Julani

Lutani pa vo ve mukati

 NKHANI YAKUSAMBIRA YA NAMBALA 43

Mujiperekengi Kwaku Yehova Pe

Mujiperekengi Kwaku Yehova Pe

“Yehova ndi Chiuta yo wakhumba kuti ŵanthu ajiperekengi kwaku iyu pe.”—NAHU. 1:2.

SUMU 51 Tikujipereka Kwaku Chiuta

VO TISAMBIRENGI MU NKHANI IYI *

1. Ntchifukwa wuli tikhumbika kujipereka kwaku Yehova pe?

TIKHUMBIKA kujipereka kwaku Yehova pe chifukwa ndiyu wakutilenga kweniso wakutipaska umoyu. (Chivu. 4:11) Kweni kuchita viyo nkhupusu cha. Chinanga kuti titanja Yehova ndipuso titimutumbika, kweni vinthu vinyaki vingatindokesa kujipereka kwaku iyu pe. Titenere kuziŵa mo venivi vingachitikiya. Chakwamba, tiyeni tikambiskani vo kujipereka kwaku Yehova pe kung’anamuwa.

2. Mwakukoliyana ndi Chituwa 34:14, kumbi tichitengenji asani titijipereka kwaku Yehova pe?

2 Mu Bayibolu, mazu ngakuti kujipereka kwaku Chiuta ngang’anamuwa kumuyanja ukongwa. Asani titijipereka kwaku Yehova pe, tisopengi iyu pe. Ndipu tizomerezengi cha kuti vinthu vinyaki pamwenga munthu munyaki waje pakwamba pa umoyu widu mumalu mwaku Yehova.—Ŵerengani Chituwa 34:14.

3. Ntchifukwa wuli te ndi vifukwa vakuvwika vakujipereke kwaku Yehova?

3 Te ndi vifukwa vakuvwika vakujipereke kwaku Yehova. Ntchifukwa wuli tikamba viyo? Chifukwa chakuti tikujipereka kwaku Chiuta tati tasambira uneneska wakukwaskana ndi iyu. Titanja mijalidu yaki yamampha kweniso tiziŵa vo watanja ndi vo watinkha. Ndipu tituvwa nge mo iyu wavwiya ndi vinthu venivi. Tivwisa chifukwa cho wakutilenge ndipu tichita vo iyu wakhumba mwakuvwiya fundu zaki. Tiwona kuti ndi mwaŵi wapade kuti Yehova wakutizomereza kuti tije mabwezi ngaki. (Sumu 25:14) Chechosi cho tisambira chakukwaskana ndi Mlengi widu chititiwovya kuti tije nayu pa ubwezi.—Yako. 4:8.

4. (a) Kumbi ndi vinthu wuli vo Dyaboli wagwiriskiya ntchitu kuti tileki kujipereka ukongwa kwaku Yehova? (b) Kumbi tikambiskanengenji mu nkhani iyi?

4 Dyaboli ndiyu walamuliya charu chapasi. Iyu watichigwiriskiya ntchitu kuti tiyanjengi ukongwa vinthu vo tikhumba mwakawi kweniso makhumbiru nga liŵavu. (Aefe. 2:1-3; 1 Yoha. 5:19) Dyaboli wakhumba kuti tiyanjengi ukongwa vinthu vinyaki mumalu  mwakwanja Yehova. Tiyeni tikambiskani nthowa ziŵi zo wangachitiya venivi. Chakwamba, wachitiska kuti tiyanjengi ukongwa ndalama. Ndipu chachiŵi, wachitiska kuti tisankhengi vakusangaluska viheni.

TIKHUMBIKA KUPHWERE KUTI TILEKI KWANJA NDALAMA

5. Ntchifukwa wuli tikhumbika kuphwere kuti tileki kwanja ndalama?

5 Mwakawi, tosi tikhumba kuja ndi chakurya chakukwana, malaya ngamampha ndipuso pakugona pamampha. Kweni tikhumbika kuphwere ukongwa kuti tileki kwanja ndalama. Ŵanthu anandi mazuŵa nganu, ‘atanja ndalama’ kweniso katundu. (2 Timo. 3:2) Yesu wanguziŵa kuti akusambira ŵaki angayeseka kuti ayambi kwanja ndalama. Iyu wangukamba kuti: “Palivi munthu yo wangateŵete mabwana ngaŵi, chifukwa watinkhengi yumoza ndi kwanja munyaki, pamwenga wagomezgekengi ku yumoza ndi kunyoza munyaki. Mungaja cha kapolu waku Chiuta ndipuso kapolu wa chuma pa nyengu yimoza.” (Mate. 6:24) Munthu yo wasopa Yehova uku wamaliya nyengu yinandi pakupenja ndalama, ndikuti wateŵete mabwana ngaŵi. Munthu waviyo wangajipereka cha kwaku Yehova pe.

Mo ŵanthu anyaki a ku Lawodikaya ajiwoniyanga . . . mo Yehova ndi Yesu aŵawoniyanga (Wonani ndimi 6)

6. Kumbi tingasambiranji pa vo Yesu wangukambiya Akhristu a ku Lawodikaya?

6 Akhristu a ku Lawodikaya angukamba mazu ngakujikuzga ngakuti: “Nde wakukhupuka, ndasaniya chuma chinandi ndipu ndikhumbika chinthu chechosi cha.” Kweni Yehova ndi Yesu aŵawonanga kuti ‘mbakusuzgika, mbakuchitiska lisungu, mbakavu, mbachibulumutiya ndipuso mbankhuli.’ Yesu wanguŵachenya chifukwa chakuti ŵenga akukhupuka cha. Kweni chifukwa chakuti kwanja chuma kunguchitiska kuti aleki kuja pa ubwezi wamampha ndi Yehova. (Chivu. 3:14-17) Asani tiwona kuti tayamba kwanja ukongwa chuma, tikhumbika kuchitapu kanthu mwaliŵi. (1 Timo. 6:7, 8) Asani tingaleka kuchita viyo, tingayamba kwanja ukongwa vinthu vinyaki ndipu Yehova wangazomereza cha  kusopa kwidu. Iyu “wakhumba kuti ŵanthu ajiperekengi kwaku iyu pe.” (Mara. 4:24) Kumbi vingachitika wuli kuti tiyambi kwanja ukongwa ndalama pa umoyu widu?

7-9. Kumbi musambiranji pa vo vinguchitikiya mura munyaki zina laki David?

7 Tiyeni tikambiskani chakuyeruzgiyapu cha mura munyaki zina laki David wa ku United States, yo wagwiranga ntchitu mwakulimbikiya. Iyu wangukamba kuti wagwiranga ntchitu mwaphamphu ukongwa. Pa kampani yo wagwiranga, angumukweza ntchitu ndipu walondiyanga ndalama zinandi. Ŵanthu amuwonanga kuti watiyiziŵa umampha ukongwa ntchitu yo wagwiranga mucharu cha United States. David wangukamba kuti: “Nyengu zinyaki ndaŵanaŵananga kuti ntchitu iyi mbukaboni wakuti Yehova watinditumbika.” Kweni kumbi Yehova wamutumbikanga nadi?

8 Kamana ndi kamana, David wangwamba kuwona kuti ntchitu yaki yamuchitiskanga kuti waleki kuja pa ubwezi wamampha ndi Yehova. Iyu wanguti: “Asani nde ku maunganu kweniso mu uteŵeti, ndaŵanaŵaniyanga waka za masuzgu nga ku ntchitu. Ndalondiyanga ndalama zinandi ukongwa kweni ndasuzgikanga maŵanaŵanu ndipu nthengwa yidu yingwamba kutimbanyizgika.”

9 David wanguziŵa kuti wakhumbikanga kuwona so vinthu vo wawonanga kuti vakukhumbika ukongwa pa umoyu waki. Iyu wanguti: “Ndingusimikiza mtima kuti ndisinthi mo ndachitiyanga vinthu.” David wakhumbanga kusintha mo wagwiriyanga ntchitu ndipu wanguchikambiskana ndi bwana waki. Kumbi ntchitu wuli cho chinguchitika? David angumutuzga ntchitu! Kumbi iyu wanguchita wuli? David wangukamba kuti: “Mawa laki ndingupempha kuti ndiyambi upayiniya wakovya wakanyengu.” Kuti asaniyengi vinthu vakukhumbika pa umoyu, David ndi muwolu waki angwamba kugwira  ntchitu yakukolopa ndi kupuputa mawindu nganyumba. Pati pajumpha nyengu, wangwamba kuchita upayiniya wa nyengu zosi ndipu pavuli paki, muwolu waki nayu wangwamba kuchita upayiniya. David ndi muwolu waki angusankha kugwira ntchitu yo ŵanthu anandi atiyiwona kuti njakunyozeka. Kweni ntchitu yo agwira ndiyu yakukhumbika ukongwa cha kwaku yiwu. Chinanga kuti asaniya ndalama zimana kuphala zo asaniyanga pakwamba, kweni mwezi wewosi aja ndi ndalama zakukwana zakuguliya vinthu vakukhumbika. Yiwu akhumba kuŵika Yehova pakwamba ndipu awona kuti Yehova watiŵaphwere nadi ŵanthu wo aŵika vinthu va Ufumu pakwamba pa umoyu wawu.—Mate. 6:31-33.

10. Kumbi tingavikiliya wuli mtima widu?

10 Kwali te ndi ndalama zinandi pamwenga cha, tikhumbika kuvikiliya mtima widu. Kumbi tingachita wuli venivi? Mungayanjanga chuma cha. Mungazomerezanga cha kuti ntchitu yo mugwira yije yakukhumbika ukongwa kuluska kuteŵete Yehova. Kumbi mungaziŵa wuli kuti mutanja ukongwa ntchitu yo mugwira? Mungajifumba mafumbu yanga: ‘Kumbi kanandi ndiŵanaŵaniya ukongwa ntchitu yo ndigwira asani nde pa maunganu pamwenga mu uteŵeti? Kumbi nyengu zosi ndifipa mtima kuti ndalama zazakundisoŵa kunthazi? Kumbi ndalama ndi katundu vitambisa mphindanu mubanja? Kumbi ndingagwira ntchitu yo ŵanthu awona kuti njakunyozeka kuti ndije ndi nyengu yinandi yakuteŵete Yehova?’ (1 Timo. 6:9-12) Asani tiŵanaŵaniya mafumbu ngenanga, titenere kukumbuka kuti Yehova watitiyanja. Tikumbukengi so kuti ŵanthu wo atijipereka kwaku iyu, watiŵalayizga kuti: “Ndazakukusiyani cha ndipuso ndazakukujowoni cha.” Ndichu chifukwa chaki wakutumika Paulo wangukamba kuti: “Umoyu winu uje wambula kwanja ndalama.”—Ahe. 13:5, 6.

MUPHWERIYENGI PAKUSANKHA VAKUSANGALUSKA

11. Kumbi ndi vinthu wuli vo vingachitika ku munthu chifukwa cha vakusangaluska vo wasankha?

11 Yehova wakhumba kuti tikondwengi ndi umoyu ndipu vakusangaluska vingatiwovya kuchita viyo. Mwakuti Mazu ngaku Chiuta ngakamba kuti “palivi chinthu chamampha ku munthu kuluska kuti waryi ndi kumwa kweniso kusaniya likondwa chifukwa cha ntchitu yaki yo wagwira mwaphamphu.” (Waku. 2:24) Kweni vakusangaluska vinandi mucharu ichi vingachitiska kuti tije ndi maŵanaŵanu ngaheni. Vingachitiska so kuti ŵanthu ayambi kuja ndi mijalidu yiheni ndipuso kwanja vinthu vo Mazu ngaku Chiuta ngakamba kuti viheni.

Kumbi ndiyani yo wanozga vakusangaluska vo mutanja? (Wonani ndimi 11-14) *

12. Mwakukoliyana ndi 1 Akorinto 10:21, 22, ntchifukwa wuli tikhumbika kuphwere pakusankha vakusangaluska?

 12 Tikhumba kujipereka kwaku Yehova pe. Mwaviyo, tingarya cha “pathebulu laku Yehova” ndi “pathebulu la viŵanda.” (Ŵerengani 1 Akorinto 10:21, 22.) Kanandi asani titurya chakurya ndi munthu munyaki vilongo kuti te nayu pa ubwezi. Asani tisankha vakusangaluska vakukwaskana ndi viwawa, vamizimu, ureŵi pamwenga vo vichitiska kuti tijengi ndi makhumbiru kweniso maŵanaŵanu ngaheni, ndikuti titurya chakurya cho chanozgeka ndi arwani aku Chiuta. Ivi vingachitiska kuti nkharu yidu yinangiki ndipuso vingananga ubwezi widu ndi Yehova.

13-14. (a) Kumbi vakusangaluska viyanana wuli ndi chakurya? (b) Mwakukoliyana ndi Yakobe 1:14, 15, ntchifukwa wuli vakusangaluska viheni vakofya?

13 Kumbi vakusangaluska tingaviyeruzgiya ndi chakurya munthowa wuli? Tingasankha vakurya vo tikhumba kurya. Kweni asani tameza, nyengu yeniyo liŵavu lidu litamba kugwiriskiya ntchitu. Chakurya chamampha chitovya kuti liŵavu lije la nthazi penipo chakurya chiheni chingachitiska kuti tileki kuja ndi liŵavu lamampha. Vingachitika usiku umoza pe cha kuti munthu wawoneki kuti waturya chakurya chamampha pamwenga chiheni. Kweni vingawoneke asani pajumpha nyengu.

14 Mwakuyanana waka, te ndi wanangwa wakusankha vakusangaluska vo tikhumba kuwonere pamwenga kuvwisiya. Kweni vo tasankha vingakwaska maŵanaŵanu ndi mtima widu. Vakusangaluska vamampha vingatikondwesa kweni vakusangaluska viheni vingananga nkharu yidu. (Ŵerengani Yakobe 1:14, 15.) Vo vingachitika chifukwa cha vakusangaluska viheni vingakawone nyengu yeniyo cha, kweni asani pajumpha nyengu. Ndichu chifukwa chaki Bayibolu litititcheŵeska kuti: “Mungalandizgikanga cha: Chiuta ngwakuti wangapusikika cha. Pakuti chechosi cho munthu wamija, ndichu so wazamuvuna; pakuti yo wamija mwakukoliyana ndi liŵavu laki, wazamuvuna kuvunda kutuliya mu liŵavu laki, kweni yo wamija mwakukoliyana ndi mzimu, wazamuvuna umoyu wambula kumala kutuliya mu mzimu.” (Aga. 6:7, 8; mazu ngamumphata.) Mwaviyo, nkhwakhumbika ukongwa kukana vakusangaluska vo vingachitiska kuti tichiti vo Yehova watinkha!—Sumu 97:10.

15. Kumbi Yehova wakutipaska mphasu wuli kuti tikondwengi nayu?

15 Ŵanthu anandi aku Yehova, akondwa kuwonere TV ya JW Broadcasting®. Pa TV iyi pasanirika vakusangaluska vamampha ukongwa. Mzichi munyaki zina laki Marilyn wangukamba kuti: “TV ya JW Broadcasting yandiwovya kuti ndije ndi maŵanaŵanu ngamampha ndipu ndiwonere chechosi chifukwa vosi vamampha. Asani ndachita phukwa pamwenga asani ndaguŵa ndi vinthu vinyaki, ndifufuzapu nkhani yo yingandichiska pamwenga pulogiramu ya Kusopa kwa Mulenji yo ndingawonere. Venivi vitindiwovya kuja pafupi ndi Yehova kweniso gulu laki. TV ya JW Broadcasting yandiwovya ukongwa pa umoyu wangu.” Kumbi yimwi muyanduwa ndi mphasu yeniyi yakutuliya kwaku Yehova? Kusazgiyapu pulogiramu ya mwezi ndi mwezi, pa TV ya JW Broadcasting pasanirika so vinthu vakuvwisiya kweniso mavidiyo nganandi. Pasanirika so sumu zakuchiska zo mungavwisiya pamwenga kuwonere nyengu yeyosi.

16-17. Ntchifukwa wuli tikhumbika kuphwere ndi nyengu yo timaliya pa vakusangaluska? Ndipu tingachita wuli venivi?

16 Tikhumbika kuphwere ndi mtundu wa vakusangaluska vo tisankha kweniso utali wa nyengu yo timaliya pa vakusangaluska venivi. Asani tingaleka kuphwere, tingamaliya nyengu yinandi pa vakusangaluska mumalu mwakuteŵete Yehova. Ŵanthu anandi atondeka kujiko asani achita vakusangaluska mwakuti amaliya nyengu yinandi pa vinthu venivi. Mzichi munyaki wa vyaka 18, zina laki Abigail, wangukamba kuti: “Kuwonere  TV kutindiwovya kuti ndipepuki maŵanaŵanu asani ndavuka. Kweni asani ndaleka kuphwere ndingamaliya nyengu yinandi kuwonere TV.” Mubali munyaki zina laki Samuel wangukamba kuti: “Nyengu zinyaki ndiwonere mavidiyo ngamanangamana nganandi pa Intaneti. Nditamba kuwonere vidiyo yimoza ndipu nditaziwamu pavuli kuti ndamala maora ngatatu pamwenga nganayi kuwonere mavidiyo ngenanga.”

17 Kumbi mungachita wuli kuti muleki kumaliya nyengu yinandi pa vakusangaluska? Chinthu chakwamba cho mungachita, nkhusaniya utali wa nyengu yo mumaliya pa vakusangaluska. Pavuli paki, mungalemba utali wa nyengu yo mumaliya pa vakusangaluska kwa sabata yimoza. Mungalemba utali wa nyengu yo mumaliya pa kuwonere TV, kufufuza vinthu pa Intaneti, kutchaya magemu pa foni kweniso kugwira ntchitu zapanyumba. Pangani ndondomeku yakuti mumaliyengi nyengu yinandi pakuchita vinthu vakukhumbika ukongwa kuti mumaliyengi nyengu yimanavi pa vakusangaluska. Pavuli paki, mupemphengi Yehova kuti wakuwovyeni kuchita vo mwalemba. Asani muchitengi viyo, muŵengi ndi nyengu kweniso nthazi zakusambiriya Bayibolu pakumwija, kuchita kusopa kwa pabanja, kuluta ku maunganu kweniso kugwira ntchitu yakupharazga ndi kusambiza ŵanthu. Kweniso mukondwengi ukongwa ndi nyengu yo mumaliyengi pa vakusangaluska chifukwa mutamba dankha kuchita vinthu vakukhumbika ukongwa.

LUTIRIZGANI KUJIPEREKA KWAKU YEHOVA PE

18-19. Kumbi tingalongo wuli kuti tikujipereka kwaku Yehova pe?

18 Wati walemba vakukwaskana ndi charu chifya cho chituza kweniso umaliru wa charu chaku Satana, wakutumika Peturo wangukamba kuti: “Akwanjiwa, pakuti mulindizga vinthu venivi, ŵikanipu mtima kuti pakumaliya iyu wazikusaniyeni ambula mdonthu, ambula kalema ndipuso mwe muchimangu.” (2 Petu. 3:14) Asani tivwiya ulongozgi wenuwu ndi kuchita vosi vo tingafiska kuti tije ndi nkharu yamampha kweniso kuti titeŵetiyengi Yehova munthowa yo wakhumba, tilongo kuti tikujipereka kwaku iyu pe.

19 Satana ndi ŵanthu ŵaki alutirizgengi kutiyesa kuti tisinthi vinthu vo tiwona kuti vakukhumbika ukongwa. (Luka 4:13) Kweni kwali tingakumana ndi masuzgu nga mtundu wuli, tizomerezengi cha kuti vinthu vinyaki pamwenga munthu munyaki waje pakwamba pa umoyu widu mumalu mwaku Yehova. Tisimikiza mtima kuti tijiperekengi kwaku Yehova pe!

SUMU 30 Ada Ŵangu, Chiuta Wangu Ndipuso Bwezi Langu

^ ndimi 5 Tikujipereka kuti tisopengi Yehova. Kweni kumbi titijipereka kwaku iyu pe? Vo tisankha pa umoyu widu vingatiwovya kuziŵa kwamuka kwa fumbu lenili. Kuti tiziŵi asani titijipereka kwaku Yehova pe, tikambiskanengi vinthu viŵi. Vinthu ivi ndi ndalama ndipuso vakusangaluska.

^ ndimi 53 CHITHUZI: Tingarya cha chakurya cho chabikika mukhichini la ukazuzi. Mwakuyanana waka, titenere cha kuwonere vakusangaluska va chiwawa, ureŵi pamwenga vamizimu.