Chiuta wakhumba kuti ŵanthu amitundu yosi apempherengi kwaku iyu kuti aje nayu paubwezi. (Masalimo 65:2) Kweni ndi mapempheru ngosi cha ngo watuvwa. Mwakuyeruzgiyapu, mapempheru nga munthulumi yo wachitiya nkhaza muwolu waki ngajalizika. (1 Peturo 3:7) Kweniso Ayisirayeli ŵati alutirizga kuchita vinthu viheni, Chiuta wangukana kuvwa mapempheru ngawu. Ivi vilongo kuti ndi mwaŵi wapade kukambiskana ndi Yehova mupempheru. Kweni Chiuta watuvwa mbwenu mapempheru nga munthu yo wachita ubudi ukulu asani walapa.​—Ŵerengani Yesaya 1:15; 55:7.

Woneriyani vidiyo yakuti Kumbi Chiuta Watuvwa Mapempheru Ngosi?

Pempheru ntchigaŵa chakusopa kwidu, mwaviyo titenere kupemphera kwaku Yehova pe yo ndi Mulengi widu. (Mateyu 4:10; 6:9) Chifukwa chakuti te ambula kufikapu, titenere kupemphera kuziya mu zina laku Yesu. Ivi veviyo chifukwa chakuti wakufwiya maubudi ngidu. (Yohane 14:6) Yehova wakhumba cha kuti tichitengi kuloŵeza pamtima mapempheru pamwenga kuchita kulemba. Iyu wakhumba kuti tipempherengi kutuliya pasi pa mtima.​—Ŵerengani Mateyu 6:7; Afilipi 4:6, 7.

Mulengi widu watuvwa mapempheru ngosi chinanga ngangaja nga mumtima. (1 Samuyeli 1:12, 13) Iyu wakhumba kuti tipempherengi nyengu yeyosi, nge pakuyuka, pakugona, pa nyengu yachakurya ndipuso asani takumana ndi masuzgu.​—Ŵerengani Masalimo 55:22; Mateyu 15:36.

Kuja pa ubwezi ndi Chiuta nkhwakusuzga chifukwa chakuti tija ndi ŵanthu wo aleka kumugomezga. Kweniso ŵanthu ŵenaŵa asuska layizgu laki lakuti ŵanthu azamuja  mwachimangu pacharu chapasi. (2 Timote 3:1, 4; 2 Peturo 3:3, 13) Mwaviyo, tikhumbika kuchiskana ndi Akhristu anyidu.​—Ŵerengani Aheberi 10:24, 25.

Kwanjana ndi ŵanthu wo atanja Chiuta kutitiwovya kuti tije nayu pa ubwezi wakukho. Maunganu nga Akaboni aku Yehova ngatitipaska mwaŵi wakuti tichiskiki ndi chivwanu cha anyidu.​—Ŵerengani Aroma 1:11, 12.

Kuŵanaŵaniyapu pa vo mwasambira mu Bayibolu kungakuwovyani kuti muje pa ubwezi wakukho ndi Yehova. Musambirengepu kanthu pa vo wachita, ulongozgi wo wapereka ndipuso malayizgu ngaki. Kuŵanaŵaniyapu kweniso kupemphera kungatiwovya kuti tivwisi zeru zaku Chiuta ndipuso mo watitiyanjiya.​—Ŵerengani Yoswa 1:8; Masalimo 1:1-3.

Mungaja pa ubwezi ndi Chiuta pijapija asani mutimuthemba ndi kumugomezga. Kweni chigomezgu chiyanana ndi chinthu chamoyu cho chikhumbika kuryiskika kuti chije ndi umoyu. Mutenere kuryiska chigomezgu chinu mwakuŵanaŵaniyapu pa vo vingukuchitiskani kuti muje ndi chigomezgu cho mwenachu.​—Ŵerengani Mateyu 4:4; Aheberi 11:1, 6.

Yehova waphwere ŵanthu wo atimuyanja. Iyu wangaŵavikiliya ku vinthu vo vingananga chigomezgu chawu ndipuso chilindizga chakuzija ndi umoyu wambula kumala. (Masalimo 91:1, 2, 7-10) Iyu watititcheŵeska kuti tingachitanga cha vinthu vo vingaŵika umoyu widu pangozi, chifukwa venivi vingachitiska kuti tilekengi kukondwa. Yehova watitisambiza vo tingachita kuti tije ndi umoyu wamampha.​—Ŵerengani Masalimo 73:27, 28; Yakobe 4:4, 8.