Ŵerengani Numeri 13:25–14:4 kuti muwoni vo vilongo kuti Ayisirayeli amugomezganga cha Yehova.

Vwisani nkhani yosi. Ntchifukwa wuli Ayisirayeli akhumbikanga kuja ndi chivwanu kuti Yehova waŵataskengi pa nyengu yo atuwanga ku Ijipiti? (Salimo 78:​12-16, 43-53) Kumbi ntchinthu wuli cho chinguŵachitiska kuti aleki kugomezga Yehova? (Doto. 1:​26-28) Kumbi Yoswa ndi Kalebe angulongo wuli kuti amugomezganga Yehova?—Nume. 14:​6-9.

Fufuzani mwakukwana. Kumbi Ayisirayeli akhumbikanga kuchitanji kuti amugomezgengi ukongwa Yehova? (Salimo 9:10; 22:4; 78:11) Kumbi pe kukoliyana wuli pakati pa kugomezga Yehova ndi kumutumbika?—Nume. 14:11.

Ŵanaŵaniyani vo musambirapu. Jifumbeni kuti:

• ‘Kumbi ndi vinthu nivi vo vingachitiska kuti nditondeki kugomezga Yehova ndi mtima wosi?’

• ‘Kumbi ndingachita wuli kuti sonu ndimugomezgengi ukongwa Yehova kweniso kuti ndizimugomezgengi ukongwa munthazi?’

• ‘Kumbi nditenere kusimikizanji po chisuzgu chikulu che pafupi kwamba?’—Luka 21:​25-28.