Obadiya wawoneriyanga nyumba yaku Ahabu yo wenga fumu yiheni. Fumu yeniyi yinguzomerezga kuti kusopa Bala kusapaliyi mucharu chosi cha Yisirayeli. Kweni Obadiya wawopanga Yehova “kutuliya pa unamana” waki. (1 Mafu. 18:​1-13) Mwaviyo, Fumukazi Yezebeli yati yalamula kuti achimi wosi aku Yehova abayiki, Obadiya wanguziŵa kuti wakhumbika kuja ndi chiganga kuti watondekesi vinthu viheni venivi. Pa nyengu iyi, kubisa mchimi yimoza kwenga kwakofya ukongwa. Kweni Obadiya wangubisa achimi 100 kweniso waŵapaskanga chakurya pa nyengu ya nja! Ŵanaŵaniyani ŵaka mo venge vakusuzga kwaku Obadiya kuti wachiti venivi mwakubisa, kuti achimi aboza mahandiredi wo ateŵetiyanga fumu ndi fumukazi aleki kuziŵa.—1 Mafu. 18:19.

Kumbi tingasambiranji kwaku Obadiya yo wawopanga Chiuta? Chinanga kuti Obadiya wamuwopanga Ahabu, kweni wawopanga ukongwa Chiuta. Venivi vingumuwovya kuti waje ndi chiganga mpaka wanguŵika umoyu waki pangozi kuti wavikiliyi abali ŵaki. Asani ntchitu yidu yakanizgika ko tija, nasi tikhumbika kopa ukongwa Yehova. Venivi vingatiwovya kuti tije ndi chiganga kuti tiwovyi abali ndi azichi ŵidu wo akumana ndi masuzgu.