Julani

Lutani pa vo ve mukati

 MUTU 3

Vo Chiuta Wakhumba Kuchitiya Ŵanthu

Vo Chiuta Wakhumba Kuchitiya Ŵanthu

1. Kumbi Chiuta wakhumba kuŵachitiyanji ŵanthu?

CHIUTA wakhumba kuŵachitiya vinthu vamampha ŵanthu. Pakwamba iyu wangulenga Adamu ndi Eva ndipu wanguŵaŵika mumunda wakutowa kuti ajengemu. Chiuta wakhumbanga kuti yiwu aje ndi ŵana, apangi charu chosi kuja paradayisu ndipuso aphweriyengi nyama.—Chiyambo 1:28; 2:8, 9, 15; wonani Fundu Yakukumaliya ya nambala 6.

2. (a) Kumbi tiziŵa wuli kuti Chiuta wazamuchita nadi vo walayiza? (b) Mbayani wo azamuja pacharu chapasi, nanga azamuja kwa nyengu yitali wuli?

2 Kumbi muŵanaŵana kuti tazamuja nadi muparadayisu? Yehova watitikambiya kuti: “Ndivu ndikhumba, ndipu ndivichitengi.” (Yesaya 46:9-11; 55:11) Iyu wazamuchita nadi vo wakhumba ndipu palivi cho chingamutondekesa. Yehova wakamba kuti penga chifukwa cho wangulenge charu. Iyu “wakuchilenga kwambula chilatu cha.” (Yesaya 45:18) Wakhumba kuti ŵanthu aje pacharu chapasi. Kumbi mbayani wo Chiuta wakhumba kuti azije pacharu chapasi, nanga azamuja kwa nyengu yitali wuli? Bayibolu likamba kuti: “Arunji [pamwenga kuti, akuvwiya] azamulonde charu chapasi ndipu azamuja mwenimo kwamuyaya.”Sumu 37:29; Chivumbuzi 21:3, 4.

3. Chifukwa chakuti ŵanthu atama ndipuso atufwa, kumbi mungafumba mafumbu wuli?

3 Mazuŵa nganu ŵanthu atama ndipuso atufwa. Muvyaru vinandi apumana kweniso abayana. Kukamba unenesa, vinthu vo vichitika ndi khumbu laku Chiuta cha. Ntchinthu wuli chikuchitika kuti pacharu paje masuzu, nanga ntchifukwa wuli? Bayibolu pe ndilu lingamuka.

 MURWANI WAKU CHIUTA

4, 5. (a) Ndiyani yo wangulongoro ndi Eva mumunda wa Edene mwakugwirisiya ntchitu njoka? (b) Kumbi munthu wamampha wasintha wuli kuja munkhungu?

4 Bayibolu lititikambiya kuti Chiuta we ndi murwani yo ndi mungelu ndipu “wadanika kuti Dyaboli ndipuso Satana.” Satana wangugwirisiya ntchitu njoka kuti walongoro ndi Eva mumunda wa Edene. (Chivumbuzi 12:9; Chiyambo 3:1) Iyu wanguchitisa kuti njoka yiwonekengi nge kuti yilongoro.—Wonani Fundu Yakukumaliya ya nambala 7.

5 Kumbi Chiuta wakulenga mungelu mwenuyu kuti waje Satana Dyaboli? Awa! Pakwamba Satana wenga mungelu wamampha ndipu wenga kuchanya pa nyengu yo Chiuta wanozanga charu kuti Adamu ndi Eva ajengemu. Iyu wangusintha yija kuja Dyaboli. (Jobu 38:4, 7) Kumbi wangusintha wuli? Kuti tiziŵi, tiŵanaŵaniyi vo vichitisa kuti munthu waje munkhungu. Asani munthu wabalika ŵaka, waja munkhungu cha. Kweni kuti wayambi kuba, watamba kukhumbira pamwenga kukhumba chinthu chaŵeni kuti chije chaki. Po walutiriza kuchiŵanaŵaniya, watichikhumbira ukongwa ndipu asani wasaniya mpata, watuba. Mwaviyo, waja munkhungu.Ŵerengani Yakobe 1:13-15; wonani Fundu Yakukumaliya ya nambala 8.

6. Kumbi mungelu munyaki wangusintha wuli kuja murwani waku Chiuta?

6 Venivi ndivu vinguchitikiya mungelu mwenuyu. Yehova wati walenga Adamu ndi Eva, wanguŵakambiya kuti abali ŵana ndipu ‘azazi charu chapasi.’ (Chiyambo 1:27, 28) Mungelu yo, watenere kuti waŵanaŵananga kuti, ‘Ŵanthu wosi angazisopa ini m’malu mwakusopa Yehova!’ Iyu wangulutiriza kuŵanaŵaniya venivi ndipu vinguchitisa kuti wakhumbiri ukongwa udindu waku Yehova. Mungelu mwenuyu, wakhumbanga kuti ŵanthu amusopengi. Mwaviyo, wangupusika Eva ndipu wangumulandiza. (Ŵerengani Chiyambo 3:1-5.) Chifukwa cha vo wanguchita wanguja Satana Dyaboli, murwani waku Chiuta.

7. (a) Ntchifukwa wuli Adamu ndi Eva akufwa? (b) Ntchifukwa wuli tikota ndipuso titufwa?

 7 Adamu ndi Eva anguleka kuvwiya Chiuta, yiwu angurya chipasu. (Chiyambo 2:17; 3:6) Mwaviyo, angubudiya Yehova ndipu pati pajumpha nyengu angufwa, nge mo Yehova wangukambiya. (Chiyambo 3:17-19) Ŵana wo Adamu ndi Eva angubala ŵenga akubuda ndipu pavuli paki angufwa. (Ŵerengani Ŵaroma 5:12.) Ntchifukwa wuli ŵenga akubuda? Tiyeruziyi kuti muwumba vidina ndipu mugwirisiya ntchitu chikomboli chakubende. Vidina vosi vo muwumbengi viŵengi vakubende. Adamu wangubuda chifukwa wanguleka kuvwiya Chiuta. Mwakuyanana ŵaka, chifukwa chakuti tosi tikutuliya kwaku Adamu te akubuda pamwenga kuti te “akubende” nge mo iyu wenge. Ndichu chifukwa chaki tikota ndipuso titufwa.Ŵaroma 3:23; wonani Fundu Yakukumaliya ya nambala 9.

8, 9. (a) Kumbi Satana wakhumbanga kuti Adamu ndi Eva agomezenji? (b) Ntchifukwa wuli Yehova wanguŵabaya nyengu yeniyo cha ŵanthu akugaluka?

8 Satana wangwamba kugaluka pa nyengu yo wanguchitisa kuti Adamu ndi Eva aleki kuvwiya Yehova Chiuta. Iyu wakhumbanga kuti Adamu ndi Eva agomezi kuti Yehova ngwaboza, watiŵalamuliya uheni ndipuso watiŵakhumbiya vamampha cha. Satana wangulongo kuti Chiuta ngwakwenere cha kukambiya ŵanthu vakuchita ndipu Adamu ndi Eva angasankha ŵija chamampha ndi chiheni. Kumbi Yehova watingi wachitengenji? Iyu watingi waŵabayengi ŵanthu akugaluka ŵenaŵa ndipu nkhani yo yatingi yimaliyengi penipo. Kumbi asani Yehova wanguchita viyo, vatingi vilongongi kuti Satana ngwaboza? Awa.

9 Ndichu chifukwa chaki Yehova wanguŵabaya nyengu yeniyo cha ŵanthu akugaluka ŵenaŵa. M’malu mwaki wanguzomereza kuti ŵanthu ajilamuliyi ŵija kwa nyengu yitali. Ivi vatingi vilongongi kuti Satana ngwaboza ndipuso kuti Yehova ndiyu waziŵa vo ŵanthu akhumbika kuti aje  ndi umoyu wamampha. Tazamusambira vinandi pa nkhani iyi mu Mutu 11. Kumbi muŵanaŵana kuti Adamu ndi Eva anguchita umampha kugomeza Satana ndi kuleka kuvwiya Chiuta? Vinthu vosi vo Adamu ndi Eva ŵenga navu, Yehova ndiyu wanguŵapasa. Wanguŵapasa umoyu wamampha, malu ngakutowa ngakuti ajengemu kweniso ntchitu yakukondwesa.  Kweni pengavi chamampha chechosi cho Satana wanguŵachitiya. Asani imwi mwengapu pa nyengu yo, mwatingi muchitengi wuli?

10. Kumbi tikhumbika kusankhanji?

10 Nge mo venge ndi Adamu kweniso Eva, nasi mazuŵa nganu tikhumbika kusankha vo tingachita. Vo tingasankha vingachitisa kuti tizisaniyi umoyu pamwenga cha. Tingasankha kuvwiya Yehova nge Mulongozi widu kuti tilongo kuti Satana ngwaboza pamwenga tingasankha Satana kuja mulongozi widu. (Sumu 73:28; ŵerengani Nthanthi 27:11.) Mbanthu amanavi wo avwiya Chiuta pacharu chapasi ndipu iyu ndiyu cha yo walamuliya charu. Nanga ndiyani yo watichilamuliya?

NDIYANI YO WALAMULIYA CHARU?

Asani maufumu ngosi nga pacharu chapasi ngenga ngaku Satana cha, kumbi watingi wangaperekengi kwaku Yesu?

11, 12. (a) Kumbi tisambiranji pa vo Satana wanguchita pakukhumba kupasa Yesu maufumu? (b) Ndi malemba nanga ngo ngalongo kuti Satana ndiyu walamuliya charu?

11 Yesu wamuziŵanga yo walamuliya charu. Nyengu yinyaki, Satana “wangumulongo maufumu ngosi nga pacharu chapasi ndi unkhankhu wawu.” Ndipu iyu wangulayiza Yesu kuti: “Vinthu vosi ivi ndikupasengi asani ungandigwadiya [ungakotama] ndi kundisopa.” (Mateyu 4:8, 9; Luka 4:5, 6) Jifumbeni kuti, ‘Asani maufumu yanga ngenga ngaku Satana cha, kumbi watingi wangaperekengi kwaku Yesu?’ Awa. Venivi vilongo kuti maboma ngosi ngaku Satana.

12 Panyaki mungajifumba kuti: ‘Pakuti Yehova, Chiuta Wanthazizosi ndiyu wakulenga chilengedu chosi, kumbi Satana wangalamuliya wuli charu?’ (Chivumbuzi 4:11) Mbunenesa kuti Yehova ngwanthazizosi, kweni Yesu wangukamba kuti Satana ndiyu “walamuliya charu ichi.” (Yohane 12:31; 14:30; 16:11) Wakutumika Paulo wangukamba kuti Satana Dyaboli ndi “chiuta wa nyengu yinu.” (2 Ŵakorinte 4:3, 4) Yohane nayu wangulemba kuti “charu chosi che mu nthazi ya muheni yo.”1 Yohane 5:19.

 KUMBI CHARU CHAKU SATANA CHAZAMUBWANGANDULIKA WULI?

13. Ntchifukwa wuli tikhumbika charu chifya?

13 Mucharu ichi muchitika vinthu vinandi vakofya. Ŵanthu achita nkhondu, chinyengu ndipu viwawa ve peposi. Ŵanthu angamalisa cha masuzu ngosi yanga, chinanga angayesesa wuli. Pambula kuswera yapa, Chiuta wanangengi charu chiheni ichi pa nkhondu ya Aramagedoni ndipu charu chifya cha urunji chazamusere m’malu mwaki.Chivumbuzi 16:14-16; wonani Fundu Yakukumaliya ya nambala 10.

14. Ndiyani yo Chiuta wasankha kuti waje Fumu ya Ufumu waki? Ntchinthu wuli cho Bayibolu likukambiya limu chakukwasana ndi Yesu?

14 Yehova wakusankha Yesu Khristu kuja Fumu ya boma Laki lakuchanya pamwenga kuti Ufumu waki. Vyaka masawuzandi vajumpha, Bayibolu likukambiya limu kuti Yesu wazamulamuliya nge “Karonga wa Chimangu” ndipu boma laki lazamumala cha. (Yesaya 9:6, 7) Yesu wangusambiza akusambira ŵaki kuti apempheriyengi boma lenili. Iyu wanguti: “Ufumu winu uzi. Khumbu linu lichitiki, kuchanya kweniso pacharu chapasi.” (Mateyu 6:10) Mu Mutu 8, tazamusambira mo Ufumu waku Chiuta wazamuselere m’malu mwa maboma ngosi nga pacharu chapasi. (Ŵerengani Danyele 2:44.) Pavuli paki, Ufumu waku Chiuta wazamusintha charu kuja paradayisu.—Wonani Fundu Yakukumaliya ya nambala 11.

CHARU CHIFYA CHE PAFUPI!

15. Kumbi “charu chapasi chifya” ching’anamuwanji?

15 Bayibolu lilayiza kuti: “Pe kuchanya kufya ndi charu chapasi chifya vo isi tilindiza,” ndipu “mwenimo mwazamuja urunji.” (2 Petro 3:13; Yesaya 65:17) Nyengu zinyaki, asani Bayibolu likamba kuti “charu chapasi” ling’anamuwa ŵanthu wo aja pacharu. (Chiyambo 11:1) Mwaviyo, “charu  chapasi chifya” chaurunji, ching’anamuwa ŵanthu wosi wo avwiya Chiuta ndipu iyu watiŵatumbika.

16. Ndi mphasu yamampha niyi yo Chiuta wazamupasa ŵanthu wo azamuja mucharu chifya, nanga mukhumbika kuchitanji kuti muzilonde mphasu yeniyi?

16 Yesu wakulayiza kuti ŵanthu wo azamuja mucharu chifya azamupasika “umoyu wamuyaya.” (Marko 10:30) Kumbi mutenere kuchitanji kuti muzilonde mphasu yeniyi? Kuti muziŵi vo mungachita, ŵerengani Yohane 3:16 ndi Yohane 17:3. Kumbi umoyu wazamuja wuli mu Paradayisu pacharu chapasi? Tiyeni tiwoni vo Bayibolu likamba.

17, 18. Kumbi tiziŵa wuli kuti pacharu chosi chapasi pazamuja chimangu kweniso tazamuwopa chechosi cha?

17 Kwazamuŵavi vinthu viheni, nkhondu, kuleka kuvwiya marangu ndipuso viwawa. Pacharu chapasi pazamuŵavi ŵanthu aheni. (Sumu 37:10, 11) Chiuta ‘wazamumalisa nkhondu pacharu chosi chapasi.’ (Sumu 46:9; Yesaya 2:4) Ŵanthu wo atanja Chiuta kweniso wo atimuvwiya ndiwu azamuja pacharu ndipu pazamuja chimangu mpaka muyaya.Sumu 72:7.

18 Ŵanthu aku Yehova azamuja akuvikilirika. Mu nyengu yakali, asani Ayisraele avwiya Chiuta, awopanga chechosi cha chifukwa chakuti waŵavikiriyanga. (Ŵalevi 25:18, 19) Mu Paradayisu namu, tazamuwopa chechosi cha. Nyengu zosi tazamuja akuvikilirika!Ŵerengani Yesaya 32:18; Mika 4:4.

19. Ntchifukwa wuli tigomeza kuti mucharu chifya mwazamuja vakurya vinandi?

19 Kwazamuja vakurya vinandi. “Pacharu chapasi pazamukuŵa vakurya vinandi. Ndipu vazamuzala pachanya pa mapiri.” (Sumu 72:16) Yehova “Chiuta widu wazakutitumbika,” ndipu “mucharu mwazamume vakurya vinandi.”Sumu 67:6.

20. Tiziŵa wuli kuti charu chapasi chazamuja paradayisu?

20 Charu chosi chapasi chazamuja paradayisu. Weyosi wazamuja ndi nyumba yakutowa kweniso munda.  (Ŵerengani Yesaya 65:21-24; Chivumbuzi 11:18.) Charu chosi chapasi chazamuja chakutowa nge mo wenge munda wa Edene. Nyengu zosi Yehova wazakutipasanga vo tikhumbika. Pakukamba zaku Yehova, Bayibolu likamba kuti: “Mutambasuwa janja linu ndipu chamoyu chechosi mutichipasa vo chikhumba.”Sumu 145:16.

21. Tiziŵa wuli kuti ŵanthu ndi nyama azamuja mwachimangu?

21 Pazamuja chimangu pakati pa nyama ndi ŵanthu. Nyama zazamupweteka ŵanthu so cha. Ŵana azamuwopanga cha ndipu azamuja pamoza ndi nyama zo ziwoneka kuti zakofya mazuŵa nganu.Ŵerengani Yesaya 11:6-9; 65:25.

22. Kumbi Yesu wazamuchitanji nawu ŵanthu wo atama?

22 Palivi yo wazamutama. Pa nyengu yo Yesu wenga pacharu chapasi, wanguchiza ŵanthu anandi. (Mateyu 9:35; Marko 1:40-42; Yohane 5:5-9) Nge Fumu ya Ufumu waku Chiuta, Yesu wazamuchiza weyosi. Palivi yo wazamukamba kuti: “Ndatama.”Yesaya 33:24; 35:5, 6.

23. Kumbi Chiuta wazamuchitanji ndi ŵanthu wo akufwa?

23 Akufwa azamuyuka. Chiuta walayiza kuti wazamuyusa ŵanthu mamiliyoni nganandi wo akufwa. Bayibolu likamba kuti: “Kwazamuja chiyuka cha ŵanthu arunji ndi ambula urunji.”Ŵerengani Yohane 5:28, 29; Machitidu 24:15.

24. Kumbi mutuvwa wuli asani muŵanaŵaniya za kuzija mu Paradayisu?

24 Tosi te ndi wanangwa wakusankha. Tingasankha kusambira zaku Yehova ndi kumuteŵete pamwenga tingasankha kuchita vo tikhumba. Asani tisankhengi kuteŵete Yehova, tingazija ndi umoyu wamampha munthazi. Munthu munyaki yo wangupayikika pafupi ndi Yesu wati wamupempha kuti wazimukumbuki, Yesu wangumulayiza kuti: “Wazamuja ndi ini mu Paradayisu.” (Luka 23:43) Tiyeni tisambiri vinandi vakukwasana ndi Yesu Khristu ndipuso mo wazamufiskiya malayizu ngamampha ngaku Chiuta.