Julani

Lutani pa vo ve mukati

 SAMBIRU 2

Kumbi Chiuta Ndiyani?

Kumbi Chiuta Ndiyani?

1. Ntchifukwa wuli titenere kusopa Chiuta?

Chiuta wauneneska ndiyu wakulenga vinthu vosi. Iyu walivi chiyambi ndipuso umaliru. (Masalimo 90:2) Uthenga wamampha wo we mu Bayibolu ukutuliya kwaku iyu. (1 Timote 1:11) Chifukwa chakuti Chiuta ndiyu wakutipaska umoyu, titenere kusopa iyu pe.​—Ŵerengani Chivumbuzi 4:11.

2. Kumbi Chiuta ndi munthu wamtundu wuli?

Palivi munthu yo wakuwonapu Chiuta chifukwa chakuti iyu ndi Mzimu. Ivi ving’anamuwa kuti ngwapachanya ukongwa kuphara ŵanthu wo ŵe pacharu chapasi. (Yohane 1:18; 4:24) Kweni tikhoza kuziŵa mijalidu yaku Chiuta asani tiwona vinthu vo wakulenga. Mwakuyeruzgiyapu, Chiuta wakulenga vimiti va vipasu vakupambanapambana kweniso maluŵa vo vilongo kuti ngwachanju kweniso ngwazeru. Ukulu wa chilengedu chosi utitiwovya kuziŵa kuti Chiuta ngwanthazi.​—Ŵerengani Aroma 1:20.

Tingasambira so mijalidu yinandi yaku Chiuta asani tiŵerenga Bayibolu. Mwakuyeruzgiyapu, lititikambiya vo Chiuta watanja kweniso vo watinkha, mo wachitiya vinthu ndi ŵanthu kweniso mo wachitiya pa vakuchitika vakupambanapambana.​—Ŵerengani Masalimo 103:7-10.

3. Kumbi Chiuta we ndi zina?

Yesu wangukamba kuti: “Awusefwi akuchanya, zina linu lipatuliki.” (Mateyu 6:9) Chinanga kuti Chiuta we ndi mazina nganandi ngaudindu, kweni zina laki lenechu ndimoza pe. Zina ili lizumbulika mwakupambanapambana mu chineneru chechosi. Mu Chitonga lizumbulika kuti “Yehova” kweni mu vineneru vinyaki atilizumbuwa kuti “Yahweh.”​—Ŵerengani Masalimo 83:18.

Mu Mabayibolu nganandi akutuzgamu zina laku Chiuta, mumalu mwaki akulembamu ŵaka mazina ngaudindu ngakuti Ambuya pamwenga Chiuta. Kweni pa nyengu yo Bayibolu lalembekiyanga, zina laku Chiuta lasanirikanga maulendu 7,000. Yesu  wachiŵasambiza ŵanthu, waŵawovyanga so kuti aziŵi zina laku Chiuta.​—Ŵerengani Yohane 17:26.

Woneriyani vidiyo yakuti Kumbi Chiuta we ndi Zina?

4. Kumbi Yehova watitiŵanaŵaniya?

Chiuta ngwachanju ndipu watitikhumbiya vamampha nge po achitiya ada yaŵa

Kumbi masuzgu nganandi ngo taŵanthu tikumana nangu, ngalongo kuti Yehova walivi nasi ntchitu? Ŵanthu anyaki akamba kuti Chiuta watambisa masuzgu kuti watiyesi, kweni ili ndi boza.​—Ŵerengani Yakobe 1:13.

Chiuta watititumbika ndipu wakutipaska wanangwa wakusankha vo tikhumba. Tiwonga ukongwa kuti te ndi wanangwa wakusankha kuteŵete Chiuta. (Yoswa 24:15) Kweni ŵanthu anandi asankha kuchitiya anyawu vinthu viheni, ndipu venivi vichitiska kuti ŵanthu anandi asuzgikengi. Yehova waguŵa ukongwa asani wawona vinthu vambula urunji venivi.​—Ŵerengani Genezesi 6:5, 6.

Yehova ndi Chiuta yo watitiŵanaŵaniya. Iyu wakhumba kuti tikondwengi ndi umoyu. Pambula kuswera yapa, watuzgengepu masuzgu ngosi kweniso ŵanthu wo atambisa masuzgu. Kweni pasonupanu pe chifukwa chakuvwika cho Chiuta wazomereze kuti taŵanthu tisuzgiki kwa kanyengu kamanavi. Mu Sambiru 8 ndimu tazamuziŵa chifukwa chaki.​—Ŵerengani 2 Peturo 2:9; 3:7, 13.

5. Kumbi tingachita wuli kuti tije pa ubwezi ndi Chiuta?

Yehova watitipempha kuti tije nayu pa ubwezi mwakukambiskana nayu mupempheru. Iyu watanja munthu weyosi pakuyija. (Masalimo 65:2; 145:18) Yehova ngwakunozeka kutigowoke. Iyu waziŵa kuti tiyesesa kuchita vinthu vo vingamukondwesa chinanga kuti nyengu zinyaki tinangisa. Mwaviyo, chinanga kuti te ambula kufikapu, tingaja pa ubwezi wakukho ndi Chiuta.​—Ŵerengani Masalimo 103:12-14; Yakobe 4:8.

Chifukwa chakuti Yehova ndiyu wakutipaska umoyu, titenere kumuyanja ukongwa kuluska munthu weyosi. (Mariko 12:30) Mungaja pa ubwezi wakukho ukongwa ndi Chiuta, asani mulutirizga kusambira vinandi vakukwaskana ndi iyu kweniso asani muchita vo wakhumba. Venivi vilongongi kuti mutimuyanja nadi.​—Ŵerengani 1 Timote 2:4; 1 Yohane 5:3.