Julani

Lutani pa vo ve mukati

 NKHANI YAKUSAMBIRA YA NAMBALA 11

Muvwiyengi Mazu Ngaku Yehova

Muvwiyengi Mazu Ngaku Yehova

“Uyu ndi Mwana wangu . . . Muvwiyeni.”—MATE. 17:5.

SUMU 89 Vwiyani Kuti Mutumbikiki

VO TISAMBIRENGI MU NKHANI IYI *

1-2. (a) Kumbi Yehova walongoro nasi wuli mazuŵa nganu? (b) Kumbi tikambiskanengenji mu nkhani iyi?

YEHOVA watanja kulongoro nasi. Kuvuli wagwiriskiyanga ntchitu achimi, angelu ndi Mwana waki Yesu Khristu kuti watikambiyi maŵanaŵanu ngaki. (Amosi 3:7; Aga. 3:19; Chivu. 1:1) Mazuŵa nganu, Yehova walongoro nasi kuziya mu Mazu ngaki. Iyu wakutipaska Bayibolu kuti tiziŵi maŵanaŵanu ngaki ndi kuvwisa nthowa zaki.

2 Pa nyengu yo Yesu wenga panu pasi, Yehova wangulongoro nayu katatu kutuliya kuchanya. Tiyeni tikambiskani vo Yehova wangukamba, vo tingasambirapu ndi mwenimo tingayanduliya ndi vo wangukamba.

“YIWI NDIWI MWANA WANGU, MWENIYO NDITANJA”

3. Kumbi pa Mariko 1:9-11, Yehova wangukambanji Yesu wati wabatizika, ndipu vo wangukamba visimikiziya fundu zakukhumbika nizi?

3 Pa Mariko 1:9-11 pe mazu ngakwamba ngo Yehova wangulongoro kutuliya kuchanya. (Ŵerengani.) Iyu wanguti: “Yiwi ndiwi Mwana wangu, mweniyo nditanja; utindikondwesa.” Yesu watenere kuti wanguchiskika ukongwa kuvwa mazu nga Awisi ngakulongo kuti atimuyanja kweniso atimugomezga! Vo Yehova wangukamba visimikiziya fundu zitatu zakukwaskana ndi Yesu. Yakwamba njakuti Yesu ndi Mwana waki. Yachiŵi, Yehova watanja Mwana waki. Ndipu yachitatu njakuti Yehova wakondwa nayu Mwana waki. Tiyeni tikambiskani fundu zenizi, yeyosi pakuyija.

4. Kumbi Yesu wanguja Mwana waku Chiuta mu nthowa yinyaki niyi?

4 Yiwi ndiwi Mwana wangu.” Ndi mazu yanga, Yehova  wangulongo kuti wanguja pa ubali wapade ndi Yesu, Mwana waki wakwanjiwa. Yesu wechendazi panu pasi, wenga kali Mwana waku Chiuta. Kweni wati wabatizika wanguja mwana waku Chiuta mu nthowa yinyaki. Iyu wangusankhika ndi mzimu wakupaturika ndipu wenga ndi chilindizga chakuwere kuchanya kuti wakaje Fumu ndipuso Wasembi Mura wakusankhika ndi Chiuta. (Luka 1:31-33; Ahe. 1:8, 9; 2:17) Mwaviyo, Yesu wati wabatizika Awisi ŵenga ndi chifukwa chakuvwika chakukambiya kuti: “Yiwi ndiwi Mwana wangu.”—Luka 3:22.

Tituvwa umampha asani anyidu atitilumba (Wonani ndimi 5) *

5. Kumbi tingachita wuli nge Yehova pa nkhani yakulongo chanju ndi kulumba anyidu?

5 “Yiwi ndiwi . . . nditanja.” Yehova wangukambiya Yesu kuti watimuyanja kweniso wakondwa nayu. Venivi vititikumbusa kuti nasi tikhumbika kuchiska anyidu. (Yoha. 5:20) Tituvwa umampha asani munthu munyaki watitiyanja ndi kutilumba chifukwa cha vinthu vamampha vo tichita. Mwakuyanana ŵaka, abali ndi azichi mu mpingu ndipuso ŵanthu a mubanja lidu, akhumba kuti tiŵayanjengi ndi kuŵachiska. Asani tilumba anyidu, aja ndi chivwanu chakukho kweniso ateŵete Yehova mwakugomezgeka. Apapi ndiwu atenere ukongwa kulumba ŵana ŵawu. Asani apapi alumba ŵana ŵawu kutuliya pasi pa mtima kweniso asani atiŵayanja, akuwa umampha.

6. Ntchifukwa wuli titenere kumugomezga Yesu Khristu?

6 “Utindikondwesa.” Mazu yanga ngalongo kuti Yehova wangusimikiza kuti Yesu wachitengi khumbu la Awisi mwakugomezgeka. Chifukwa chakuti Yehova watimugomezga Mwana waki, nasi titenere kugomezga kuti Yesu wachitengi mwakugomezgeka vosi vo Yehova wakulayizga. (2 Akori. 1:20) Asani  tiŵanaŵaniya vo Yesu wachita, tikhumbisiska ndi mtima wosi kusambira kwaku iyu ndi kulondo maphazi ngaki.—1 Petu. 2:21.

“MUVWIYENI”

7. Mwakukoliyana ndi Mateyu 17:1-5, mphanyengu niyi po Yehova wangulongoro kutuwa kuchanya, ndipu wangukambanji?

7 Ŵerengani Mateyu 17:1-5. Yehova wangulongoro kachiŵi kutuwa kuchanya pa nyengu yo Yesu “wangusambuka.” Yesu wanguto Peturo, Yakobe ndi Yohane ndipu wanguluta nawu ku phiri litali. Ndipu ŵati afika anguwona chiwona. Chisku chaku Yesu chingugabuka ndipu malaya ngaki nganguŵala. Ŵanthu ŵaŵi wo amiyanga Mozesi ndi Eliya angwamba kulongoro ndi Yesu vakukwaskana ndi nyifwa ndipuso chiyuka chaki. Chinanga kuti Peturo, Yakobe ndi Yohane “angugona chifukwa ŵenga ndi tulu ukongwa,” kweni ŵati ayuka anguwona vo vachitikanga. (Luka 9:29-32) Pavuli paki, mtambu unguŵabenekere ndipu anguvwa mazu kutuwa mumtambu. Mazu yanga ngenga ngaku Chiuta! Nge mo ve nge pa nyengu yo Yesu wabatizikanga, yapa napu Yehova wangukambiya Mwana waki kuti watimukondwesa ndipuso watimuyanja. Iyu wangukamba kuti: “Uyu ndi Mwana wangu, mweniyo nditimuyanja, yo watindikondwesa.” Kweni pa nyengu iyi Yehova wangusazgiyapu kuti: “Muvwiyeni.”

8. Kumbi chiwona chingumuwovya wuli Yesu ndi akusambira ŵaki?

8 Chiwona ichi chingulongo unkhankhu wo Yesu wazamukuŵa nawu asani waziyamba kulamuliya nge Fumu mu Ufumu waku Chiuta. Tikayika cha kuti chiwona ichi chingumukhwimiska ukongwa Khristu chifukwa cha masuzgu ngo wangukumana nangu ndi nyifwa yakuŵaŵa yo wangufwa. Chiwona chenichi chinguwovya so akusambira ŵaki kuja ndi chivwanu chakukho. Chinguŵawovya kunozgeke masuzgu ngo angukumana nangu kweniso ntchitu yakusuzga yo akhumbikanga kugwira kunthazi. Pati pajumpha vyaka 30, Peturo wangukamba za kusambuka kwaku Yesu, kulongo kuti wenga weche kukumbuka.—2 Petu. 1:16-18.

9. Kumbi Yesu wanguŵapaska ulongozgi wuli akusambira ŵaki?

9 “Muvwiyeni.” Vo Yehova wangukamba vilongore limu kuti wakhumba kuti tivwiyengi Mwana waki. Kumbi Yesu wangukambanji pa nyengu yo wenga panu pasi? Iyu wangukamba vinthu vinandi vakukhumbika vo tikhumbika kuvwiya. Mwakuyeruzgiyapu, Yesu wangusambiza akusambira ŵaki mo angapharazgiya uthenga wamampha kweniso wanguŵakumbusa mwakuwerezawereza kuti ajengi masu nyengu zosi. (Mate. 24:42; 28:19, 20) Iyu wanguŵapempha so kuti ayesesengi kusere pakhomu lifinyi, ndipu wanguŵachiska kuti angavukanga cha. (Luka 13:24) Yesu wangukambiya akusambira ŵaki kuti akhumbika kuyanjana, kukoliyana ndi kusunga marangu ngaki. (Yoha. 15:10, 12, 13) Ulongozgi wo Yesu wangupaska akusambira ŵaki wenga wakuzirwa ukongwa! Ulongozgi uwu ngwakovya ukongwa mazuŵa nganu nge mo we nge pa nyengu yo wanguwupereke.

10-11. Kumbi tingalongo wuli kuti tivwiya Yesu?

10 Yesu wangukamba kuti: “Weyosi yo we kuchigaŵa cha uneneska, wavwisiya mazu ngangu.” (Yoha. 18:37) Tilongo kuti tivwiya mazu ngaki asani ‘tilutirizga kuzizipizgiyana kweniso kugowokiyana ndi mtima wosi.’ (Ako. 3:13; Luka 17:3, 4) Tilongo so kuti tivwiya mazu ngaki asani tipharazga mwaphamphu uthenga wamampha “mu nyengu yamampha kweniso mu nyengu yakusuzga.”—2 Timo. 4:2.

 11 Yesu wangukamba kuti: “Mbereri zangu zituvwa mazu ngangu.” (Yoha. 10:27) Wo alondo Khristu alongo kuti atimuvwiya asani achita vo wakamba mumalu mwakuvwa waka. Yiwu atimbanyizgika cha ndi ‘vo afipa navu mtima pa umoyu.’ (Luka 21:34) Mumalu mwaki, awona kuti kuvwiya Yesu ndiku nkhwakukhumbika ukongwa kwali angakumana ndi masuzgu wuli. Abali ŵidu anandi akunthiyapu masuzgu ngakulu, nge kuyukilika ndi arwani ŵawu, ukavu ndi ngozi zachilengedu. Chinanga kuti akumana ndi vinthu ivi, yiwu aleka cha kuja akugomezgeka kwaku Yehova. Yesu watiŵasimikiziya kuti: “Munthu weyosi yo we ndi marangu ngangu ndipu watingasunga, watindiyanja. Kweniso weyosi yo watindiyanja, Ada azakumuyanja.”—Yoha. 14:21.

Kupharazga kutitiwovya kuti tilutirizgi kuvwiya mazu ngaku Yesu (Wonani ndimi 12) *

12. Kumbi tingalongo so wuli kuti tivwiya Yesu?

12 Tingalongo so kuti tivwiya Yesu asani tikoliyana ndi wo wakusankha kuti atilongozgengi. (Ahe. 13:7, 17) Gulu laku Yehova lasintha vinthu vinandi pambula kuswera yapa. Mwakuyeruzgiyapu, lasintha nthowa zakupharazgiya, mo tichitiya maunganu nganyaki, mo tizenge ndi kunozga Nyumba za Ufumu kweniso kugwiriskiya ntchitu vipangizu va mazuŵa nganu. Tiwonga ukongwa chifukwa cha ulongozgi wamampha wenuwu! Yehova watitumbikengi asani tiyesesa kulondo ulongozgi wo gulu laki lititipaska.

13. Kumbi tiyanduwa wuli asani tivwiya Yesu?

13 Tiyanduwa asani tivwiya vosi vo Yesu wasambizanga. Yesu wangusimikiziya akusambira ŵaki kuti asisipulikengi ndi vo wasambiza. Iyu wangukamba kuti: “Mwazamusisipulika. Chifukwa goli langu ndipusu kweniso katundu wangu ndimupepu.” (Mate. 11:28-30) Mazu ngaku Chiuta ngo ngasazgapu buku la Mateyu, Mariko, Luka ndi Yohane ngatitisisipuwa, ngaweziyamu nthazi ndipuso ngatitipaska zeru. (Sumu 19:7; 23:3) Yesu wanguti: “Mbakutumbikika wo atuvwa mazu ngaku Chiuta ndi kungasunga.”—Luka 11:28.

‘NDIKANKHUSKENGI ZINA LANGU’

14-15. (a) Mwakukoliyana ndi Yohane 12:27, 28, kumbi mphanyengu niyi po Yehova wangulongoro kachitatu kutuwa kuchanya? (b) Kumbi mazu ngo Yehova wangukamba ngatenere kuti ngangumuwovya wuli Yesu?

14 Ŵerengani Yohane 12:27, 28. Mu buku la Yohane mwe uthenga wachitatu wo Yehova wangulongoro kutuwa kuchanya. Kwati kwaja mazuŵa ngamanavi kuti Yesu wabayiki, wanguluta ku Yerusalemu kuti wakachiti  Pasika wakumaliya. Iyu wanguti, “Ndasuzgika maŵanaŵanu.” Pavuli paki, wangupemphera kuti: “Ada, kankhuskani zina linu.” Awisi angumumuka kutuliya kuchanya kuti: “Ndalikankhuska ndipu ndilikankhuskengi so.”

15 Yesu wangusuzgika maŵanaŵanu chifukwa wenga ndi ntchitu yikulu. Iyu wakhumbikanga kulutirizga kuja wakugomezgeka kwaku Yehova kuti wafiski ntchitu iyi. Yesu waziŵanga kuti amutombozgengi ndi kufwa nyifwa yakuŵaŵa. (Mate. 26:38) Kweni iyu wakhumbanga ukongwa kukankhuska zina la Awisi. Yesu amumbanga mulandu wakuti wanyozanga Chiuta, ndipu wafipanga mtima kuti nyifwa yaki yichitiskengi kuti ŵanthu anyozi zina laku Chiuta. Mazu ngaku Yehova ngatenere kuti ngangumuchiska ukongwa Yesu. Iyu wenga ndi chigomezgu kuti zina laku Yehova likankhuskikengi. Mazu nga Awisi ngatenere kuti ngangumupembuzga ndi kumuchiska kuti wanozgeke masuzgu ngo wangukumana nangu. Chinanga kuti pa ŵanthu wo ŵengapu Yesu pe ndiyu wanguziŵa vo Awisi ang’anamuwanga, Yehova wanguwonesesa kuti mazu Ngaki ngalembeka chifukwa chaku isi.—Yoha. 12:29, 30.

Yehova wakankhuskengi zina laki ndi kutaska ŵanthu ŵaki (Wonani ndimi 16) *

16. Ntchifukwa wuli tingafipa mtima nyengu zinyaki?

16 Nge Yesu, nasi tingafipa mtima ndi vinthu vo vingachitiska kuti ŵanthu anyozi zina laku Yehova. Panyaki nasi ŵanthu angatichitiya vinthu viheni nge mo anguchitiya ndi Yesu. Pamwenga tingatimbanyizgika  ndi nkhani zaboza zo arwani ŵidu angawandisa zakukwaskana ndi isi. Tingafipa mtima kuti vinthu ivi vingachitiska kuti ŵanthu anyozi zina laku Yehova ndi gulu laki. Asani va nge ivi vachitika, mazu ngaku Yehova ngangatipembuzga ukongwa. Kweni tikhumbika kufipa mtima ukongwa cha. Tikhumbika kugomezga kuti “chimangu chaku Chiuta cho chiluska kuziŵa vinthu kosi, chivikiliyengi mitima [yidu] ndi maŵanaŵanu [ngidu] kuporote mwaku Khristu Yesu.” (Afi. 4:6, 7) Yehova watondekengi cha kukankhuska zina laki. Iyu wazamugwiriskiya ntchitu Ufumu waki kutuzgapu vinthu viheni vosi vo Satana ndi charu chaki wachitiya ateŵeti ŵaki akugomezgeka.—Sumu 94:22, 23; Yesa. 65:17.

YANDUWANI NDI MAZU NGAKU YEHOVA MAZUŴA NGANU

17. Mwakukoliyana ndi Yesaya 30:21, kumbi Yehova walongoro nasi wuli mazuŵa nganu?

17 Yehova weche kulongoro nasi mazuŵa nganu. (Ŵerengani Yesaya 30:21.) Mbuneneska kuti Chiuta walongoro nasi kutuliya kuchanya cha kweni watitilunguchizga kuziya mu Bayibolu. Kweniso mzimu waku Yehova utovya “mteŵeti wapanyumba” kupereka chakurya chauzimu kwa ateŵeti ŵaki nyengu zosi. (Luka 12:42) Tilonde chakurya chinandi chauzimu kuziya mu mabuku, mavidiyo ndi vinthu vakuvwisiya!

18. Kumbi Mazu ngaku Yehova ngangakuwovyani wuli?

18 Tingaluwanga cha mazu ngo Yehova wangukamba pa nyengu yo Mwana waki wenga panu pasi! Mphanyi mazu ngaku Chiuta ngatiwovya kuja ndi chigomezgu chakuti Yehova ndiyu walongozga vinthu vosi ndipu wazamutuzgapu viheni vosi vo Satana ndi charu chaki akuyambisa. Ndipu titenere kukhumbisiska kuvwisiya mazu ngaku Yehova. Asani tichitengi viyo, tikunthiyengepu masuzgu ngosi ngo tikumana nangu sonu ndipuso ngo tazamukumana nangu kunthazi. Bayibolu likamba kuti: “Mukhumbika kukunthiyapu kuti asani mwachita khumbu laku Chiuta, muzilonde vo wakulayizga.”—Ahe. 10:36.

SUMU 4 “Yehova Ndi Muliska Wangu”

^ ndimi 5 Pa nyengu yo Yesu wenga panu pasi, Yehova wangulongoro nayu katatu kutuliya kuchanya. Pa nyengu yinyaki, Yehova wangupempha akusambira aku Khristu kuti avwiyengi Mwana waki. Mazuŵa nganu, Yehova walongoro nasi kuziya mu Mazu ngaki, ngo ngasazgapu vo Yesu wasambizanga kweniso kuziya mugulu laki. Mu nkhani iyi, tikambiskanengi mo tiyanduliya asani tivwiya Yehova ndi Yesu.

^ ndimi 52 VITHUZI: Mura wawona mteŵeti wakovya wapeya pa Nyumba ya Ufumu ndipuso waphwere mabuku. Ndipu pavuli paki watimuwonga. Ndipu pavuli paki watimuwonga.

^ ndimi 54 CHITHUZI: Banja ligaŵiya mlovi kapepala kakudaniya ŵanthu ku maunganu.

^ ndimi 56 CHITHUZI: Akaboni awungana mu nyumba ya mubali mucharu cho ntchitu yidu njakukanizika. Yiwu avwala nge amutembeya kuti ŵanthu aleki kuŵaziŵa.