Julani

Lutani pa vo ve mukati

Ntchifukwa Wuli Umoyu We Ndi Phindu?

Ntchifukwa Wuli Umoyu We Ndi Phindu?

Faizal wakhumbikanga kuchitika opaleshoni yikulu ya mtima pati pajumpha waka chaka chimoza kutuliya po muwolu waki wangufwiya. Iyu wangukamba kuti: “Asani ndiŵerenga buku la Jobu, ndiziŵa kuti pe chifukwa chakuvwika cho Yehova wakulilembe buku lenili. Asani tiŵerenga nkhani ya munthu munyaki m’Bayibolu yo nayu wangukumana ndi masuzgu ngakuyanana ndi ngo nasi tikumana nangu, tipembuzgika ukongwa.” Iyu wangukamba so kuti: “Umoyu weche ndi phindu.”

Tarsha wenga munamana pa nyengu yo anyina atayikiyanga. Iyu wangukamba kuti: “Pakuti nditimuziŵa Mulengi, umoyu we ndi chilatu, nde ndi chilindizga kweniso ndikondwa chinanga kuti ndikumana ndi masuzgu nganandi. Ndipu ndikayika cha kuti Yehova wangatiwovya zuŵa lelosi.”

NKHANI zo zajumpha zakonkhoska mo masuzgu ngakupambanapambana ngangachitiskiya kuti tiwonengi kuti umoyu ngwakusuzga ukongwa. Pa nyengu yo mukunthiyapu masuzgu ngo mukumana nangu, mungayamba kukayikiya asani umoyu we ndi phindu pamwenga asani pe munthu munyaki yo watikuŵanaŵaniyani. Ziŵani kuti Chiuta watikuphweriyani, ndipu mwe akuzirwa ukongwa kwaku iyu.

Munthu munyaki yo wakulemba buku la Sumu 86 wangukamba kuti wathembanga Chiuta. Iyu wanguti: “Nditikudanani pa zuŵa la suzgu yangu, pakuti yimwi mundimukengi.” (Sumu 86:7) Panyaki mungajifumba kuti: ‘Kumbi Chiuta wangandimuka wuli pa “zuŵa la suzgu yangu”?’

Chinanga kuti Chiuta wangamalisa cha masuzgu nginu nyengu yeniyo, kweni Mazu ngaki Bayibolu, ngatikusimikiziyani kuti iyu wangakupaskani chimangu cha mumtima kuti mukunthiyengepu. Bayibolu likamba kuti: “Mungafipanga mtima ndi chinthu chechosi cha, kweni pa chinthu chechosi, mwa pempheru ndi kuŵeyere limoza ndi kuwonga, vo mupempha viziŵiki kwaku Chiuta; ndipu chimangu chaku Chiuta cho chiluska kuziŵa vinthu kosi, chivikiliyengi mitima yinu ndi maŵanaŵanu nginu.” (Afilipi 4:6, 7) Wonani mo mavesi nga m’Bayibolu ngo nge mumphata umu ngatitisimikiziya kuti Chiuta watitiŵanaŵaniya nadi.

Chiuta Watikuphweriyani

“Palivi [mpheta] yo Chiuta waleka kuyiphwere. . . . Mwe akuzirwa ukongwa kuluska mpheta zinandi.”​Luka 12:6, 7, mazu ngamumphata.

ŴANAŴANIYANI FUNDU IYI: Chiuta waphwere tiyuni timanatimana ukongwa nge tiyuni ta mpheta to ŵanthu awona kuti nthambula kukhumbika. Iyu waziŵa kayuni kekosi ka mpheta chinanga kangaja kamana wuli, ndipu watikawona kuti nkhakuzirwa. Kweni ŵanthu ndiwu akuzirwa ukongwa kwaku Chiuta kuluska mpheta. Ve viyo chifukwa pa vinthu vosi vo Chiuta wakulenga pacharu chapasi, ŵanthu ndiwu wakuŵalenga mwapade ukongwa. Yiwu akulengeka mu “chikozgu” chaki ndipu angalongo mijalidu yamampha ukongwa yo Chiuta wenayu.​—Chiyambo 1:26, 27.

“Yimwi Yehova, mwandifufuza ndipu mutindiziŵa. . . . Muziŵa maŵanaŵanu ngangu . . . Ndifufuzeni kuti muziŵi maŵanaŵanu ngo ngatindifipiska mtima.”​Sumu 139:1, 2, 23.

ŴANAŴANIYANI FUNDU IYI: Chiuta watikuziŵani umampha ukongwa yimwi. Iyu waziŵa vinthu vo muŵanaŵana kweniso vo vitikufipiskani mtima. Chinanga kuti ŵanthu anyaki angaziŵa cha masuzgu nginu ndipuso vo vitikufipiskani mtima, kweni Chiuta watikuphweriyani kweniso wakhumba kukuwovyani. Venivi vilongo kuti umoyu winu we ndi phindu.

 Umoyu Winu we Ndi Chilatu

“Yimwi Yehova, vwani pempheru langu, vwani kuliya kwangu kwakupempha chovyu. . . . Lazgiskani gutu linu kwaku ini, ndimukeni mwaluŵi asani ndidana. . . . Iyu wavwisiya pempheru la munthu wakusuzgika.”​Sumu 102:1, 2, 17.

ŴANAŴANIYANI FUNDU IYI: Ve nge kuti kutuwa waka po ŵanthu angwamba kukumana ndi masuzgu, Yehova waja wachisunga masozi ngawu mu buku laki. (Sumu 56:8) Masozi ngenanga ngasazgapu masozi nginu. Ndipu Chiuta wakumbuka mayeseru ngosi ngo mukumana nangu kweniso masozi nginu chifukwa mwe akuzirwa kwaku iyu.

“Ungafipanga mtima cha, pakuti ndini Chiuta waku. Ndikukholesengi, ndikuwovyengi . . . Ini, Yehova Chiuta waku, . . . Ndini Yo watikukambiya kuti, ‘Ungawopanga cha. Ndikuwovyengi.’”​Yesaya 41:10, 13.

ŴANAŴANIYANI FUNDU IYI: Chiuta ngwakunozgeka kukuwovyani. Ndipu chinanga mungawa, iyu wakuyuskeningi.

Mulindizgengi Vinthu Vamampha Kunthazi

“Chiuta wakuchiyanja ukongwa charu, mwakuti wakupereka Mwana waki wapade, kuti weyosi wakuvwana mwaku iyu waleki kunangika, kweni waje ndi umoyu wamuyaya.”​Yohane 3:16.

ŴANAŴANIYANI FUNDU IYI: Chiuta watikuyanjani ukongwa mwakuti wangupereka Mwana waki, Yesu, nge sembi chifukwa chaku yimwi. Sembi yeniyi yitikupaskani chilindizga chakuzija ndi umoyu walikondwa kweniso wamampha ukongwa kwamuyaya. *

^ ndimi 19 Kuti muziŵi vinandi vakukwaskana ndi mo mungayanduliya ndi sembi yaku Yesu, woneriyani kavidiyo kakuti, Mukumbukiyengi Nyifwa Yaku Yesu pa www.jw.org/tog.

Wonani po alemba kuti MABUKU > MAVIDIYO > MAUNGANU NGIDU NDI UTEŴETI.

Chinanga kuti mungasuzgika maŵanaŵanu kweniso mungawona kuti umoyu winu ngwambula phindu, musambirengi Mazu Ngaku Chiuta mwakuphwere ndipuso mugomezgengi vinthu vo Chiuta wakulayizga. Venivi vikuwovyeningi kuti mujengi ndi umoyu walikondwa kweniso muwonengi kuti umoyu we ndi phindu.