Julani

Lutani pa vo ve mukati

Malayizgu Ngo Ngazamufiskika Nadi

Malayizgu Ngo Ngazamufiskika Nadi

Nge mo Yesu wangukambiya limu, uthenga wamampha wa Ufumu waku Chiuta upharazgika pacharu chosi chapasi. (Mateyu 24:14) Buku la Danyele lititikambiya kuti Ufumu wenuwu ndi boma laku Chiuta. Chaputala 2 cha buku lenili, chikonkhoska uchimi wo ulongo maboma nga ŵanthu pamwenga maufumu ngakulungakulu ngo ngalamuliyapu charu chapasi, kwambiya ufumu wa Babiloni mpaka ufumu wo ulamuliya sonu. Vesi 44 likambiya limu vo vazamuchitika kunthazi. Vesi lenili likamba kuti:

“Chiuta wakuchanya wazamujalikiska ufumu wo wazamubwangandulika cha, ndipu ufumu waki wazamuperekeka ku mtundu wewosi cha wa ŵanthu. Kweni wazamuphwanya maufumu ngosi, ndipu wazamuwusa mpaka muyaya.”

Uchimi wenuwu kweniso mauchimi nganyaki ngo nge m’Bayibolu, ngakukambiya limu kuti Ufumu waku Chiuta wazamusere m’malu mwa maboma ngosi nga ŵanthu. Ufumu wenuwu uzisengi chimangu kweniso ŵanthu azamuja mwakukoliyana pacharu chapasi. Kumbi ŵanthu azamuja wuli asani Ufumu waku Chiuta waziyamba kulamuliya? Wonani vinthu vakukondwesa vo Chiuta wakulayizga, vo vichitikengi pambula kuswera.

  • KWAZAMUŴAVI NKHONDU

    Sumu 46:9: “[Chiuta] walekesa nkhondu pacharu chosi chapasi. Wafyo uta ndipuso wavikita mkondu. Wawotcha magaleta nga nkhondu ndi motu.”

    Mazuŵa nganu, ŵanthu agwiriskiya ntchitu ndalama zinandi kweniso malusu ngawu pakupanga vidya vankhondu. Muwona kuti charu chingaŵa wuli asani ŵanthu angagwiriskiya ntchitu ndalama zenizi kweniso malusu ngawu pakupanga vinthu vo vingawovya ŵanthu m’malu mwakuŵabaya? Layizgu lenili lazamufiskika nadi mu Ufumu waku Chiuta.

  • KWAZAMUŴAVI MATENDA

    Yesaya 33:24: “Palivi wakuja m’charu cho yo wazamukamba kuti: ‘Ndatama.’”

    Ŵanaŵaniyani mo umoyu wazamuŵiya kuja mucharu cho mulivi matenda nge khansa, maleliya, matenda nga mtima pamwenga matenda nganyaki ngosi. Kwazamuŵavi vipatala pamwenga munkhwala. Kunthazi, ŵanthu wosi azamuja ndi umoyu wamampha ukongwa pacharu chapasi.

  • KWAZAMUŴAVI NJA

    Sumu 72:16: “Pacharu chapasi pazamukuŵa vakurya vinandi. Ndipu vazamuzala pachanya pa mapiri.”

    Pacharu chapasi pazamuja chakurya chakukwana weyosi ndipu palivi yo wazamusoŵa chakurya. Kwazamuŵavi nja kweniso ŵanthu azamutama cha chifukwa chakusoŵa chakurya muliŵavu.

  • KWAZAMUŴAVI NYIFWA, CHITIMA PAMWENGA URWIRWI

    Chivumbuzi 21:4: “[Chiuta] waleskengi masozi ngosi mumasu mwawu, nyifwa yiŵengepu so cha, chinanga nkhuliya pamwenga kukuta pamwenga urwirwi viŵengepu so cha. Vinthu vakali vajumphapu.”

     Ivi ving’anamuwa kuti ŵanthu azamuja akufikapu ndipuso azamuja ndi umoyu wamuyaya mu paradayisu pacharu chapasi. Yehova Chiuta, yo ndi Mulengi widu wachanju ndiyu wakutilayizga venivi.

‘NGAZAMUFISKIKA NADI’

Kumbi yimwi mugomezga kuti malayizgu ngenanga ngazamufiskika nadi pamwenga muwona kuti ndi nthanu ŵaka? Chinanga kuti ŵanthu anandi azomereza kuti vinthu vo Chiuta wakulayizga m’Bayibolu vamampha nadi, kweni pe vifukwa vakupambanapambana vo vitiŵachitiska kuti akayikiyengi kuti ŵanthu azamuja kwamuyaya. Venivi vakuziziswa cha chifukwa chakuti palivi munthu yo wakujapu ndi umoyu wamuyaya kuti wakonkhoski mo umoyu wenuwu uliri.

Kwamba kali, ŵanthu ŵe mu ukapolu wa ubudi ndi nyifwa ndipuso asuzgika ukongwa ndi urwirwi, matenda kweniso masuzgu ngakulungakulu. Chifukwa chakuti ivi vachitika kwa nyengu yitali, ŵanthu aziŵiriya waka, mwakuti awona kuti ndimu umoyu uliri. Kweni venivi vakupambana ukongwa ndi vo Mulengi widu, Yehova Chiuta wakhumbanga. Iyu wakhumbanga kuti ŵanthu ajengi ndi umoyu wamampha.

Kuti watiwovyi kugomezga kuti vosi vo wakulayizga vichitikengi nadi, Chiuta wakukamba mwakusimikiza vakukwaskana ndi mazu ngaki kuti: “Ngaweriyengi kwaku ini cha kwambula kufiska chilatu chaki, kweni ngafiskengi vo ini ndikhumba, ndipu ngafiskengi nadi vo ini ndangatuma kuti ngachiti.”—Yesaya 55:11.

Bayibolu likamba kuti Yehova ndi Chiuta “yo wangapusika cha.” (Tito 1:2) Chifukwa chakuti Yehova wakutilayizga vinthu vamampha ukongwa kunthazi, tingachita umampha kuŵanaŵaniya mafumbu yanga: Kumbi vazamuchitika nadi kuti ŵanthu azije kwamuyaya mu Paradayisu pacharu chapasi? Kumbi isi tingachita wuli kuti tizilonde umoyu wamuyaya wo Chiuta wakulayizga? Musaniyengi kwamuka kwa mafumbu ngenanga mu nkhani zakulondopu.