UMOYU mazuŵa nganu we nge mo Chiuta wakhumbiyanga cha. Kufika sonu mphanyi charu chikuzaza ndi ŵanthu wo akhumba kulamulika ndi Chiuta, kulongozgeka ndi iyu kweniso kuja ndi mijalidu yo iyu wenayu. Chiuta wakhumbanga kuti ŵanthu ajengi pamoza mwakukondwa, kusambira vinthu vasonu kweniso kunozga charu kuti chije paradayisu.

• “Iyu wamalisa nkhondu pacharu chosi chapasi.”​—Sumu 46:9.

• “Nyengu yakuŵikika yingukwana . . . yakunangiya wo ananga charu chapasi.”​—Chivumbuzi 11:18.

• “Palivi wakuja mucharu cho yo wazamukamba kuti: ‘Ndatama.’”​—Yesaya 33:24.

• “Ŵanthu ŵangu akusankhika azamukondwa ukongwa ndi ntchitu za manja ngawu.”​—Yesaya 65:22.

Kumbi mauchimi ngenanga ngazamufiskika wuli? Chiuta wakusankha Mwana waki Yesu kuja Fumu, ndipu wazamulamuliya charu chapasi kutuliya kuchanya. Bayibolu likamba ulamuliru wenuwu kuti ndi Ufumu waku Chiuta. (Danyele 2:44) Pakukamba vaku Yesu, Bayibolu likamba so kuti: “Chiuta wazakumupaska mpandu . . . ndipu wazamuwusa nge Fumu.”​—Luka 1:32, 33.

Pa nyengu yo wenga pacharu chapasi, Yesu wanguchita vakuziziswa vinandi vo vilongo kuti iyu nge Fumu, wazamuwovya ŵanthu kuja ndi umoyu wamampha kuphara mo tijaliya sonu.

• Iyu wanguchizga matenda nga mtundu wewosi. Venivi vilongo mo wazamumalisiya masuzgu ngosi ngo ŵanthu akumana nangu.​—Mateyu 9:35.

• Iyu wanguchetamisa nyanja. Venivi vilongo mo wazamuvikiliya ŵanthu ku nthazi za muchilengedu.​—Mariko 4:36-39.

• Iyu wanguryisa ŵanthu masauzandi nganandi. Venivi vilongo kuti iyu wazamupaska ŵanthu vinthu vo akhumbika.​—Mariko 6:41-44.

• Iyu wangusambuska maji kuja vinyu pa zowala. Venivi vilongo kuti wazamuwovya ŵanthu kuti azikondwengi ndi umoyu.​—Yohane 2:7-11.

Kumbi mungachita wuli kuti muzije ndi umoyu wo Chiuta wakhumba kuti ŵanthu wo atimuyanja azije nawu? Pe “msewu” umoza pe wo mukhumbika kwendamu. Bayibolu likonkhoska kuti mukhumbika kwenda ‘mumsewu umana wo ngwakulongozge ku umoyu ndipu mbamanavi wo atiwusaniya.’—Mateyu 7:14.

Kumbi msewu wakuluta ku umoyu ntchinthu wuli? Chiuta wakamba kuti: “Ini Yehova, ndini Chiuta waku, Yo watikusambiza kuti vinthu vikuyende umampha, Yo watikulongozga munthowa  yo utenere kwendamu.” (Yesaya 48:17) Kwenda mumsewu wenuwu, kungakuwovyani kuti muje ndi umoyu wamampha.

Yesu wangukamba kuti: “Ini ndini nthowa, uneneska ndi umoyu.” (Yohane 14:6) Asani tichita vo Yesu wangukamba kweniso kulondo vo iyu wachitanga, tingaja pa ubwezi ndi Chiuta ndipuso tingaja ndi umoyu wamampha.

Kumbi msewu wakuluta ku umoyu mungawusaniya wuli? Pacharu chapasi pe visopa vinandi, kweni Yesu wangutcheŵeska kuti: “Ndi munthu weyosi cha yo watindidana kuti, ‘Ambuya, Ambuya,’ wazamusere mu Ufumu wakuchanya, kweni yija yo wachita khumbu la Ada wo ŵe kuchanya.” (Mateyu 7:21) Iyu wangukamba so kuti: “Muŵaziŵengi ndi vipasu vawu.” (Mateyu 7:16) Bayibolu lingakuwovyani kuziŵa chisopa chauneneska.​—Yohane 17:17.

Kumbi mungayenda wuli mumsewu wakuluta ku umoyu? Mukhumbika kusambira vakukwaskana ndi munthu yo wakutipaska umoyu: Kumbi iyu ndiyani? Ndi vinthu wuli vo watanja? Kumbi wakhumba kutichitiyanji? Nanga wakhumba kuti isi tichitengenji? *

Pade pakugwira ntchitu, kurya, kuseŵe kweniso kuphwere mabanja ngawu, Chiuta wakhumbanga kuti ŵanthu achitengi so vinthu vinandi. Tingamuziŵa Mulengi widu kweniso tingaja nayu pa ubwezi. Ndipu tingalongo kuti titimuyanja asani tichita khumbu laki. Yesu wangukamba kuti: “Azamusaniya umoyu wamuyaya asani aziŵa yimwi Chiuta yija wauneneska.”​—Yohane 17:3.

Munthu wakhumbika kusintha vinthu vinyaki kuti wasambiri kuchita vinthu vakukondwesa Chiuta yija wauneneska. Kweni kuchita viyo nkhupusu cha. Kukamba uneneska, tingaja ndi umoyu wamampha asani tingayamba kwenda mu msewu wakuluta ku umoyu. Kuti musaniyi kwamuka kwa mafumbu ngakukhumbika ukongwa ngakukwaskana ndi Chiuta, Akaboni aku Yehova mbakunozgeka kusambira namwi Bayibolu kwawezi pa nyengu ndi malu ngo yimwi mungasankha. Mungakambiskana nasi kuziya pa webusayiti yidu ya www.jw.org/tog.