SAMBIRU 6
Kumbi Akufwa Angazija So ndi Umoyu?
1. Kumbi pe uthenga wamampha wakukwaskana ndi akufwa?
Yesu wachifika ku Betaniya kufupi ndi Yerusalemu ndipu pajumpha mazuŵa nganayi kutuliya po mubwezi waki Lazaro wangufwiya. Iyu wanguluta kumuwunda waku Lazaro limoza ndi Marita ndi Mariya, wo ŵenga azichi ŵaki. Pati pajumpha nyengu yimanavi, ŵanthu anandi anguza. Pavuli paki Yesu wanguyuska Lazaro. Namwi mungaŵanaŵaniya likondwa lo Marita ndi Mariya ŵenga nalu Yesu wati wayuska Lazaro.—Ŵerengani Yohane 11:21-24, 38-44.
Marita wawuziŵanga kali uthenga wamampha wakukwaskana ndi akufwa. Iyu waziŵanga kuti Yehova wazamuyuska akufwa kuti azije so ndi umoyu pacharu chapasi.—Ŵerengani Yobu 14:14, 15.
2. Ntchinthu wuli chichitika asani munthu wafwa?
Chiuta wangukambiya Adamu kuti: “Pakuti ndiwi fuvu, wazamuwere kufuvu.”—GENEZESI 3:19.
Ŵanthu akupangika kutuwa ku fuvu. (Genezesi 2:7; 3:19) Taŵanthu te mizimu cha yo yavwala waka liŵavu. Kweni tikulengeka ndi liŵavu lanyama lo lilivi chigaŵa chechosi cho chilutirizga kuja ndi umoyu asani liŵavu lafwa. Asani munthu wafwa, wongu waki nawu utufwa ndipu waŵanaŵana so cha. Ndichu chifukwa chaki Lazaro wati wayuka wangukambapu chechosi cha cho chamuchitikiyanga chifukwa waziŵanga kanthu cha.—Ŵerengani Masalimo 146:4; Wakutawula 9:5, 6, 10.
Kumbi Chiuta walanga ŵanthu mwakuŵawotcha kumotu asani ŵafwa? Bayibolu likamba kuti akufwa aziŵa chechosi cha. Mwaviyo, nkhani yakuti Chiuta watotcha ŵanthu ndi motu njaboza ndipu atimunangiya waka mbiri. Chiuta watiŵatinkha ukongwa ŵanthu wo asambiza anyawu kuti iyu walanga ŵanthu ndi motu asani ŵafwa.—Ŵerengani Yeremiya 7:31.
Woneriyani vidiyo yakuti Kumbi Ntchinthu Wuli cho Chichitika Asani Munthu Wafwa?
3. Kumbi akufwa angalongoro nasi?
Akufwa angaŵereŵeta cha pamwenga kuvwa chinthu chechosi. (Masalimo 115:17) Kweni angelu anyaki mbaheni, angalongoro ndi ŵanthu ndipu angapusikiziya kuti mbanthu wo akutayika. (2 Peturo 2:4) Yehova watitikaniza kuŵereŵeta ndi ŵanthu akufwa.—Ŵerengani Dotoronome 18:10, 11.
4. Kumbi mbayani wo azamuyuskika?
Ŵanthu anandi wo akufwa azamuyuka kuti azije so ndi umoyu pacharu chapasi. Chinanga mbanthu anyaki wo achitanga vinthu viheni chifukwa cha kuleka kuziŵa Chiuta nawu azamuyuskika.—Ŵerengani Luka 23:43; Machitidu 24:15.
Ŵanthu wo azamuyuskika azamupaskika mwaŵi wakuti asambiri uneneska wakukwaskana ndi Chiuta kweniso kuti alongo kuti agomezga Yesu mwakumuvwiya. (Chivumbuzi 20:11-13) Ŵanthu wo azamuchita vinthu vamampha azamuja ndi umoyu wamuyaya pacharu chapasi.—Ŵerengani Yohane 5:28, 29.
5. Kumbi chiyuka chilongo kuti Yehova ndi Chiuta wamtundu wuli?
Tisimikiza kuti chiyuka chazamuŵaku chifukwa Chiuta wangutuma Mwana waki kuti wazitifwiyi. Mwaviyo, chiyuka chilongo kuti Yehova ngwachanju ndipuso we ndi wezi wambula makambika. Kumbi mbayani wo mukhumbisiska kuziŵawona asani akufwa aziyuka?—Ŵerengani Yohane 3:16; Aroma 6:23.
