Julani

Lutani pa vo ve mukati

 NKHANI YAKUSAMBIRA YA NAMBALA 45

Kumbi Mzimu Wakupaturika Utitiwovya Wuli?

Kumbi Mzimu Wakupaturika Utitiwovya Wuli?

“Mu vinthu vosi ndija ndi nthazi kuporote mwaku yo watindipaska nthazi.”​—AFI. 4:13.

SUMU 104 Mzimu Wakupaturika Ndi Mphasu Yakutuliya Kwaku Chiuta

VO TISAMBIRENGI MU NKHANI IYI *

1-2. (a) Kumbi ntchinthu wuli cho chititiwovya kuti tikunthiyengepu masuzgu zuŵa lelosi? Konkhoskani. (b) Kumbi tikambiskanengenji mu nkhani iyi?

“ASANI ndiŵanaŵaniya mayeseru ngo ndakumana nangu, ndiziŵa kuti ndatingi ndimalanengi nangu cha ndija.” Kumbi mukukambapu mazu yanga? Tanandi tikukambapu. Panyaki mungukamba viyo mwati mwakunthiyapu matenda ngakulu pamwenga nyifwa ya mubali winu. Asani mukumbuka masuzgu ngo mungukumana nangu, muwona kuti mungukunthiyapu chifukwa chakuti mzimu wakupaturika waku Yehova ungukupaskani “nthazi yakujumpha yo tituŵa nayu.”—2 Akori. 4:7-9.

2 Tithemba so mzimu wakupaturika kuti timalani ndi vinthu viheni vo vichitika mucharu ichi. (1 Yoha. 5:19) Kweniso tikhumbika nthazi kuti tilimbani ndi “mizimu yiheni.” (Aefe. 6:12) Mu nkhani iyi, tikambiskanengi mo mzimu wakupaturika utitiwovye kumalana ndi masuzgu ngenanga. Tiwonengepu nthowa ziŵi. Kutuwa po, tikambiskanengi vo tingachita kuti tiyanduwengi ukongwa ndi mzimu wakupaturika.

MZIMU WAKUPATURIKA UTITIPASKA NTHAZI

3. Kambani nthowa yimoza yo Yehova watitiwovye kuti tikunthiyengepu mayeseru.

3 Mzimu wakupaturika waku Yehova utitiwovya chifukwa utitipaska nthazi kuti tifiski maudindu ngo tenangu chinanga kuti tikumana ndi mayeseru. Mwakuyeruzgiyapu, chinanga kuti wakutumika Paulo wakumananga ndi masuzgu, wanguwona kuti wangukwaniska kuteŵete Yehova chifukwa chakuti wathembanga “nthazi yaku Khristu.” (2 Akori. 12:9) Pa ulendu waki wachiŵi wa umishonale, Paulo wafwiyangapu kupharazga kweniso wagwiranga ntchitu kuti wasaniyi vinthu vakukhumbika pa umoyu. Po wenga ku Korinto, wajanga ndi Akula ndi Purisila. Yiwu asonanga mahema. Chifukwa chakuti Paulo nayu wasonanga mahema, mazuŵa nganyaki wagwiranga nawu ntchitu yeniyi. (Machi. 18:1-4) Mzimu wakupaturika ungumupaska  nthazi Paulo kuti wagwiri ntchitu yakusona mahema kweniso kupharazga.

4. Mwakukoliyana ndi 2 Akorinto 12:7b-9, kumbi Paulo wenga ndi suzgu wuli?

4 Ŵerengani 2 Akorinto 12:7b-9. Kumbi Paulo wang’anamuwanganji pakukamba kuti wasuzgikanga ndi “minga muliŵavu”? Asani minga wakuhomani kuphazi mutuvwa urwirwi ukulu. Yapa, Paulo wang’anamuwanga kuti wangukumana ndi suzgu yakuŵaŵa nge minga. Iyu wangukamba kuti suzgu iyi wenga “mungelu waku Satana” yo ‘wamuwombanga makofi’ (‘wamupumanga,’ mazu ngamumphata.) Panyaki Satana ndi angelu ŵaki ndiwu cha angumuhoma minga Paulo pamwenga kuti kuchitiska suzgu lo wenga nalu. Kweni mizimu yiheni yeniyi yati yawona kuti Paulo we ndi “minga” muliŵavu pamwenga kuti we ndi suzgu, yitenere kuti yingusazgiyaku suzgu lo wenga nalu. Kumbi Paulo wanguchita wuli?

5. Kumbi Yehova wangumuka wuli mapempheru ngaku Paulo?

5 Pakwamba, Paulo wakhumbanga kuti Yehova wamutholi “minga” wo wenga nawu. Iyu wangukamba kuti: “Katatu kosi ndingupempha Ambuya [Yehova] . . . kuti minga wenuwu utuwemu mwaku ini.” Kweni chinanga kuti Paulo wangupemphera, minga wenuwu ungutuwamu cha muliŵavu laki. Kumbi ivi ving’anamuwa kuti Yehova wangumuka cha mapempheru ngaku Paulo? Awa. Iyu wangumuka. Yehova wangumaliska cha masungu ngo Paulo wakumananga nangu kweni wangumupaska nthazi kuti wakunthiyepu. Yehova wangukamba kuti: “Nthazi yangu yija yakufikapu mu kulopwa.” (2 Akori. 12:8, 9) Chifukwa chakuti Chiuta wangumuwovya, Paulo wangulutirizga kukondwa kweniso kuja ndi chimangu chamumtima!—Afi. 4:4-7.

6. (a) Kumbi Yehova wangamuka wuli mapempheru ngidu? (b) Kumbi malemba ngo nge mu ndimi iyi ngatikusimikiziyaninji?

6 Kumbi namwi mukumupemphapu Yehova kuti wamaliski masuzgu ngo mukumana nangu nge mo Paulo wanguchitiya? Panyaki mwati mwapemphera kananandi waka kutuliya pasi pamtima, suzgu lo lingumala cha pamwenga lingusazgikiyaku. Kumbi mungwamba kuŵanaŵana kuti akhumba Yehova wakondwa namwi cha? Asani ndi viyo, mukumbukengi vo vinguchitikiya Paulo. Nge mo Yehova wangumukiya mapempheru ngaki, namwi wakumukeningi! Nyengu zinyaki Yehova wangatuzgapu cha masuzgu ngo mungakumana nangu. Kweni wangagwiriskiya ntchitu mzimu wakupaturika kuti ukupaskeni nthazi kuti mukunthiyepu. (Sumu 61:3, 4) ‘Mungawisikiya pasi,’ kweni Yehova wakujowoningi cha.—2 Akori. 4:8, 9; Afi. 4:13.

MZIMU WAKUPATURIKA UNGAKUWOVYANI KUTI MULUTIRIZGI KUTEŴETE YEHOVA

7-8. (a) Kumbi mzimu wakupaturika uyanana wuli ndi mphepu? (b) Kumbi Peturo wangugwiriskiya ntchitu vinthu wuli pakukonkhoska mo mzimu wakupaturika ugwiriya ntchitu?

7 Kumbi mzimu wakupaturika utitiwovya so wuli? Mphepu yamampha yitovya kuti boti liyendi umampha panyanja asani yayuka. Mwakuyanana waka, mzimu wakupaturika ungatiwovya kuti tijumphi mu masuzgu nga nge mphepu, ndi kulutirizga kuteŵete Yehova mpaka mucharu chifya.

8 Chifukwa chakuti wakutumika Peturo wenga mulovi, waziŵanga umampha vo vichitikiya boti asani litenda panyanja. Mwaviyo, mphakuvwika kuti wanguyeruzgiya mo boti litende panyanja pakukonkhoska mo mzimu wakupaturika ugwiriya ntchitu. Iyu wangukamba kuti: “Palivi nyengu yo uchimi ukuzapu chifukwa cha khumbu la munthu, kweni ŵanthu alongoronga mazu ngakutuliya kwaku Chiuta mwakukoliyana ndi mo mzimu wakupaturika waŵalongozgiyanga.” Mazu Ngachigiriki ngo akungafwatuliya kuti “waŵalongozgiyanga,” ngang’anamuwa kuti mo “waŵapingiyanga.”—2 Petu. 1:21; mazu ngamumphata.

9. Kumbi ntchinthu wuli cho chituza mumaŵanaŵanu nginu asani mwavwa mazu ngakuti “waŵapingiyanga” ngo Peturo wangukamba?

9 Kumbi ntchinthu wuli cho chituza mumaŵanaŵanu nginu asani mwavwa mazu ngakuti “waŵapingiyanga” ngo Peturo wangukamba? Mazu Ngachigiriki ngenanga, ndingu Luka yo wangulemba buku la Machitidu wangugwiriskiya  ntchitu pakukonkhoska va sitima yo ‘yapingikanga’ ŵaka ndi mphepu. (Machi. 27:15) Mwaviyo, nge mo wangukambiya munthu munyaki, Peturo wachilemba kuti ŵanthu wo alembanga Bayibolu ‘apingikanga’ ndi mzimu wakupaturika, wangugwiriskiya ntchitu mazu ngo ŵanthu wo atenda panyanja akamba. Pakukamba viyo, Peturo wang’anamuwanga kuti nge mo sitima yipingikiya ndi mphepu kuti yikafiki ko yiluta, ndimu so achimi ndi ŵanthu wo angulemba Bayibolu apingikiyanga ndi mzimu wakupaturika kuti afiski ntchitu yawu. Munthu yo tamukamba pachanya yapa wangukamba so kuti: “Ŵanthu wo angulemba Bayibolu angukweza mathanga ngawu” pamwenga kuti ŵenga akunozgeka kugwira ntchitu yo Yehova wanguŵapaska. Yehova wanguchita chigaŵa chaki. Wanguŵapaska “mphepu,” pamwenga kuti mzimu wakupaturika. Wo angulemba Bayibolu nawu anguchita chigaŵa chawu. Yiwu anguzomera kulongozgeka ndi mzimu wakupaturika.

CHINTHU CHAKWAMBA: Nyengu zosi muchitengi vinthu vo Yehova wakhumba kuti ŵanthu ŵaki achitengi

CHINTHU CHACHIŴI: Muchitengi vo mungafiska pakuchita vinthu venivi (Wonani ndimi 11) *

10-11. Kumbi ndi vinthu viŵi nivi vo titenere kuchita kuti mzimu wakupaturika utilongozgengi? Konkhoskani.

10 Chinanga kuti Bayibolu likumala kali kulembeka, kweni Yehova wechekugwiriskiya ntchitu mzimu wakupaturika pakulongozga ŵanthu ŵaki. Yehova weche kuchita chigaŵa chaki. Kumbi tingachita wuli kuti tiyanduwengi ndi mzimu wakupaturika waku Chiuta? Tikhumbika kuyesesa kuchita chigaŵa chidu. Kumbi tingachita wuli venivi?

11 Ŵanaŵaniyani chakuyeruzgiyapu ichi. Kuti munthu yo watendesa boti wayanduwi ndi mphepu, watenere kuchita vinthu viŵi. Chakwamba, watenere kuja po paputa mphepu. Boti laki lingayenda cha asani wangaja kutali ndi ko kuputa mphepu. Chachiŵi, wakhumbika kukweza ukongwa mathanga ngaki. Chinanga mphepu yingaputa umampha kweni asani yo watendesa waleka kukweza mathanga boti lingayenda cha. Mwakuyanana ŵaka, tingalutirizga kuteŵete Yehova pijapija asani mzimu wakupaturika utitiwovya. Kuti tiyanduwengi ndi mzimu uwu, titenere kuchita vinthu viŵi. Chakwamba, tikhumbika kuchita vinthu vo mzimu wakupaturika ukhumba kuti ŵanthu aku Chiuta achitengi. Chachiŵi, tikhumbika “kukweza ukongwa mathanga ngidu”  mwakuchita vo tingafiska pakuteŵete Yehova. (Sumu 119:32) Asani tichita vinthu venivi, mzimu wakupaturika utiwovyengi kuti tijumphi mumayeseru nga nge mayiŵa ndi kulutirizga kuteŵete Yehova mwakugomezgeka mpaka tikasere mucharu chifya.

12. Kumbi sonu tikambiskanengenji?

12 Kufika yapa, takambiskana kuti mzimu wakupaturika utitiwovya mu nthowa ziŵi. Mzimu wakupaturika utitipaska nthazi kweniso utitiwovya kuti tilutirizgi kuja akugomezgeka asani tikumana ndi masuzgu. Kweniso utitilongozga ndi kutiwovya kuti tilutirizgi kuteŵete Yehova. Ndipu venivi vazakutiwovya kuti tizisaniyi umoyu wamuyaya. Sonu tikambiskanengi vinthu vinayi vo titenere kuchita kuti tiyanduwengi ukongwa ndi mzimu wakupaturika.

VO TINGACHITA KUTI TIYANDUWENGI NDI MZIMU WAKUPATURIKA

13. Malinga ndi 2 Timote 3:16, 17, kumbi Malemba ngangatiwovya wuli, kweni isi tikhumbika kuchitanji?

13 Chakwamba, tisambirengi Mazu ngaku Chiuta. (Ŵerengani 2 Timote 3:16, 17.) Mazu Ngachigiriki ngo akungafwatuliya kuti ‘kukambirika,’ ngang’anamuwa “kututiya.” Chiuta wangugwiriskiya ntchitu mzimu wakupaturika kuti ‘watutiyi’ pamwenga kuti wapangizi ŵanthu wo alembanga Bayibolu. Asani tiŵerenga Bayibolu ndi kuŵanaŵaniyapu vo taŵerenga, fundu zaku Chiuta zisere mumaŵanaŵanu ndi mumtima widu. Fundu zenizi zititiwovya kuti tisinthi umoyu widu kuti tikondwesengi Chiuta. (Ahe. 4:12) Kweni kuti tiyanduwengi ukongwa ndi mzimu wakupaturika, titenere kupatuwa nyengu kuti tisambirengi Bayibolu nyengu zosi ndi kuŵanaŵaniyapu ukongwa vo tasambira. Asani tichita viyo, vo tikamba ndi kuchita vilongongi kuti tilongozgeka ndi Mazu ngaku Chiuta.

14. (a) Ntchifukwa wuli tingakamba kuti mzimu wakupaturika utuŵa pa maunganu ngidu? (b) Kumbi ntchinthu wuli cho chingatiwovya kuti tiyanduwengi ukongwa ndi mzimu wakupaturika asani te pa maunganu?

14 Chachiŵi, tisopengi Chiuta limoza ndi anyidu. (Sumu 22:22) Pa maunganu patuŵa mzimu waku Yehova. (Chivu. 2:29) Ntchifukwa wuli tikamba viyo? Chifukwa asani tawungana pamoza ndi Akhristu anyidu, tipempha Yehova kuti watipaski mzimu wakupaturika, titumba sumu za Ufumu zakutuliya mu Mazu ngaku Chiuta kweniso tivwisiya nkhani za mu Bayibolu zo zikambika ndi abali wo akusankhika ndi mzimu wakupaturika. Ndipuso mzimu wakupaturika wenuwu utovya azichi kuti anozgekiyengi ndi kukamba nkhani zo apaskika. Kweni kuti tiyanduwengi ukongwa ndi mzimu wakupaturika, tikhumbika kunozgeke kuti tikamukengepu pa maunganu. Asani tichita viyo, tija akunozgeka kulonde mzimu wakupaturika nge mo lichitiya boti lo “akweza mathanga.”

15. Kumbi mzimu wakupaturika utitiwovya wuli mu uteŵeti?

15 Chachitatu, tigwirengi ntchitu yakupharazga. Asani tigwiriskiya ntchitu Bayibolu pakupharazga kweniso pakusambiza ŵanthu, tizomera kuti mzimu wakupaturika utiwovyi mu uteŵeti. (Aro. 15:18, 19) Kweni kuti tiyanduwengi ukongwa ndi mzimu waku Chiuta, tikhumbika kupharazga kaŵikaŵi ndi kugwiriskiya ntchitu Bayibolu po mphakwenere. Chinthu chimoza cho chingakuwovyani kuti mukambiskanengi umampha ndi ŵanthu mu uteŵeti, nkhugwiriskiya ntchitu masachizgu nga mo mungakambiskiyana ndi ŵanthu ngo ngatuŵa mu Kabuku ka Unganu wa Umoyu Widu Ndipuso Uteŵeti.

16. Kumbi tingachita so wuli kuti tilonde mzimu wakupaturika?

16 Chachinayi, tipempherengi kwaku Yehova. (Mat. 7:7-11; Luka 11:13) Kuti tilonde mzimu wakupaturika, tikhumbika kupemphera kwaku Yehova. Palivi cho chingatondekesa mapempheru ngidu kuti ngafiki kwaku Yehova pamwenga cho chingajalizga kuti tileki kulonde mzimu waku Chiuta. Chinanga wangaŵa Satana wangachita cha venivi ndipu tingalonde mzimu wakupaturika chinanga tingaŵa mujeri. (Yako. 1:17) Kumbi tikhumbika kupemphera wuli kuti tiyanduwengi ndi mzimu wakupaturika? Kuti timuki fumbu ili,  tiyeni tikambiskani ntharika yo ye mubuku laku Luka pe. *

MUPEMPHERENGI MWACHITATATA

17. Kumbi ntharika yaku Yesu yo ye pa Luka 11:5-9, 13, yititisambizanji pa nkhani ya pempheru?

17 Ŵerengani Luka 11:5-9, 13. Ntharika yaku Yesu yititilongo vo titenere kuchita asani tipempha mzimu wakupaturika. Mu ntharika iyi, munthu yo wapemphanga wangupaskika vo wakhumbanga “chifukwa cha kupempha mwachitatata.” Iyu wanguchita mantha cha kupempha mubwezi waki kuti wamuwovyi chinanga kuti wenga usiku pakati. (Wonani vo tisambira pa mazu ngakuti kupempha mwachitatata mu Malifalensi nga Nkhani za Unganu wa Umoyu Widu Wachikhristu Ndipuso Uteŵeti nga July 2018, papeji 5-6.) Kumbi Yesu wangukamba kuti ntharika iyi yikoliyana wuli ndi pempheru? Iyu wanguti: “Lutirizgani kupempha ndipu mupaskikengi; lutirizgani kupenja ndipu musaniyengi; lutirizgani kugong’oska ndipu kukujulikiyeningi.” Kumbi tisambiranjipu? Kuti mzimu wakupaturika utiwovyi, titenere kupemphera mwachitatata.

18. Mwakukoliyana ndi ntharika yaku Yesu, ntchifukwa wuli tisimikiza kuti Yehova watipaskengi mzimu wakupaturika?

18 Ntharika yaku Yesu yititiwovya so kuziŵa chifukwa cho tisimikiziya kuti Yehova watipaskengi mzimu wakupaturika. Munthu wa mu ntharika iyi, wakhumbanga kuti wamulonde umampha mlendu waki. Wakhumbisiskanga kumupaska chakurya mlendu waki yo wanguza ndi usiku kweni wengavi chechosi. Yesu wangukamba kuti mubwezi waki wangumupaska chakurya chifukwa chakuti wangupempha mwachitatata. Kumbi fundu yaku Yesu yenga yakuti wuli? Asani munthu wambula kufikapu ndiyu wakhumbisiska kuwovya mubwezi waki chifukwa chakuti wamupempha mwachitatata, tikayika cha kuti Ada ŵidu alisungu aŵapaskengi mzimu wakupaturika ŵanthu wo atiŵapempha mwachitatata! Mwaviyo, tikhumbika kupemphera ndi chivwanu kuti Yehova wamukengi mapempheru ngidu ndi kutipaska mzimu wakupaturika.—Sumu 10:17; 66:19.

19. Ntchifukwa wuli tisimikiza kuti timuthereskengi Satana?

19 Tisimikiza kuti timuthereskengi Satana chinanga kuti wangayesesa kutiyesa. Ntchifukwa wuli tikamba viyo? Chifukwa mzimu wakupaturika utitiwovya mu nthowa ziŵi. Chakwamba, utitipaska nthazi kuti tikunthiyengepu mayeseru ngo tikumana nangu. Chachiŵi, utitiwovya kuti tilutirizgi kuteŵete Yehova mpaka tizisere mucharu chifya chaku Chiuta. Mwaviyo, tiyeni tiyesesengi kuti tiyanduwengi ukongwa ndi mzimu wakupaturika!

SUMU 41 Chondi Vwani Pempheru Langu

^ ndimi 5 Nkhani iyi yikonkhoska mo mzimu wakupaturika waku Chiuta ungatiwovye kuti tikunthiyengepu. Yikonkhoska so vo tingachita kuti tiyanduwengi ukongwa ndi mzimu wakupaturika.

^ ndimi 16 Vo wangulemba Luka ndivu vilongo ukongwa kuti Yesu wayanjanga kupemphera kuphara vo wangulemba Mateyu, Mariko ndi Yohane.—Luka 3:21; 5:16; 6:12; 9:18, 28, 29; 18:1; 22:41, 44.

^ ndimi 59 VITHUZI: CHINTHU CHAKWAMBA: Mubali ndi mzichi ŵaza pa Nyumba ya Ufumu. Asani ŵe pa maunganu ndi Akhristu anyawu, atuŵa pa malu po pasanirika mzimu waku Yehova. CHINTHU CHACHIŴI: Amukapu pa maunganu. Venivi ndivu tikhumbika so kuchita asani tichita vinthu vinyaki vauzimu vo takambiskana mu nkhani iyi. Vinthu vaki ndi ivi: kusambira Mazu ngaku Chiuta, kupharazga kweniso kupemphera kwaku Yehova.