Julani

Lutani pa vo ve mukati

1918​—Vyaka 100 vo Vajumpha

1918​—Vyaka 100 vo Vajumpha

Chigongwi cha Alinda cha January 1, 1918 chingwamba ndi fumbu lakuti: Kumbi vinthu viŵengi wuli mu chaka cha 1918? Nkhondu Yakwamba ya Pacharu Chosi ndipu yeche kuchitika ku Europe. Kweni vo vinguchitika kukwamba kwa chaka ichi, valongonga nge kuti vinthu viŵengi umampha kwa Akusambira Bayibolu kweniso ku ŵanthu wosi.

AKAMBANGA ZA CHIMANGU

Pa 8 January 1918, Pulezidenti Woodrow Wilson wangukamba fundu 14 pa nkhumanu yo yinguchitika ku United States. Iyu wawonanga kuti fundu izi ziwovyengi pakujalikisa “chimangu ndi urunji.” Pulezidenti Woodrow wangusachizga kuti vyaru vikambiskanengi ndipuso vileki kupanga vidya va nkhondu. Wangusachizga so kuti apangi “wupu wapacharu chosi” wo watingi uwovyengi “vyaru vimanavimana ndi vikuluvikulu.” Pavuli paki, “fundu 14” zo wangukamba anguzigwiriskiya ntchitu pakupanga wupu wa League of Nations ndipuso pakusayina chikalata cha mo angamalisiya Nkhondu Yakwamba Yapacharu Chosi.

AKUSUSKA ANGULUZA

Chinanga kuti angukumana ndi vinthu vinyaki vakusuzga mu chaka cha 1917, * kweni Akusambira Bayibolu awonanga kuti vinthu viŵengi umampha mu chaka cha 1918. Venga viyo chifukwa cha vo vinguchitika pa unganu wa Watch Tower Bible and Tract Society.

Pa unganu wo unguchitika pa 5 January, 1918, ŵanthu anyaki wo angudikiskika pa Beteli akhumbanga kuti alongozgengi gulu la Akusambira Bayibolu. Richard H. Barber yo wenga wakuwonere dera pa nyengu iyi, ndiyu wangupemphera ŵechendayambi kukambiskana. Ŵati akonkhoska lipoti la mo ntchitu yakupharazga yingwende mu 1917, angwamba kusankha wo atingi aŵengi alongozgi. Mubali Barber wangusankha Joseph Rutherford ndi abali anyaki 6. Pavuli paki, loya yo wenga kuchigaŵa cha ŵanthu akususka wangusankha ŵanthu 7 kusazgapu wo angudikisika pa Beteli. Kweni yiwu anguluza. Mubali Rutherford ndi anyaki 6 ndiwu angusankhika chifukwa chakuti ŵanthu anandi akhumbanga yiwu.

Abali anandi wo ŵengapu pa unganu uwu, angukamba kuti “unganu uwu wenga wamampha ukongwa kuphara maunganu ngosi ngo anguchitapu.” Kweni likondwa lawu lenga la kanyengu kamanavi.

MO ŴANTHU ANGUCHITIYA NDI BUKU LA THE FINISHED MYSTERY

Kwa myezi yinandi Akusambira Bayibolu agaŵiyanga buku la The Finished Mystery. Ŵanthu amtima wamampha wo anguŵerenga buku ili anguyanduwa ndi uthenga wa mu Bayibolu.

E.F. Crist yo wenga wakuwonere dera ku Canada wangukamba vo munthu munyaki ndi muwoli waki anguchita ŵati aŵerenga buku la The Finished Mystery. Iyu wangukamba kuti yiwu angugomezga uneneska wo angusambira kwa masabata ngankhondi pe. Crist wanguti: “Wosi ŵaŵi atijipereka ukongwa ndipu aluta panthazi mwauzimu.”

Munthu munyaki yo wanguŵerengapu buku ili wangupaskaku so anyaki. Iyu “wangukwaskika” ndi uthenga waki ndipu wangukamba kuti: “Ndichijumpha mumsewu unyaki wa Third Avenue munthu wangundipuma ndi chinthu paphewa cho ndaŵanaŵananga kuti ntchinjerwa kweni lenga buku la ‘The Finished Mystery.’ Ndati ndafika kunyumba ndinguliŵerenga losi. . . . Pavuli paki ndinguvwa kuti yo wangutaya buku ili wenga muliska . . . yo wangulihucha pa windu la nyumba yaki  chifukwa cha kukwiya . . . Ndiwona kuti vo iyu wanguchita pa kuponya buku ili, vinguwovya ŵanthu anandi kuziŵa uneneska kuluska vinthu vinyaki vosi vo wanguchita pa umoyu waki. . . . Chifukwa cha ukali wa muliska uyu, sonu titeŵete Chiuta.”

Muliska uyu ndiyu pe cha yo wangukwiya ndi buku ili. Pa 12 February, 1918, arara a boma ku Canada angukanizga abali kuti aleki kugaŵiya buku ili. Yiwu anguchita viyo chifukwa awonanga kuti lenga ndi fundu zakuyukiya boma kweniso zakususka wo achitanga nkhondu. Pati pajumpha nyengu yimanavi arara a boma ku United States nawu anguchita so viyo. Akumiya boma anguza kuzifufuza ku Beteli ndi kumaofesi ngidu ngo ngenga ku New York, ku Pennsylvania ndi ku California kuti aziŵi wo alongozganga gulu la Akusambira Bayibolu. Pa 14 March, 1918, dipatimenti yakuwona va urunji ku United States yingukanizga buku la The Finished Mystery. Yiwu akambanga kuti buku ili lakambanga vinthu viheni vakukwaskana ndi boma la United States, marangu ngaki ndi asilikali.

ANGUMANGIKA!

Pa 7 May 1918, dipatimenti yakuwona va urunji yingulonda chikalata ku khoti chakuŵazomereza kuti akamangi Giovanni DeCecca, George Fisher, Alexander Macmillan, Robert Martin, Frederick Robison, Joseph Rutherford, William Van Amburgh, ndi Clayton Woodworth. Abali yaŵa anguŵazenga mulandu wakuti “agongoweskanga asilikali a charu cha United States kugwira ntchitu yawu kweniso akananga kusere usilikali.” Mulandu wawu ungwamba pa 3 June, 1918. Kweni venga vakukayikisa kuti angawina. Chifukwa wuli?

Loya wa boma la United States wangukamba kuti dangu lo lakanizganga kukamba vinthu viheni vakukwaskana ndi boma lenga “chidya chakulimbana ndi ŵanthu wosi wo akambanga vinthu viheni vakukwaskana ndi boma.” Pa 16 May 1918, mphara ya marangu yingukana kupanga dangu lasonu lo latingi livikiriyengi ŵanthu wo alembanga nkhani zuneneska. Buku la The Finished Mystery ndilu angukambiskana ukongwa. Pakukamba za buku ili, mphara ya marangu ya ku United States yingukamba kuti: “Chinthu chimoza chakofya ukongwa cho chikamba vinthu viheni vakukwaskana ndi boma, ndi buku la ‘The Finished Mystery’ . . . Buku ili ligongoweska asilikali kuchita nkhondu kweniso . . . kuti ŵanthu aleki kusere usilikali.”

Pa 20 June 1918, kagulu ka ŵanthu wo angusankhika kuti kawoni mulandu uwu, kangukamba kuti abali 8 ŵenga akunanga. Mawa laki, munthu yo wayeruzganga wangupereka chilangu kwa abali yaŵa. Iyu wangukamba kuti: “Vinthu viheni vakukwaskana ndi boma vo ŵanthu yaŵa apharazga . . . vakofya ukongwa kuluska kagulu ka Asilikali a ku German. . . . Yiwu akhumbika kupaskika chilangu chikulu ukongwa.” Pati pajumpha masabata ngaŵi, abali 8 yaŵa anguŵayeruzga kuti aje mujeri kwa vyaka vakupambanapambana kwambiya 10 mpaka 20. Yiwu anguŵaŵika mujeri lo lenga mutawuni ya Atlanta ku Georgia.

ANGULEKA CHA KUPHARAZGA

Pa nyengu iyi, Akusambira Bayibolu atombozgekanga ukongwa. Wupu unyaki wakufufuza nkhani wa The Federal Bureau of Investigation (FBI), ungufufuza vo Akusambira Bayibolu achitanga ndipu ungulemba vinthu  vinandi. Vo angulemba vingulongo kuti abali ndi azichi akhumbanga cha kuleka kupharazga.

Mu kalata yo Bwana wa positi ofesi ya mutawuni ya Orlando ku Florida wangulembe wupu wa FBI wangukamba kuti: “[Akusambira Bayibolu] apharazga kunyumba ndi nyumba ndipu achita venivi ukongwa ndi usiku. . . . Yiwu akhumbisiska kulutirizga kupharazga chinanga kuti asuskika.”

Mura munyaki wa asilikali wangulembe kalata wupu wa FBI kuti wawuziŵisi vo mubali Frederick W. Franz wachitanga. Mubali Franz wanguziteŵetiyapu mu Wupu Wakulongozga. Iyu wangulemba kuti: “F. W. Franz . . . wagaŵiyapu mabuku nganandi nga ‘Finished Mystery’.”

Charles Fekel yo nayu wanguziteŵetiyapu mu Wupu Wakulongozga, wangutombozgeka ukongwa. Arara aboma angumumanga chifukwa chakugaŵiya buku la The Finished Mystery. Yiwu afufuzanga so makalata ngo iyu walembiyananga ndi ŵanthu pa nyengu yo wenga mujeri. Mubali Charles wangumangika ku Maryland, mutawuni ya Baltimore kwa mwezi umoza. Iyu amudananga kuti “murwani wa ku Austria.” Penipo waŵapharazgiyanga mwachiganga wo amufumbanga mafumbu, iyu wangukumbuka vo Paulo wangukamba pa 1 Akorinto 9:16. Pa lemba ili pakamba kuti: “Soka ini asani ndileka kupharazga uthenga wamampha!” *

Kusazgiyapu pa kupharazga mwaphamphu, Akusambira Bayibolu angulemba chikalata kuti boma lituzgi abali wo angumangika ku Atlanta ndipu angupempha ŵanthu kuti asayinepu. Anna K. Gardner wangukamba kuti: “Tajangapu ŵaka cheti cha. Penipo abali ŵidu ŵenga mujeri, tapemphanga ŵanthu kuti alembi masiginesha pa chikalata cho tingulemba. Tayendanga nyumba ndi nyumba. Ŵanthu anandi angulembapu masiginesha ngawu. Taŵakambiyanga kuti abali wo angumangika ŵenga Akhristu auneneska ndipu angumangika kwambula chifukwa.”

MAUNGANU NGAKULUNGAKULU

Mu nyengu yakusuzga yeniyi, maunganu ngakulungakulu ngachitikanga kaŵikaŵi kuti abali achiskiki mwauzimu. Chigongwi cha Alinda chingukamba kuti: “Maunganu ngakulungakulu ngakujumpha 40 . . . ngachitika chaka chinu . . . Abali alonde malipoti ngakulongo kuti chiŵerengeru cha abali chingusazgikiyaku pa maunganu ngosi ngenanga. Pakwamba maunganu ngosi ngachitikanga muchihanya pamwenga kukwamba kwa chifuku; kweni sonu ngachitika mwezi wewosi.”

Ŵanthu amtima wamampha ŵenga ŵeche kuvwisiya uthenga wamampha. Pa unganu unyaki wo unguchitikiya mutawuni ya Cleveland ku Ohio, penga ŵanthu 1,200 ndipu 42 angubatizika. Yumoza mwa ŵanthu wo angubatizika wenga mnyamata mumana. Arara wo alekanga kugomezga Chiuta atenere kuti achitanga soni asani avwa va mnyamata uyu.

VO VINGUCHITIKA PAVULI PAKI

Po chaka cha 1918 chenga pafupi kumala, Akusambira Bayibolu aziŵanga cha vo vatingi vichitikengi. Yiwu angugulisa maofesi ngawu nganyaki ku Brooklyn ndipu angusamusiya likulu lawu mutawuni ya Pittsburgh ku Pennsylvania. Penipo wo alongozganga asuzgikanga mujeri, abali angupangana kuti achiti unganu wapachaka pa 4 January, 1919, kuti asankhi alongozgi anyaki. Kumbi ntchinthu wuli cho chinguchitika?

Abali angulutirizga ntchitu yawu. Yiwu akayikiyanga cha kuti vinthu viyendengi umampha pa unganu uwu. Ndichu chifukwa chaki angusankha Yesaya 54:17 kuja lemba la chaka cha 1919. Lemba ili likamba kuti: “Palivi chidya chakupangikiya iwi cho chazamupunda.” Vo vinguchitika pa unganu uwu, vinguwovya abali kuja ndi chivwanu chakukho kweniso akunozgeka kugwira ntchitu yikulu yo yenga kunthazi kwawu.

^ ndimi 6 Wonani nkhani yamutu wakuti “Zimene Zinachitika Zaka 100 Zapitazo Mu 1917” mu Buku Lapachaka la Mboni za Yehova la 2017 peji 172-176.

^ ndimi 22 Wonani mbiri ya umoyu wa mubali Charles Fekel mu nkhani ya mutu wakuti, “Joys Through Perseverance in Good Work” mu Chigongwi cha Alinda cha Chingelezi cha March 1, 1969.