Julani

Lutani pa vo ve mukati

 SAMBIRU 40

Davidi ndi Goliati

Davidi ndi Goliati

Yehova wangukambiya Samuele kuti: ‘Luta kunyumba yaku Jese. Yumoza mwa ŵana ŵaki anthurumi ndiyu wajengi fumu yachiŵi ya Ayisraele.’ Mwaviyo, Samuele wanguluta kunyumba yaku Jese. Samuele wati wawona mwana munthurumi wakwamba waku Jese, wanguŵanaŵana kuti: ‘Munyamata uyu watenere kuti ndiyu Chiuta wasankha.’ Yehova wangukambiya Samuele kuti ndiyu cha. Yehova wanguti: ‘Ini ndiwona mo munthu wawoneke kubwalu cha kweni ndiwona mtima wa munthu.’

Jese wanguza ndi ŵana anthurumi anyaki 6 kwaku Samuele. Kweni Samuele wanguti: ‘Palivi yo Yehova wasankha. Kumbi we ndi ŵana anyaki anthurumi?’ Jese wanguti: ‘Kwaja yimoza mumana ukongwa munthurumi Davidi. Iyu wamuliska mbereri zangu.’ Davidi wati waza, Yehova wangukambiya Samuele kuti: ‘Ndi mweniyo!’ Samuele wangupunguliya mafuta pamutu paku Davidi, kumusankha kuti kunthazi wazije fumu ya Ayisraele.

Nyengu yinyaki, Ayisraele anozgekiyanga kuchita nkhondu ndi Afilisti. Yiwu ŵenga ndi msilikali wanthazi zina laki Goliati yo amuthembanga ukongwa. Zuŵa lelosi Goliati wanyozanga Ayisraele. Iyu wadanilizanga kuti: ‘Nditumiziyeni munthu kuti wapumani nani. Asani wandithereska, tijengi akapolu ŵinu. Kweni asani ndamuthereska mujengi akapolu ŵidu.’

Davidi wanguluta kumusasa wankhondu wa Ayisraele kuti wakapereki chakurya kwa abali ŵaki wo ŵenga asilikali. Iyu wanguvwa vo Goliati wakambanga ndipu wanguti: ‘Ndipumanengi nayu.’ Fumu Sauli yingukamba kuti: ‘Kweni ndiwi  mwana.’ Davidi wangumuka kuti: ‘Yehova wandiwovyengi.’

Sauli wakhumbanga kuti Davidi wagwirisiyi ntchitu chakuvwala chaki chankhondu. Kweni Davidi wanguti: ‘Ndingachita cha nkhondu ndi vakuvwala ivi.’ Mwaviyo, wanguto fyata ndipu wanguluta ku msinji. Wangusankha mya yinkhondi yakusililika ndipu wanguyiŵika mukachikwama kaki. Pavuli paki, Davidi wangutchimbiriya ko kwenga Goliati. Goliati wangudaniriza kuti: ‘Zanga wamwana. Ndikuperekengi ku viyuni vamude kweniso ku vinyama vamudondu kuti vikuryi.’ Davidi wanguchita mantha cha. Nayu wangudaniriza kuti: ‘Iwi utuza ndi lupanga kweniso mukondu kweni ini ndituza mu zina laku Yehova. Uchita nkhondu ndi isi cha kweni ndi Chiuta. Weyosi yo we panu waziŵengi kuti Yehova ngwanthazi ukongwa kuluska lupanga pamwenga mukondu. Iyu wakuperekeningi mu manja mwidu.’

Davidi wanguŵika mwa mu fyata ndipu wanguwuzunguza ndi kuwuponya mwanthazi. Ndi chovyu chaku Yehova mwa wo ungupuma pachisku chaku Goliati ndipu ungusere mukati. Munthu wanthazi mwenuyu wangufwa. Pavuli paki, Afilisti wosi anguthaŵa. Kumbi ugomeza Yehova nge mo wanguchitiya Davidi?

“Ku ŵanthu vamachitika cha kweni ve viyo cha kwaku Chiuta, chifukwa kwaku Chiuta vinthu vosi vamachitika.”—Marko 10:27