Julani

Lutani pa vo ve mukati

 YATULIYA MUNKHANI ZIDU ZAKALI

Mo Angwambiya Kupanda Mbewu za Ufumu ku Portugal

Mo Angwambiya Kupanda Mbewu za Ufumu ku Portugal

PENIPO mayiŵa ngatchayanga sitima yo yalutanga ku Europe pa nyanja ya Atlantic, munthu yumoza yo wangukweramu zina laki George Young, waŵanaŵaniyanga ŵanthu wo wanguŵapharazgiya ku Brazil. * Kweni pavuli paki, wangwamba kuŵanaŵaniya ko walutanga. Iyu walutanga ku Spain ndi Portugal. Pa nyengu iyi, Akaboni ndipu ŵechendafikeku ku vyaru ivi. Iyu waŵanaŵananga kuti asani wafika, wakagaŵiyi timapepala 300,000 kweniso kuti wakadani Mubali J. F. Rutherford kuti wakakambi nkhani zachisanisani.

Kanandi Mubali George Young wayendanga pa nyanja asani waluta kuchipharazga

Mubali Young wati wafika mutawuni ya Lisbon ku Portugal mu 1925 wangusaniyaku masuzgu. Vivulupi vo vinguchitika mu 1910, vinguchitiska kuti ulamuliru wo wenga mu charu ichi umali ndipuso kuti Tchalitchi la Katolika liŵevi nthazi. Chinanga kuti ŵanthu angupaskika wanangwa, kweni vivulupi venga veche kuchitika.

Pa nyengu yeniyo Mubali Young wangunozga vakuti mubali Rutherford wakakambi nkhani, boma lingupempha asilikali kuti ajalikiski chimangu chifukwa cha ŵanthu wo akhumbanga kulonda boma. Mlembi wa wupu unyaki wa Bayibolu (British and Foreign Bible Society) wangutcheŵeska mubali Young kuti ŵanthu alimbanengi nayu. Chinanga kuti venga viyo, Mubali Young wanguluta kusukulu ya sekondale ya Camões kuti wakapemphi holu ndipu angumuzomereza.

Mubali Rutherford wangukamba nkhani yachisanisani pa 13 May. Ŵanthu ŵenga akukondwa po alindizganga chakuchitika ichi. Vikwangwani venga peposi vakuziŵiska ŵanthu za nkhani yo Mubali Rutherford wangukamba ya mutu wakuti, “How to Live on the Earth Forever.” Mutu uwu anguwulemba so munyuzipepala. Mwaluŵiluŵi alongozgi avisopa angulemba nkhani munyuzipepala yawu kutcheŵeska ŵanthu kuti kwaza “achimi aboza.” Pa khomu la holu yo Mubali Rutherford wakambiyangamu nkhani, ŵanthu akususka ŵenaŵa angupereka timabuku to tasuskanga vo Mubali Rutherford wasambizanga.

Chinanga kuti venga viyo, ŵanthu pafupifupi 2,000 anguzaza holu iyi ndipu anyaki so pafupifupi 2,000 anguŵakanizga kusere chifukwa chakuti malu ngenga ngamana. Ŵanthu anyaki angukwera pa makweleru kweniso pa vinthu vinyaki vo venga kubwalu kuti avwisiyi nkhani ya Mubali Rutherford.

Kweni penga masuzgu nganyaki. Akususka angwamba kudaniriza mu holu ndi kundereza mipandu. Mubali Rutherford wanguchita mantha cha ndipu wangukwera pachanya pa thebulu kuti mazu ngaki ngavwikengi patali. Wati wamaliza kukamba nkhani yaki ndi usiku, ŵanthu akujumpha 1,200 angupereka mazina ndi maadiresi ngawu kuti alonde mabuku. Mawa laki, nyuzipepala yinyaki (O Século) yingulemba nkhani yo yakonkhoskanga vo Mubali Rutherford wangukamba.

 Chigongwi cha Alinda cha Chiphwitikizi chingwamba kufwatulikiya ku Portugal mu September 1925. (Chigongwi cha Chiphwitikizi chakwamba chingufwatulika ku Brazil.) Pa nyengu iyi, Virgílio Ferguson wa ku Brazil yo wenga Wakusambira Bayibolu, wanguŵanaŵana kuti waluti ku Portugal kuti wakawovyi pa ntchitu ya Ufumu. Pakwamba, mubali Ferguson wateŵetiyanga ndi Mubali Young pa ofesi ya nthambi ku Brazil. Pati pajumpha nyengu yimanavi, Mubali Ferguson ndi muwolu waki Lizzie, anguluta ku Portugal kuti akateŵetiyengi so ndi Mubali Young. Iyu wanguza pa nyengu yaki chifukwa Mubali Young wenga pafupi kuluta kuchiteŵete ku vyaru vinyaki, kusazgapu ku USSR.

Chikalata chakuzomereza Lizzie ndi Virgílio Ferguson, kuti aje mucharu cha Portugal mu 1928

Asilikali wo anguyukiya boma ŵati ajalikiska ulamuliru wankhaza ku Portugal, ŵanthu angwamba kutisuska ukongwa. Kweni Mubali Ferguson wangutuwamu cha mucharu ichi. Iyu wanguchita viyo kuti wavikiliyi ndi kuchiska kagulu ka Akusambira Bayibolu. Mubali Ferguson wangupempha boma kuti munyumba yaki achitiyengemu maunganu nga mpingu. Boma lingumuzomereza mu October 1927.

Mu chaka chakwamba cha ulamuliru wankhaza, ŵanthu pafupifupi 450 ku Portugal angulembesa kuti alondiyengi Chigongwi cha Alinda mwezi wewosi. Kusazgiyapu yapa, timapepala ndi timabuku tinguwovya kuti uneneska ufiki ku vigaŵa vo venga pasi pa ulamuliru wa Portugal, nge Angola, Azores, Cape Verde, East Timor, Goa, Madeira ndi Mozambique.

Cha muma 1920, Manuel da Silva Jordão yo wagwiranga maganyu muminda ya ŵanthu wanguluta ku Lisbon. Pa nyengu yo wenga ku Brazil, iyu wanguvwisiya nkhani ya Mubali Young. Manuel wanguziŵa kuti vo wanguvwa wenga uneneska ndipu wangukhumbisiska kovya Mubali Ferguson pa ntchitu yakupharazga. Kuti wamuwovyi, Mubali Manuel wangwamba kuteŵete nge kopotala, zina lo apayiniya aziŵikanga nalu kali. Chifukwa chakuti abali angwamba kulonde mabuku mwakujalikiskika, mpingu wa ku Lisbon ungukuwa!

Mu 1934, Mubali ndi Mzichi Ferguson anguwere ku Brazil. Kweni pa nyengu iyi ndipu mbewu za uneneska zapandika kali. Abali akugomezgeka a ku Portugal anguleka cha kuteŵete Yehova pa nyengu yo ku Spain kwenga nkhondu kweniso pa nyengu yo Nkhondu ya Pacharu Chosi yachitikanga. Kwa nyengu yimanavi, yiwu ŵenga nge nkhuni zo zamala ŵaka kunyeka. Kweni Mubali John Cooke wati waza mu 1947, anguja nge asonkhaku so nkhuni zinyaki. Iyu wenga mumishonale wakwamba kuluta ku Portugal. Ivi vati vachitika, chiŵerengeru cha apharazgi chakweliyangakweliyanga. Chinanga kuti boma lingukanizga ntchitu yakupharazga mu 1962, kweni chiŵerengeru chakuwanga mbwenu. Akaboni ŵati azomerezeka ndi boma mu December 1974, ku Portugal kwenga apharazgi akujumpha 13,000.

Mazuŵa nganu, ku Portugal kweniso muvilwa vinyaki vo ŵanthu alongoro chiphwitikizi, nge Azores ndi Madeira kwe apharazgi akujumpha 50,000. Anyaki mwa apharazgi ŵenaŵa, mbazuku a ŵanthu wo ŵengapu pa nkhani ya Mubali Rutherford mu 1925.

Titimuwonga ukongwa Yehova kweniso abali ndi azichi akwamba wo anguchita chiganga pakulongozga ntchitu ya ufumu, pakuŵa ‘ateŵeti aku Khristu Yesu ku mitundu.’—Aro. 15:15, 16.—Yatuliya munkhani zidu zakali ku Portugal.

^ ndimi 3 Wonani nkhani yakuti “Peche Nchitu Yikulu Yakuvuna” mu Chigongwi cha Alinda cha May 15, 2014, peji 31-32.