Julani

Lutani pa vo ve mukati

 SAMBIRU 3

Kumbi Uthenga Wamampha Ukutuliya Nadi Kwaku Chiuta?

Kumbi Uthenga Wamampha Ukutuliya Nadi Kwaku Chiuta?

1. Kumbi Ndiyani Wakulemba Bayibolu?

Uthenga wamampha wakuti ŵanthu azamuja pacharu chapasi kwamuyaya ukulembeka m’Bayibolu. (Sumu 37:29) Bayibolu likupangika ndi mabuku ngamanangamana 66. Chiuta wangugwirisiya ntchitu ŵanthu akugomezeka akukwana 40 kuti alembi mabuku yanga. Mabuku ngakwamba 5, ngangulembeka ndi Mosese ndipu pajumpha vyaka pafufupi 3,500 kutuliya po wakulembe. Buku lakumaliya lingulembeka ndi wakutumika Yohane ndipu pajumpha vyaka pafufupi 1,900 kutuliya po likulembeke. Kumbi ŵanthu wo akulemba Bayibolu angulemba maŵanaŵanu ngaku yani? Chiuta wangugwirisiya ntchitu mzimu utuŵa kuti uŵawovyi. (2 Samuele 23:2) Yiwu angulemba maŵanaŵanu ngawu cha kweni ngaku Chiuta. Mwaviyo, Chiuta ndiyu Wakulemba Bayibolu.​—Ŵerengani 2 Timote 3:16; 2 Peturo 1:20, 21.

Woneriyani vidiyo yakuti Kumbi Ndiyani yo Wakulemba Bayibolu?

2. Kumbi tingasimikizga wuli kuti Bayibolu likutuliya kwaku Chiuta?

Tiziŵa kuti Bayibolu likutuliya kwaku Chiuta chifukwa chakuti likukonkhoska umampha ukongwa vo vazamuchitika kunthazi. Palivi munthu weyosi yo wangachita ivi. (Yoswa 23:14) Chiuta Wanthazizosi pe ndiyu wangaziŵa vo vazamuchitikiya ŵanthu kunthazi.​—Ŵerengani Yesaya 42:9; 46:10.

Buku lakutuliya kwaku Chiuta litenere kuja nadi lapade. Mabayibolu ngakujumpha 2 biliyoni ngakupharazgika mu vineneru vakujumpha 450. Chinanga kuti Bayibolu ndakali, kweni vo likamba viyanana ukongwa ndi vo asayansi akamba mazuŵa nganu. Kweniso ŵanthu 40 wo akulemba  Bayibolu akulemba vakususkana cha. * Kweniso, Bayibolu lititikambiya kuti Chiuta wauneneska watitiyanja ukongwa. Ndipuso Bayibolu leche ndi nthazi zo zisintha umoyu wa ŵanthu. Fundu izi zichitisa kuti ŵanthu anandi avwanengi kuti Bayibolu ndi Mazu ngaku Chiuta nadi.​—Ŵerengani 1 Atesalonika 2:13.

Woneriyani vidiyo Kumbi Tingasimikizga Wuli Kuti vo Bayibolu Likamba Vauneneska?

3. Kumbi ndi uthenga wuli wo we m’Bayibolu?

Bayibolu likonkhoska uthenga wamampha wakuti Chiuta we nawu ndi chilatu chamampha mtundu wa ŵanthu. Malemba ngatitikonkhoske vo vinguchitika kuti ŵanthu atayi mwaŵi wakuja mu paradayisu, kweniso mo paradayisu wazamuwezgekiyapu.​—Ŵerengani Chivumbuzi 21:4, 5.

Mu Mazu ngaku Chiuta musanirika so marangu, fundu zo ŵanthu angayende kweniso ulongozgi. Kweniso Bayibolu le ndi vakuwoniyapu vo vilongo mo Chiuta wachitiya ndi ŵanthu. Vakuwoniyapu ivi vititiwovya kuziŵa umunthu waku Chiuta. Pa chifukwa ichi, Bayibolu lingakuwovyani kumuziŵa umampha Chiuta. Likonkhoska vo mungachita kuti muje nayu pa ubwezi.​—Ŵerengani Sumu 19:7, 11; Yakobe 2:23; 4:8.

4. Mungachita wuli kuti muvwisengi vo Bayibolo likamba?

Kabuku yaka kakuwovyeningi kuti mulivwisi umampha Bayibolu mwakugwirisiya ntchitu nthowa yo Yesu wagwirisiyanga ntchitu. Iyu wayanjanga kugwiriskiya nchitu Malemba ndi ‘kungang’anamuliya.’​—Ŵerengani Luka 24:27, 45.

Uthenga wamampha wakutuwa kwaku Chiuta ngwakukondwesa ukongwa kuphara chinthu chechosi. Kweni pe ŵanthu amanavi ŵaka wo aleka kuwuyanja ndipu anyaki akwiya kuvwa uthenga uwu. Kweni imwi mungagongowanga cha. Chilindizga chinu chakuzija ndi umoyu wamuyaya chithemba pa kuziŵa Chiuta.​—Ŵerengani Yohane 17:3.

 

^ ndimi 3 Wonani kabuku kakuti Buku la Anthu Onse.