Julani

Lutani pa vo ve mukati

Kumbi Chiuta Watitilenge Lisungu?

Kumbi Chiuta Watitilenge Lisungu?

VO TISAMBIRA KUTULIYA KU CHILENGEDU

Mazu ngakuti lisungu ngangang’anamuwa so “kuvwisa mo munthu munyaki wavwiya mumtima pamwenga kuvwisa vo wakumana navu, mwakuŵanaŵaniya mo watingi uvwiyengi asani vinthu vo vinguchitikiya yiwi.” Dr. Rick Hanson yo ndi kaswiri wa mo ŵanthu aŵanaŵaniya wangukamba kuti, “lisungu tichita kuwa nalu.”

ŴANAŴANIYANI FUNDU IYI: Ntchifukwa wuli taŵanthu tilenge lisungu anyidu penipo nyama zilivi jalidu lenili? Bayibolu likamba kuti Chiuta wakulenga ŵanthu muchikozgu chaki. (Chiyambo 1:26) Fundu yeniyi, ying’anamuwa kuti taŵanthu tingayezga kweniso kulongo mijalidu yamampha yaku Chiuta. Mwaviyo, asani ŵanthu alenge lisungu anyawu kweniso atiŵawovya, ayezga Yehova Chiuta, yo ndi Mulengi wawu walisungu.—Nthanthi 14:31.

BAYIBOLU LITITISAMBIZA KUTI CHIUTA WATITILENGE LISUNGU

Chiuta watitilenge lisungu ndipu waguŵa asani wawona kuti tisuzgika. Ayisirayeli angukunthiyapu pa nyengu yo ŵenga mu ukapolu wankhaza ku Ijipiti kweniso angukunthiyapu kwa vyaka 40 po akumananga ndi masuzgu ngakupambanapambana mu chipululu. Pakukamba za Ayisirayeli ŵenaŵa, Bayibolu likamba kuti: “Pa nyengu yosi yo yiwu akumananga ndi masuzgu, nayu wasuzgikanga.” (Yesaya 63:9) Yapa vilongo kuti Chiuta waziŵanga ŵaka masuzgu ngo akumananga nangu pe cha, kweni nayu wavwanga nge mo yiwu avwiyanga. Iyu wangukamba kuti “nditingaziŵa umampha masuzgu ngawu.” (Chituwa 3:7) Chiuta wangukamba so kuti, “Yo wakukwaskani, wakwaska mboni ya jisu langu.” (Zekariya 2:8) Venivi vilongo kuti asani anyidu atichitiya vinthu viheni, Yehova nayu vitimupweteka mumtima.

Bayibolu lititisimikizgiya kuti chinanga tingajimba mlandu chifukwa cha vo tachita pamwenga kujiwona nge kuti Chiuta wangatilenge so lisungu cha, kweni “Chiuta ndi mukulu kuluska mitima yidu, ndipuso waziŵa vosi.” (1 Yohane 3:19, 20) Chiuta watitiziŵa umampha kuluska mo titijiziŵiya taŵeni. Iyu waziŵa umampha vinthu vosi vo vititichitikiya, vo tiŵanaŵana, kweniso mo tivwiya mumtima. Iyu watitilenge lisungu.

Tingapempha Chiuta kuti watipembuzgi, watipaski zeru, kweniso kuti watiwovyi chifukwa tiziŵa kuti iyu watovya wosi wo asuzgika maŵanaŵanu

 Malemba ngatitisimikiziya kuti

  • “Mwazamudana ndipu Yehova wazamumuka, mwazamupempha chovyu, ndipu iyu wazamumuka kuti, ‘Nde panu!’”​—YESAYA 58:9.

  • “Yehova watiti: ‘Ini ndiziŵa umampha maŵanaŵanu ngo nde nangu paku yimwi, ndiŵanaŵana za chimangu mumalu mwakuŵanaŵaniya soka, kuti mulindizgengi vinthu vamampha kunthazi. Ndipu yimwi mwazakundidana kweniso mwazamukuza ndi kupemphera kwaku ini ndipu ini ndazakukuvwisiyani.’”​—YEREMIYA 29:11, 12.

  • “Sungani masozi ngangu muthumba linu la chikumba. Asi masozi ngangu ngakulembeka mubuku linu?”​—SUMU 56:8.

CHIUTA WAWONA VO VITITICHITIKIYA, WATITIVWISA NDIPUSO WATITILENGE LISUNGU

Kumbi kuziŵa kuti Chiuta watitilenge lisungu kungatiwovya kuti timalani ndi masuzgu ngo tikumana nangu? Ŵanaŵaniyani vo vinguchitikiya Maria. Iyu wangukamba kuti:

“Ndawonanga kuti umoyu ngwakusuzga ukongwa kweniso kuti vinthu vichitika mwambula urunji. Ndawonanga viyo chifukwa vingundiŵaŵa ukongwa mwana wangu munthulumi wa vyaka 18 wati wafwa ndi nthenda ya kansa yo wangusuzgika nayu kwa vyaka viŵi. Ndingumukwiyiya Yehova chifukwa wangusereliyapu cha kuti wamuchizgi mwana wangu.

“Pati pajumpha vyaka 6, mzichi munyaki wa mumpingu widu wangundivwisiya ndichimukonkhoske mo ndavwiyanga mumtima kuti Yehova watindiyanja cha. Wati wavwisiya kwa nyengu yitali kwambula kundidumuwa mazu, wangundikambiya mazu nga pa lemba la 1 Yohane 3:19, 20 ngo ngangundichiska ukongwa. Lemba ili likamba kuti: ‘Chiuta ndi mukulu kuluska mitima yidu, ndipuso waziŵa vosi.’ Iyu wangundikambiya kuti Yehova wavwisa masuzgu ngo tikumana nangu.

“Chinanga kuti iyu wangundikambiya viyo, kweni vingundisuzga mbwenu kuti ndileki kukwiyiya Yehova. Pavuli paki ndinguŵerenga lemba la Sumu 94:19 lo likamba kuti: ‘Pa nyengu yo masuzgu ngangu ngenga nganandi, imwi mungundipembuzga ndi kundikondwesa.’ Ndinguvwa nge kuti mavesi ngenanga angulembe ŵaka ini. Pati pajumpha nyengu ndingusaniya kuti venga vakusisipuwa ukongwa kukambiya Yehova masuzgu ngangu chifukwa ndaziŵanga kuti watuvwa kweniso kuti wavwisa.”

Vakupembuzga ukongwa kuziŵa kuti Chiuta wavwisa masuzgu ngo tikumana nangu kweniso kuti watitilenge lisungu. Nanga ntchifukwa wuli pacharu pe masuzgu nganandi viyo? Kumbi ntchifukwa chakuti Chiuta watitilanga chifukwa cha vinthu vo tinangisa? Kumbi Chiuta wazamumalisa masuzgu ngosi? Mu nkhani yakulondopu tikambiskanengi mafumbu ngenanga.