Julani

Lutani pa vo ve mukati

Mungawonanga mo Munthu Wawoneke Kubwalu Cha

Mungawonanga mo Munthu Wawoneke Kubwalu Cha

DON yo ndi Kaboni waku Yehova ku Canada, wayesesa kupharazgiya ŵanthu wo aja mumsewu. Don wangukamba za munthu munyaki mwa ŵanthu ŵenaŵa. Iyu wanguti: “Munthu munyaki yo wengavi pakuja zina laki Peter wawonekanga wakubinkha ukongwa pa ŵanthu wosi wo ndakumanapu nawu. Venivi vachitisanga kuti ŵanthu alekengi kufika pafupi. Kanandi Peter wakananga kuti ŵanthu amuwovyi.” Kwa vyaka vakujumpha 14, Don wanguchita mphwayi cha kuti wawovyi Peter posi po wasaniyanga mpata.

Zuŵa linyaki Peter wangufumba Don kuti: “Ntchifukwa wuli usuzgika ndi ini? Weyosi watindijumpha ŵaka. Ntchifukwa wuli utindichitiya lisungu?” Don wangukambisana ndi Peter malemba ngatatu kuti wamuwovyi. Chakwamba wangufumba Peter asani waziŵa kuti Chiuta we ndi zina ndipu wangumupempha kuti waŵerengi Bayibolu pa Sumu 83:18. Kuti walongo chifukwa cho wakhumbiyanga kumuwovye, Don wangukambiya Peter kuti waŵerengi Ŵaroma 10:13, 14. Pa lemba ili pakamba kuti “weyosi yo wadaniya pa zina laku Yehova wazamutaskika.” Pakumaliya Don wanguŵerenga Mateyu 9:36 ndipu pavuli paki wangupempha Peter kuti waŵerengi yija. Lemba ili likamba kuti: “[Yesu] wati wawona chigulu cha ŵanthu, wanguŵalenge lisungu chifukwa ŵenga akulimukalimuka kweniso akujowoleka nge mbereri zambula mliska.” Pa nyengu iyi, uku masozi ngatuwa Peter wangufumba kuti: “Kumbi ini nde yumoza mwa mbereri zenizi?”

Peter wangwamba kusintha. Iyu wangwamba kusamba, kumeta mwembi ndipuso kuvwala malaya ngamampha ngo Don wangumupasa. Peter wangulutiriza kuwoneka umampha.

Peter wenga ndi kabuku ko walembangamu vinthu vo vamuchitikiyanga. Pakwamba walembangamu vinthu vambula kukondwesa kweni pavuli paki wangwamba kulembamu vinthu vamampha. Zuŵa linyaki wangulembamu kuti: “Sonu ndasambira za zina laku Chiuta. Asani ndiromba, ndirombengi kwaku Yehova. Ntchinthu chakukondwesa kuziŵa zina laki. Don watindikambiya kuti Yehova wangaja Mubwezi wangu ndipuso wangandivwisiya nyengu yeyosi.”

 Mazu ngakumaliya ngo Peter wangulemba, wangulembe mvurwa waki ndi mzichi waki mura. Iyu wanguti:

“Musanawale ndayuka umampha cha. Ndiŵanaŵana kuti mbukoti kweni chinanga kuti ndingafwa musanawale, ndiziŵa kuti ndazamuwonana nayu so munyangu [Don] muparadayisu. Asani muŵerenga mazu yanga, ziŵani kuti ini ndafwa. Kweni asani mungaziwona munthu munyaki wachilendu pa nyifwa yangu, muzikambisani nayu ndipu muziŵerengi kabuku yaka kabulu [kung’anamuwa buku lo wasambiriyanga Bayibolu lakuti, “Coonadi cimene cimatsogolera ku Moyo Wamuyaya”]. * Buku ili likamba kuti ndazamuwonana so nayu mubwezi wangu Muparadayisu. Ndigomezga ivi ndi mtima wangu wosi. Ndini mubali winu, Peter.”

Ŵati ŵaŵika maliru, mzichi waku Peter zina laki Ummi wangukamba kuti: “Vyaka viŵi vajumpha, Peter wangukambisana nani. Pa nyengu iyi, wanguwoneka wakukondwa ukongwa kuluska vyaka vinandi. Iyu wangumwemwete.” Ummi wangukambiya Don kuti: “Buku ili ndiliŵerengengi chifukwa asani mzichi wangu wangukondwa nalu ndikuti ndamampha.” Ummi wanguzomera kukambisana ndi Kaboni munyaki fundu za mubuku lakuti, Kumbi Bayibolo Lisambizanji Weniukongwa?

Nasi tingawonanga ŵaka mo ŵanthu awoneke kubwalu cha. Tikhumbika kwanja ŵanthu amitundu yosi ndipu tingachitanga mphwayi cha kuŵapharazgiya. (1 Tim. 2:3, 4) Asani tichitengi viyo, tipharazgiyengi ŵanthu wo awoneka umampha cha kubwalu kweni ŵe ndi mtima wamampha nge Peter. Tikayika cha kuti Chiuta yo “wawona mu mtima” wawovyengi ŵanthu amampha kuti uneneska ukuwi mu mitima yawu.—1 Sam. 16:7; Yoh. 6:44.

^ ndimi 7 Likulembeka ndi Akaboni aku Yehova kweni sonu akuleka kulisindikiza.