Julani

Lutani pa vo ve mukati

1 Lingakuwovyani Kuti Muleki Kukumana ndi Masuzgu

1 Lingakuwovyani Kuti Muleki Kukumana ndi Masuzgu

Bayibolu likamba kuti ulongozgi waki ukukambirika ndipu utovya “pakusambiza, pakuchenya, pakunyoloska vinthu.” (2 Timote 3:16) Kumbi venivi vauneneska? Wonani mo ulongozgi wa m’Bayibolu unguwovye ŵanthu anyaki kuti aleki mijalidu yiheni yo yatingi yichitisengi kuti akumani ndi masuzgu ngakulu.

KUMWA MOŴA UNANDI

Delphine yo wazumbulika mu nkhani yajumpha wawonanga kuti masuzgu ngo wangukumana nangu ndingu ngamuchitisanga kuti wamwengi moŵa unandi. Bayibolu likaniza cha kumwa moŵa umanavi kweni likamba kuti: “Ungajanga cha pakati pa ŵanthu wo atumwa vinyu munandi.” (Nthanthi 23:20) Kumwa moŵa unandi kutambisa matenda ngakofya, kuchitisa kuti ŵanthu alekengi kukoliyana kweniso nthengwa zimala. Ndipu ŵanthu mamiliyoni atufwa chaka chechosi chifukwa cha kumwa ukongwa moŵa. Asani ŵanthu alondonga ulongozgi wa m’Bayibolu mphanyi akumana cha ndi masuzgu ngenanga.

Delphine wangulondo ulongozgi wa m’Bayibolu. Sonu iyu wakamba kuti: “Ndinguwona kuti kumwa moŵa kwandiwovyanga cha kuti ndileki kusuzgika maŵanaŵanu. Ndingugwirisiya ntchitu ulongozgi wa pa Afilipi 4:6, 7, wo ukamba kuti: “Mungafipanga mtima ndi chinthu chechosi cha, kweni . . . vo mupempha viziŵiki kwaku Chiuta.” Usiku wewosi asani ndayamba kusuzgika maŵanaŵanu, ndapempheranga kwaku Yehova. Ndakambiyanga Yehova mo ndavwiyanga mumtima mwangu. Ndamukonkhoskiyanga vo vandikwiyisanga, vo vandiŵaŵanga mumtima kweniso ndamukambiyanga kuti palivi cho ndingachita ndipu ndamuŵeyeriyanga kuti wandiwovyi kuja ndi maŵanaŵanu ngakwenere. Mulenji wewosi ndawonesesanga kuti ndaleka kuja ndi maŵanaŵanu ngaheni. Kupemphera kwaku Yehova kwandiwovyanga kuti ndiŵanaŵaniyengi vitumbiku vo ndasaniya m’malu mwakuŵanaŵaniya vinthu vo ndilivi. Ndingusankha kuti ndazamukumwa so cha moŵa. Chimangu cho ndingusaniya chifukwa chakulondo ulongozgi wa m’Bayibolu, ndachiwonanga kuti ntchakuzirwa ukongwa ndipu ndakhumbanga cha kuchitaya.”

 UREŴI

Ureŵi uchitisa kuti ŵanthu akumanengi ndi masuzgu kweniso asuzgikengi maŵanaŵanu. Kweni fundu za m’Bayibolu zingatiwovya kuti venivi vileki kutichitikiya. Ilu lititikonkhoske vinthu vo vichitisa kuti munthu wachiti ureŵi nge kukopana kweniso kuwonere vithuzi vakulawula. Mnyamata munyaki zina laki Samuel wangukamba kuti: “Kukopana kwenga kwambula kusuzga. Nyengu zinyaki vachitikanga kuti ndakopeka cha ndi munthukazi kweni ndaziŵanga kuti watindikhumba. Venivi vandichitisanga kuti ndiwonengi kuti kukopana nkhwakukondwesa.” Ŵanthu akambanga kuti Samuel watanja kukopa anthukazi chinanga kuti wakhumbanga cha kuchita viyo. Venivi vinguchitisa kuti waje ndi kalusu kakukopa asungwana. Kweni pavuli paki, wangwamba kusuzgika maŵanaŵanu chifukwa cha kalusu kenaka. Iyu wangukamba kuti: “Kukopana nkhuheni ukongwa chifukwa kuchitisa kuti munthu waje wakujiyanja.”

Samuel wanguŵerenga nkhani yakukwaskana ndi achinyamata pa webusayiti ya jw.org. Iyu wanguŵanaŵaniya so fundu yo yisanirika pa lemba la Nthanthi 20:11. Lemba ili likamba kuti: “Chinanga ndi mwana waziŵika ndi vo wachita, asani nkharu yaki njamampha kweniso asani njakwenere.” Kumbi venivi vingumuwovya wuli Samuel? Iyu wanguwona kuti kukopana ko wachitanga yenga nkharu yamampha cha pamwenga kuti kwenga kwambula kwenere. Pavuli paki wangukamba kuti: “Ndingusambira so kuti asani wachinyamata wakopana ndi ŵanthu anyaki wangaja ndi mijalidu yiheni yo yingachitisa kuti wazileki kuja munthu wamampha munthengwa. Ndingwamba kuŵanaŵaniya mo munthukazi yo ndazamuto wangavwiya mumtima mwaki kundiwona kuti ndikopana ndi munthukazi munyaki. Venivi vingundiwovya kuziŵa kuti kukopana nkhwakofya. Chinanga kuti kukopana nkhwambula kusuzga, kweni nkhuheni mbwenu.” Samuel wangusintha. Kuleka jalidu lenili kungumuwovya so kuti waleki kuchita ureŵi.

Antonio wenga ndi kalusu kakwanja kuwonere vakulawula, ndipu venivi vatingi vimuchitisengi kuti wachiti ureŵi. Chinanga kuti wanguto munthukazi yo wamuyanjanga ukongwa, kweni kanandi wawoneriyanga mbwenu vakulawula. Iyu wangukamba kuti kuŵanaŵaniya lemba la 1 Peturo 5:8 kungumuwovya ukongwa. Lemba ili likamba kuti: “Lutirizgani kuja akuŵanaŵana umampha, jani masu! Murwani winu Dyaboli wayingayinga nge nkharamu yakukoroma, wapenja kumeza munthu munyaki.” Antonio wangukamba kuti: “Vithuzi vakulawula ve peposi mazuŵa nganu, ndipu mphakusuzga kuti vithuzi venivi vituwemu m’maŵanaŵanu asani munthu waviwona. Vesi lenili lingundiwovya kuziŵa yo wachitisa mayeseru ngenanga. Ndingusambira kuti ndakhumbikanga kukumbuka mwaliŵiliŵi kuti vithuzi venivi vituwa kwaku Dyaboli. Sonu ndiziŵa kuti ndi Yehova pe yo wangandiwovya ‘kuŵanaŵana umampha kweniso kuja masu’ kuti ndilimbani ndi vithuzi vakulawula vo vitimbanyizga maŵanaŵanu, mtima kweniso nthengwa yangu.” Pakumaliya, Antonio wanguwovyeka ndipu sonu wakuleka kuwonere vakulawula. Venivi vingumuwovya kuti waleki kukumana ndi masuzgu ngakulu.

Kukamba uneneska, Bayibolu le ndi ulongozgi wo ungatiwovya kuti tileki kukumana ndi masuzgu ngakulu. Kweni tingachita wuli asani masuzgu ngo takumana nangu ngawoneka kuti ngangamala cha? Tiyeni tiwoni mo Mazu Ngaku Chiuta ngangatiwovye kuti timalani ndi masuzgu ngaviyo.

Ulongozgi wa m’Bayibolu ungatiwovya kuti tileki kukumana ndi masuzgu nganyaki