Julani

Lutani pa vo ve mukati

Achinyamata​—“Lutirizgani Kugwiriya Ntchitu Utaski Winu”

Achinyamata​—“Lutirizgani Kugwiriya Ntchitu Utaski Winu”

“Nge mo mwajaliya akuvwiya, . . . lutirizgani kugwiriya ntchitu utaski winu, mwamantha kweniso mwakumbwambwanthiya.”—AFI. 2:12.

SUMU: 133, 135

1. Ntchifukwa wuli ubatizu ngwakukhumbika? (Wonani chithuzi cho che pachanya.)

CHAKA chechosi ŵanthu masawuzandi wo asambira Bayibolu, abatizika. Anandi mwaku yiwu mbanamana kweniso achinyamata. Anyaki angaŵa kuti akukuliya mumabanja nga Akaboni. Kumbi imwi mwe yumoza wawu? Asani ndi viyo, mukhumbika kuwongeka. Munthu yo wakhumba kuja Mkhristu watenere kubatizika ndipu ubatizu ngwakukhumbika ukongwa kuti tizitaskiki.—Mate. 28:19, 20; 1 Petu. 3:21.

2. Ntchifukwa wuli titenere cha kopa kubatizika?

2 Chinanga kuti munthu watumbikika ukongwa asani wabatizika, kweni waja so ndi udindu. Munthowa wuli? Pa zuŵa lo mwabatizikiyanga munguzomera kuti hinya mwati mwafumbika kuti, “Chifukwa cha sembi yaku Yesu Khristu, kumbi mwalapa maubudi nginu ndi kujipatuliya kwaku Yehova kuti muchiti khumbu laki?” Ubatizu winu ulongo kuti mukujipatuliya kwaku Yehova. Mukumulayizga kuti mumuyanjengi kweniso kuti muŵikengi pakwamba vo iyu wakhumba. Ili ndi layizgu likulu ukongwa. Kumbi mutenere  kudandawula kuti mukuchita viyo? Awa, mukhumbika kudandawula cha. Palivi chifukwa chakuti munthu wadandawuliyi asani wasankha kulongozgeka ndi Yehova. Asani wangaleka kulongozgeka ndi Yehova mbwenu walongozgekengi ndi Satana. Dyaboli wakhumba cha kuti muzitaskiki. Iyu wangakondwa asani mungatondeka kuzisaniya umoyu wamuyaya ndi kuja kuchigaŵa chaki pakususka muwusu waku Yehova.

3. Kumbi ndi vitumbiku nivi vo mungasaniya chifukwa cha kujipatuliya kwaku Yehova?

3 Mwakupambana ndi masuzgu ngo mungasaniya asani mungaŵa ku chigaŵa chaku Satana, ŵanaŵaniyani vitumbiku vo mwasaniya chifukwa cha kujipatuliya kwaku Yehova ndi kubatizika. Pakuti sonu mukujipereka kwaku Yehova mungakamba mwambula mantha kuti: “Yehova we ku chigaŵa changu, ndichitengi mantha cha. Kumbi munthu wangandichitanji?” (Sumu 118:6) Palivi chinthu chamampha kuluska kuja ku chigaŵa chaku Chiuta ndi kuziŵa kuti iyu wakondwa nawi.

MBUDINDU WINU

4, 5. (a) Ntchifukwa wuli tingakamba kuti kujipatuliya kwaku Yehova mbudindu wamunthu weyosi pakuyija? (b) Kumbi ndi mayeseru nanga ngo mbachinyamata pe cha wo akumana nangu?

4 Nge Mkhristu wakubatizika, vithemba kuti apapi ŵinu ŵe paubwezi wamampha ndi Yehova cha kuti namwi muje nayu paubwezi. Chinanga kuti mweche kuja ndi apapi ŵinu, mwazamutaskika chifukwa cha vakuchita vinu. Ntchifukwa wuli kukumbuka fundu iyi nkhwakukhumbika? Chifukwa ndi nyengu zosi cha mungaziŵa mayeseru ngo mwazamukumana nangu kunthazi. Mwakuyeruzgiyapu, panyaki mungubatizika mwechendafiki vyaka 13. Kweni sonu pakuti mwe wachinyamata, muwona vinthu mwakupambana kweniso mukumana ndi mayeseru ngo kali mwakumananga nangu cha. Msungwana munyaki wangukamba kuti: “Mwana wangakwiya cha kuti ndi Kaboni waku Yehova chifukwa chakuti waluta ku sukulu kwambula kumupaska keki lakukumbukiya zuŵa laki lakuwiya. Kweni asani pajumpha vyaka ndipu khumbu lakugonana laŵa likulu, iyu wakhumbika kumukonkhoske mwakuvwika umampha chifukwa cho kuvwiya marangu ngaku Yehova nkhwamampha nyengu zosi.”

5 Mbachinyamata pe cha wo akumana ndi mayeseru. Chinanga ndi wo akubatizika mbara kali nawu akumana ndi vinthu vinandi vamabuchibuchi vo viyesa chivwanu chawu. Mayeseru nganyaki ngo angakumana nangu ngangaŵa ngakukwaskana ndi nthengwa, matenda pamwenga ntchitu. Kukamba uneneska, weyosi kwali ndi mwana pamwenga mura, wakhumbika kuja wakugomezgeka kwaku Yehova pa vinthu vakupambanapambana.—Yako. 1:12-14.

6. (a) Kumbi fundu yakuti layizgu linu lakujipatuliya kwaku Yehova lisintha cha, ying’anamuwanji? (b) Kumbi mungasambiranji pa lemba Afilipi 4:11-13?

6 Kuti mulutirizgi kuja akugomezgeka mungaluwanga cha kuti layizgu linu kwaku Yehova lisintha cha. Ivi ving’anamuwa kuti mukukambiya Mulengi wachilengidu chosi kuti mulutirizgengi kumuteŵete chinanga kuti mabwezi nginu pamwenga apapi ŵinu angaleka. (Sumu 27:10) Pa vosi vo mungakumana navu, mungapempha Yehova kuti wakuwovyeni kuti musungi layizgu linu lakujipatuliya.—Ŵerengani Afilipi 4:11-13.

7. Kumbi kugwiriya ntchitu utaski winu, “mwamantha kweniso mwakumbwambwanthiya” kung’anamuwanji?

7 Yehova wakhumba kuti muje bwezi laki. Kweni mukhumbika kugwiriyapu ntchitu kuti mulutirizgi kuja nayu paubwezi kweniso kuti muzitaskiki. Pa Afilipi 2:12 pakamba kuti: “Lutirizgani kugwiriya ntchitu utaski winu, mwamantha kweniso mwakumbwambwanthiya.” Mazu yanga ngalongo kuti mukhumbika kuŵanaŵaniya vo mungachita kuti mulutirizgi kuja paubwezi ndi Yehova ndi kugomezgeka kwaku iyu chinanga mungakumana ndi mayeseru. Mungajigomezganga  ukongwa cha. Chinanga mbateŵeti anyaki aku Chiuta wo amuteŵete kwa nyengu yitali, nyengu zinyaki agomezgeka cha. Mwaviyo, kumbi ndi vinthu wuli vo mungachita kuti mugwiriyi ntchitu utaski winu?

KUSAMBIRA BAYIBOLU NKHWAKUKHUMBIKA

8. Kumbi kusambira Bayibolu pakumwija kusazganjipu, nanga ntchifukwa wuli kuchita viyo nkhwakukhumbika?

8 Kuti tije paubwezi ndi Yehova, tikhumbika kuvwisiya kwaku iyu kweniso kulongoro nayu. Kusambira Bayibolu pakutija ndi nthowa yikulu yo tivwisiya kwaku Yehova. Ivi visazgapu kuŵerenga ndi kulunguruka Mazu ngaku Chiuta ndipuso mabuku ngo gulu laki lititipaska. Po muchita viyo, mukhumbika kukumbuka kuti muŵerenga Bayibolu kuti muziŵi ŵaka vinthu cha. Kusambira Bayibolu nkhusunga waka vinthu pamtima cha, nge mo tichitiya ku sukulu kuti tikweri mayesu. Sambiru le nge ulendu wakukondwesa wo musaniya vinthu vinandi vo kali mwaviziŵanga cha vakukwaskana ndi mijalidu yaku Yehova. Ivi vikuwovyeningi kuti mundere kufupi ndi Chiuta, ndipu nayu wanderengi kufupi ndi yimwi.—Yako. 4:8.

Kumbi mulongoro ndi Yehova ndi kuvwisiya kwaku iyu? (Wonani ndimi 8-11)

9. Kumbi ndi vinthu nivi vo vakuwovyani pakusambira Bayibolu pakumwija?

9 Gulu laku Yehova lititipaska vinthu vinandi vo vingatiwovya pakusambira. Mwakuyeruzgiyapu, pa jw.org/ny, pa mutu wakuti “Achinyamata,” pe nkhani yakuti, “Zoti Muchite Pophunzira Baibulo.” Nkhani iyi yingakuwovyani kugwiriskiya ntchitu vo musambira pa nkhani za m’Bayibolu. Kweniso pa webusayiti iyi, nkhani zakuti, “Kodi Baibulo Limaphunzitsa Chiyani Kwenikweni?” zingakuwovyani kuti mukhorwi ndi vo mugomezga. Zingakuwovyani so kuti mukonkhoske anyinu vo mugomezga. Fundu zinyaki zo zingakuwovyani pakusambira ze mu Galamukani! ya April 2009 pa mutu wakuti, Zimene Achinyamata Amadzifunsa . . . Kodi Ndingatani Kuti Kuwerenga Baibulo Kuzindisangalatsa? Kusambira ndi kulunguruka nkhwakukhumbika ukongwa kuti mugwiriyi ntchitu utaski winu.—Ŵerengani Sumu 119:105.

PEMPHERU NDAKUKHUMBIKA

10. Ntchifukwa wuli pempheru ndakukhumbika kwa Mkhristu yo wakubatizika?

10 Asani tisambira pakutija tivwisiya kwaku Yehova ndipu asani tipemphera tilongolo nayu. Mkhristu wakhumbika cha kupemphera mwadangu ŵaka pamwenga kuwona pempheru nge  ‘chithumwa’ cho chingamuwovya kusaniya vo wakhumba. M’malu mwaki, pempheru ndi nthowa yo tikambiskiyana ndi Mulengi widu. Yehova wakhumba kuti mukambiskanengi nayu. (Ŵerengani Afilipi 4:6.) Asani pe vinthu vinyaki vo mufipa navu mtima, Bayibolu likamba kuti ‘muponyiyengi Yehova masuzgu nginu.’ (Sumu 55:22) Kumbi mugomezga kuti ulongozgi wenuwu ngwakovya? Pe abali ndi azichi mamiliyoni wo angakusimikiziyani kuti pempheru laŵawovya. Namwi lingakuwovyani.

11. Ntchifukwa wuli tikhumbika kuwonga Yehova nyengu zosi?

11 Kweni mutenere kupemphera kwaku Yehova kuti wakuwovyeni pe cha. Bayibolu likamba kuti: “Longoni kuti muwonga.” (Ako. 3:15) Nyengu zinyaki tingayamba kuŵanaŵaniya waka za masuzgu ngo tikumana nangu ndipu tingaluwa vitumbiku vinandi vo te navu. Kumbi mungachita umampha cha kuti zuŵa lelosi muŵanaŵaniyengi vinthu vitatu vo mungawonga Yehova? Pavuli paki, mukhumbika kuwonga Yehova mu pempheru chifukwa cha vinthu vo. Msungwana munyaki zina laki Abigail yo wangubatizika po wenga ndi vyaka 12 wangukamba kuti: “Ndiwona kuti nkhwakukhumbika kuwonga Yehova kuluska munthu weyosi. Tikhumbika kumuwonga pa chechosi cho watipaska.” *

VO TIKUMANA NAVU PA UMOYU VAKUKHUMBIKA

12, 13. Kumbi kuŵanaŵaniya vinthu vamampha vo Yehova wakuchitiyani kungakuwovyani wuli?

12 Fumu Davidi, yo Chiuta wanguyitaska mu vinthu vinandi vakusuzga, yingukamba kuti: “Laŵani ndipu muwonengi kuti Yehova ngwamampha. Ngwakukondwa munthu yo wabisama mwaku iyu.” (Sumu 34:8) Vesi ili lilongo kukhumbika kwa vinthu vo tikumana navu pa umoyu. Asani muŵerenga Bayibolu ndi mabuku ngidu kweniso asani mwe pa mawunganu, mutuvwa fundu zakuchiska zakukwaskana ndi mo Chiuta wawovye anyinu kulutirizga kuja akugomezgeka. Kweni po mulutirizga kuja paubwezi wakukho ndi Yehova, mukhumbika kuwona mo iyu watikuwovyiyani pa umoyu winu. Kumbi imwi mwawonapu umampha waku Yehova?

13 Pe nthowa yimoza yo Mkhristu weyosi wawone umampha waku Yehova. Nthowa yaki njakuti Chiuta watitipempha kuti tije pa ubwezi ndi iyu kweniso Mwana waki. Yesu wanguti: “Palivi munthu yo watuza kwaku ini kwambula kuti Ada wo akundituma amuguza, ndipu ndazakumuyuska pa zuŵa lakumaliya.” (Yoha. 6:44) Kumbi muwona kuti mazu yanga namwi ngatikukwaskani? Panyaki mungakamba kuti, ‘Yehova wanguguza apapi ŵangu ndipu ini ndingulondo ŵaka.’ Kweni asani mukujipatuliya kwaku Yehova ndi kubatizika, mungulongo kuti mukhumba kuja nayu paubwezi. Sonu watikuziŵani umampha. Bayibolu likamba kuti: “Asani munthu munyaki watanja Chiuta, munthu mwenuyu waziŵika ndi iyu.” (1 Akori. 8:3) Nyengu zosi muwongengi vo muchita mu gulu laku Yehova kweniso muviwonengi kuti vakuzirwa.

14, 15. Kumbi kupharazga kungakuwovyani wuli kuti chivwanu chinu chije chakukho?

14 Mungawona so umampha waku Yehova asani watikuwovyani pa nyengu yo mukambiyaku anyinu vo mugomezga. Mungapharazga kusukulu pamwenga kumalu nganyaki. Anyaki vitiŵasuzga kupharazgiya anyawu kusukulu. Panyaki namwi mungavwisa chifukwa chaki, chifukwa muziŵa cha mo achitiyengi asani mungaŵapharazgiya. Vingaŵa vakusuzga ukongwa kupharazgiya gulu la ŵanthu kupambana ndi kupharazgiya munthu weyosi pakuyija. Kumbi ntchinthu wuli chingakuwovyani?

15 Chakwamba ŵanaŵaniyani chifukwa cho mukhorwe ndi vo mugomezga. Pa jw.org, pe vo vingakuwovyani pakusambira Bayibolu.  Kumbi vinthu ivi vilimu mu chineneru chinu? Asani muziŵa cha, fufuzani. Vinthu ivi vingakuwovyani kuŵanaŵaniya vo mugomezga, chifukwa cho mutivigomezge kweniso mo mungavikonkhoske kwa anyinu. Asani mukhorwa ndi vo mugomezga kweniso asani mwanozgeke umampha, muchiskikengi kukambiyaku anyinu.—Yere. 20:8, 9.

16. Ntchinthu wuli cho chingakuwovyani kuti muleki kuchita mantha kukambiya anyinu vo mugomezga?

16 Chinanga kuti mungaŵa kuti mwanozgeke umampha, nyengu zinyaki mungachita mantha mbwenu kukamba vo mugomezga. Mzichi munyaki wa vyaka 18 yo wangubatizika we ndi vyaka 13 wangukamba kuti: “Ndiziŵa vo ndigomezga kweni nyengu zinyaki nditondeka kuvikonkhoska.” Kumbi ntchinthu wuli cho chitimuwovya kumalana ndi suzgu ili? Iyu wanguti: “Nditesa kukamba nge ndicheza waka. Anyangu mukilasi akamba mwakufwatuka vinthu vo achita. Nani ndikhumbika kuchita viyo. Mwaviyo, ndizumbuwa chinthu chinyaki chinanga kuti ndichu ndikhumba kukamba cha. Mwakuyeruzgiyapu, ndikamba kuti: ‘Zuŵa linyaki ndasambiranga Bayibolu ndi munthu munyaki, ndipu .  . .’ Pavuli paki, ndilutirizga nkhani yo ndakhumbanga kukamba. Chinanga kuti ndapenjanga kukamba va Bayibolu cha, kanandi anyaki akhumba kuziŵa vo ndichita asani ndisambiza Bayibolu. Nyengu zinyaki afumba mafumbu ngakukwaskana ndi vo ndichita pakusambiza Bayibolu. Asani ndigwiriskiya ntchitu nthowa iyi, visuzga cha kuti ndiyambi kukambisana nawu. Pavuli paki, ndikondwa ukongwa!”

17. Kumbi ndi vinthu wuli vinyaki vo vingakuwovyani kukambiskana ndi anyinu?

17 Asani anyinu mutiŵatumbika kweniso mutiŵaŵanaŵaniya, nawu angachita so viyo. Olivia, yo we ndi vyaka 17 ndipu wangubatizika wechendafiki vyaka 13, wangukamba kuti: “Nyengu zosi ndachitanga mantha kwamba kukambiskana ndi munthu vo Bayibolu likamba chifukwa ndawonanga kuti ŵanthu andiwonengi kuti ndichita vinthu mwakutaluliya.” Pavuli paki, wangusintha. M’malu mwakuŵanaŵaniya ukongwa vo wawopanga, Olivia wangukamba kuti: “Achinyamata anandi aziŵa chechosi cha chakukwaskana ndi Akaboni aku Yehova. Palivi Akaboni anyaki wo angaŵapharazgiya pade paku isi. Mwaviyo, mo tichitiya vingawovya kuti avwisiyi pamwenga cha. Wuli asani tichita soni pamwenga titopa kukamba vo tigomezga pamwenga tikambiskana nawu mwasoni? Yiwu angawona kuti tinyadiya cha kuti te Akaboni. Yiwu angatimuka uheni chifukwa chakuti tilivi chiganga. Kweni asani tichita soni cha kukamba vo tigomezga ndipuso asani tikamba mwakusimikiza nge mo tilongolore nyengu zosi, yiwu atitumbikengi.”

LUTIRIZGANI KUGWIRIYA NTCHITU UTASKI WINU

18. Kumbi mukhumbika kuchitanji kuti mugwiriyi ntchitu utaski winu?

18 Nge mo tawone, kugwiriya ntchitu utaski winu mbudindu ukulu. Vinyaki vo vingakuwovyani nkhuŵerenga Mazu ngaku Chiuta, kulunguruka, kupemphera ndipuso kuŵanaŵaniya mo Yehova wakutumbikiyani. Kuchita ivi kungakuwovyani kuti muleki kukayika kuti Yehova ndi mubwezi winu. Ivi vingachitiska kuti mukambiyengeku anyinu vo mugomezga.—Ŵerengani Sumu 73:28.

19. Ntchifukwa wuli tikhumbika kufwiyapu kuti tizitaskiki?

19 Yesu wangukamba kuti: “Asani munthu wapenja kundilondo, wajikani yija ndipu wapingi chimiti chaki chakutombozgekiyapu ndi kulutirizga kundilondo.” (Mate. 16:24) Kuti waje wakusambira waku Yesu, Mkhristu weyosi watenere kujipatuliya kwaku Yehova ndi kubatizika. Ivi vijura nthowa yakuti tisaniyi vitumbiku vinandi sonu kweniso kuti tizilonde umoyu wamuyaya mucharu chifya.

^ ndimi 11 Kuti muziŵi vinandi, wonani mutu wakuti “Young People Ask—Why Should I Pray?” kweniso vakuti achinyamata achiti vo ve pa mutu wenuwu pa jw.org/en.