mabuku ngidu ngaja ngachikonkhoska fundu iyi kuti: Maboma nga ŵanthu ngazamudaniriza kuti “chimangu ndi kuvikilirika” asani kwazija kanyengu kamanavi kuti chisuzgu chikulu chiyambi ndipu chazamuyamba ndi kubwangandulika kwa Babiloni Mukulu, yo wamiya visopa vosi vaboza pacharu chosi. Ndipu asani ngazidaniriza kuti “chimangu ndi kuvikilirika,” tazamuziŵa kuti chisuzgu chikulu che pafupi kwamba.

Kweni tati tayifufuza mwakuphwere nkhani yeniyi, viwoneka kuti pe fundu yinyaki yo tikhumbika so kuyiŵanaŵaniya. Panyaki maboma nga ŵanthu ngazamudaniriza kuti “chimangu ndi kuvikilirika” pavuli pakuti visopa vosi vabwangandulika. Ntchifukwa wuli tingakamba viyo? Tiyeni tikambiskani mafumbu yanga.

Kumbi visopa vaboza vichitanjipu pa nkhondu zo zichitika pacharu? Bayibolu likamba kuti: “Mwaku iyu [‘huli likulu,’ kung’anamuwa Babiloni Mukulu] mungusanirika ndopa za . . . ŵanthu wosi wo akubayika pacharu chapasi.” (Chivu. 17:​1, 5; 18:24) Mu mbiri yosi ya ŵanthu, huli likulu likhuŵiza nkhondu kweniso kanandi lichiska viwawa vo vichitiska kuti ŵanthu mamiliyoni nganandi abayikengi. Mwaviyo, mumalu mwakuwovya kuti pacharu paje chimangu kweniso kuti ŵanthu ajengi mwakuvikilirika, huli lenili ndilu litambisa nkhondu ndi viwawa. Venivi vichitiska kuti paje fumbu lakuti: Kumbi maboma ngazamudaniriza kuti “chimangu ndi kuvikilirika” pavuli pakuti Babiloni Mukulu wabwangandulika? Vingaŵa nadi viyo, kweni tingakamba mwakusimikiza cha kuti ndimu vazamuŵiya.

Kumbi ntchinthu wuli cho chazamuchitika pavuli pakudaniriza kuti “chimangu ndi kuvikilirika”? Paulo wangukamba kuti: “Penipo, pharanyiku lamabuchibuchi lazakuŵawiya.” (1 Ate. 5:3) Pa lemba ili, Paulo wakulongo kuti pazamujumpha ŵaka kanyengu kamanavi pamwenga pazamuŵavi nyengu kutuliya po azamudaniriziya kuti ‘chimangu ndi kuvikilirika’ ndi nyengu yo pharanyiku lamabuchibuchi lazamuwiya wo azamudaniriza mazu ngenanga. Pharanyiku lenili lazamuja lamabuchibuchi ndipu palivi yo wazakulithaŵa. Asani maboma nga ŵanthu ngazamudaniriza kuti “chimangu ndi kuvikilirika” pavuli pakuti visopa vosi vaboza vatuzgikapu, ndikuti maboma ngenanga ngazamubwangandulika mwamabuchibuchi ukongwa.

Kumbi ŵanthu aku Yehova azamuchita wuli asani aziwona kuti vinthu vo Bayibolu likukambiya limu vichitika? Paulo wangukamba kuti: “Abali, mwe mu mdima cha kuti zuŵa lo likubuchizgeni nge mo lingachitiya kwa ankhungu.” (1 Ate. 5:4) Ŵanaŵaniyani fundu iyi: Asani maboma nga ŵanthu ngazamudaniriza kuti “chimangu ndi kuvikilirika” pavuli pakuti visopa vaboza vabwangandulika, ŵanthu aku Yehova azamuziŵiya limu kuti kwaja kanyengu kamanavi ukongwa kuti maboma nga ŵanthu nangu ngabwanganduliki. Kweni maboma ngenanga ngo panyengu iyi ngazamuja kuti ngadaniriza kuti “chimangu ndi kuvikilirika,” ngazamuŵanaŵana kuti ngakuvikilirika mwakuti ngangabwangandulika cha. Mwaviyo, pharanyiku lazakungawiya mwamabuchibuchi ukongwa nge mo munkhungu wachitiya.

Kweni pe chinthu chinyaki cho tiziŵiya limu kuti chazamuchitika. Pambula kuswera yapa, “masengwi 10” kweniso chinyama chakofya cho chazamuja kuti chapaskika nthazi, vazamubwanganduwa chisopa chaboza. Ndipu uku kwazamuja kwamba kwa chisuzgu chikulu. Tiziŵa so kuti pa nyengu yinyaki, maboma nga ŵanthu ngazamudaniriza kuti “chimangu ndi kuvikilirika.” Kumbi venivi vazamuchitika zukwanji? Takambiskana vinthu viŵi vo vingazichitika. Chinthu chakwamba: Maboma nga ŵanthu ngangazidaniriza kuti “chimangu ndi kuvikilirika” visopa vaboza vechendabwanganduliki. Chinthu chachiŵi cho chingazichitika: Maboma nga ŵanthu ngangazidaniriza pavuli pakuti ngabwanganduwa visopa vaboza. Tikhumbika ŵaka kulindizga kuti tiziwoni vo vazamuchitika. Kanandi, mauchimi nga mu Bayibolu titingavwisa umampha pa nyengu yo ngafiskika pamwenga pavuli pakuti ngafiskika.—Yeruzgiyani ndi Yohane 12:16.

Pasonu panu, chakukhumbika ukongwa kwaku isi nkhuja akugomezgeka kwaku Chiuta mumalu mwakuŵanaŵaniya ukongwa nyengu yo maboma nga ŵanthu ngazamudaniriziya kuti “chimangu ndi kuvikilirika.” Sonu, tikhumbika ‘kuja masu ndipuso kulutirizga kuŵanaŵana umampha,’ kuti tije akunozgeka kwali mauchimi ngazamufiskika wuli munthazi.—1 Ate. 5:6.