Julani

Lutani pa vo ve mukati

Uneneska Wakukwaskana ndi Chiuta Ndipuso Yesu

Uneneska Wakukwaskana ndi Chiuta Ndipuso Yesu

Chinanga kuti ŵanthu asopa a chiuta anandi, kweni pe Chiuta yumoza pe wauneneska. (Yohane 17:3) Iyu ndi “Mura Ukongwa,” Mlengi wa vinthu vosi kweniso Mweneku wa Umoyu. Ndipu iyu pe ndiyu ngwakwenere kumusopa.​—Danyele 7:18; Chivumbuzi 4:11.

Kumbi Chiuta Ndiyani?

Zina laku Chiuta lisanirika mu mpukutu wakali MAULENDU NGAKUJUMPHA 7,000

Zina laku Chiuta ndi YEHOVA

AMBUYA, CHIUTA, ADA​—Yanga ndi mazina nganyaki nga udindu ngaku Yehova

Kumbi Zina Laku Chiuta Ndiyani? Chiuta mweneku wakamba kuti: “Ndini Yehova, lenili ndilu zina langu.” (Yesaya 42:8) Zina laku Chiuta lisanirika maulendu 7,000 mu Bayibolu. Kweni mu ma Bayibolu nganandi akutuzgamu zina ili ndipu akulembamu zina lakuti “Ambuya.” Chiuta wakhumba kuti muje nayu paubwezi, ndipu watikupemphani kuti, ‘mudaniyengi pa zina laki.’​—Sumu 105:1.

Mazina nga Udindu Ngaku Yehova. Bayibolu likamba kuti Yehova we ndi mazina nganandi nga udindu nge “Chiuta,” “Wanthazizosi,” “Mlengi,” “Ada,” “Ambuya,” ndipuso “Fumu Yikulu.” Mapempheru nganandi ngo ngakulembeka mu Bayibolu, Yehova wazumbulika ndi mazina ngaki ngaulemu kweniso zina laki chayilu lakuti Yehova.​—Danyele 9:4.

 Mo Chiuta Wawoneke. Chiuta ndi mzimu wambula kuwoneka. (Yohane 4:24) Bayibolu likamba kuti “palivi munthu yo wakuwonapu Chiuta.” (Yohane 1:18) Likonkhoska so mo iyu wavwiya. Mwakuyeruzgiyapu, vo ŵanthu angachita vingamuchitiska chitima pamwenga ‘vingamukondwesa.’​—Nthanthi 11:20; Sumu 78:40, 41.

Mijalidu Yamampha yo Chiuta Wenayu. Chiuta walivi sankhu ndi munthu wakutuliya mu mtundu wewosi. (Machitidu 10:34, 35) Iyu ndi Chiuta “walisungu kweniso wawezi, wambula kukwiya liŵi ndipuso wakuzaza ndi chanju chambula kumala kweniso uneneska.” (Chituwa 34:6, 7) Kweni Chiuta we ndi mijalidu yinyaki yinayi yo njapade ukongwa.

Nthazi. Pakuti ndi “Chiuta Wanthazizosi,” iyu we ndi nthazi zakufiskiya malayizgu ngaki ngosi.​—Chiyambo 17:1.

Zeru. Chiuta we ndi zeru ukongwa kuphara munthu weyosi. Mphakuvwika kuti Bayibolu likamba kuti ndiyu “yija yo ngwazeru.”​—Aroma 16:27.

Urunji. Nyengu zosi Chiuta wachita vinthu mwaurunji. Ndipu ntchitu zaki “zakufikapu” kweniso “wachita cha vinthu vambula urunji.”​—Marangu 32:4.

Chanju. Bayibolu likamba kuti “Chiuta ntchanju.” (1 Yohane 4:8) Iyu we ndi chanju ŵaka cha. Kweni iyu ntchanju. Chanju chitimulongozga pa chechosi cho wachita ndipu nasi chititiwovya munthowa zinandi.

Ubwezi Wapakati Paku Chiuta ndi Ŵanthu. Chiuta Mbawusefwi achanju akuchanya. (Mateyu 6:9) Tingaja mabwezi ngaki asani titimugomezga. (Sumu 25:14) Mwaviyo Chiuta watikupemphani kuti mundere kufupi ndi iyu kuziya m’pempheru kweniso kuti ‘mumuponyiyengi vosi vo vitikufipiskani mtima, chifukwa iyu watikuphweriyani.’​—1 Peturo 5:7; Yakobe 4:8.

Kumbi pe Mphambanu Wuli Pakati Paku Chiuta ndi Khristu?

Yesu ndi Chiuta Cha. Yesu ngwapade ukongwa chifukwa ndiyu pe yo Chiuta wangumulenga mwachindunji. Ndichu chifukwa chaki Bayibolu likamba kuti Yesu ndi Mwana waku Chiuta.(Yohane 1:14) Wati walenga Yesu, Yehova wangumugwiriskiya ntchitu nge “mumisili walusu” pakulenga vinthu vosi kweniso weyosi.​—Nthanthi 8:30, 31; Akolose 1:15, 16.

 Yesu Khristu wakuŵanaŵaniyapu cha kuja Chiuta. M’malu mwaki wangukamba kuti: “Chifukwa ndikuza kuzimiya [Chiuta], ndipu Iyu ndiyu wakundituma.” (Yohane 7:29) Pa nyengu yo wakambiskananga ndi yumoza wa akusambira ŵaki, Yesu wangukamba Yehova kuti “Ada wo Mbawusemwi,” ndipuso“Chiuta wangu yo ndi Chiuta winu.” (Yohane 20:17) Yesu wati wafwa, Yehova wangumuyuska. Ndipu wati waluta kuchanya wakumupaska mazaza ngakulu ukongwa kujanja Laki lamaryi.​—Mateyu 28:18; Machitidu 2:32, 33.

Yesu Khristu Wangakuwovyani Kuti Mundere Kufupi ndi Chiuta

Yesu wanguza pacharu chapasi kuti wazitisambizi vakukwaskana ndi Awisi. Pakukamba vaku Yesu, Yehova mweneku wangukamba kuti: “Uyu ndi Mwana wangu, mweniyo nditimuyanja. Muvwiyeni.” (Mariko 9:7) Yesu watimuziŵa umampha ukongwa Chiuta kuphara munthu weyosi. Iyu wangukamba kuti: “Palivi yo watiŵaziŵa Ada kweni Mwana pe ndi munthu weyosi yo Mwana wakhumba kumuvumbuliya Awisi.”​—Luka 10:22.

Yesu walongonga mijalidu yaku Chiuta mwakufikapu. Yesu wenga ndi mijalidu yamampha chifukwa wayezganga Awisi ndichu chifukwa chaki wangukamba kuti: “Munthu weyosi yo wawona ini, wawona so Ada.” (Yohane 14:9) Yesu wawovyanga ŵanthu kundere kufupi ndi Chiuta mwa kulongo chanju cha Awisi mu mazu ndipuso vakuchita vaki. Iyu wangukamba kuti: “Ini ndini nthowa, uneneska ndi umoyu. Palivi munthu yo watuza kwa Ada kwambula kuziya mwaku ini.” (Yohane 14:6) Iyu wangukamba so kuti: “Ŵanthu akusopa mwauneneska azamusopa Ada mu mzimu ndi mu uneneska. Nadi panu, Ada akhumba ŵanthu aviyo kuti aŵasopengi.” (Yohane 4:23) Aŵanaŵaniyani ŵaka! Yehova wakhumba ŵanthu nge yimwi wo akhumba kuziŵa uneneska wakukwaskana ndi iyu.