Julani

Lutani pa vo ve mukati

 SAMBIRU 35

Hana Warombanga Kuti Chiuta Wamupasi Mwana Munthurumi

Hana Warombanga Kuti Chiuta Wamupasi Mwana Munthurumi

Muyisraele munyaki zina laki Elkana wenga ndi anthukazi ŵaŵi, Hana ndi Penina. Iyu wayanjanga ukongwa Hana. Nyengu zosi Penina wanyozanga Hana chifukwa wengavi ŵana ndipu Penina wenga ndi ŵana anandi. Chaka chechosi, Elkana ndi banja laki alutanga ku chihema ku Shilo kuchisopa. Zuŵa linyaki po ŵenga kweniko, Elkana wanguwona kuti Hana wenga wakukondwa cha. Iyu wangukamba kuti: ‘Chondi kuliya cha Hana. We ndi ini. Nditikuyanja.’

Pavuli paki, Hana wanguluta kwakuyija kuchipemphera. Iyu waliyanga wachipempha Yehova kuti wamuwovyi. Hana wangulayizga kuti: ‘Yehova asani mundipasengi mwana munthurumi, ndazakumupereka kwaku yimwi, ndipu wazakukuteŵetiyani kwa umoyu waki wosi.’

Wasembi Mura Eli wanguwona Hana wachiliya ndipu wanguŵanaŵana kuti waloŵe. Hana wangumuka kuti: ‘Awa ambuya, ndaloŵe cha. Nde ndi suzgu yikulu ndipu ndipemphera kwaku Yehova.’ Eli wanguziŵa kuti wanguŵanaŵana umampha cha ndipu wangumukambiya kuti: ‘Chiuta wakupasi cho ukhumba.’ Hana wangukondwa ndipu wanguwere kwawu. Chaka chechendamali, wangubala mwana munthurumi ndipu wangumudana kuti Samuele. Kumbi uŵanaŵana kuti Hana wangukondwa wuli?

 Hana wanguluwa cha vo wangulayizga Yehova. Samuele wati wakuwaku, Hana wanguluta nayu ku chihema kuti wakateŵetiyengi kweniko. Iyu wangukambiya Eli kuti: ‘Uyu ndiyu mwana yo ndingupempha Yehova kuti wandipasi ndipu ndamupereka kwaku Yehova kwa umoyu waki wosi.’ Elkana ndi Hana alutanga ku chihema chaka chechosi kuchiwona Samuele ndipu amupingiyanga laya lifya lakudumuwa manja. Yehova wanguchitisa so kuti Hana wabali ŵana anthurumi atatu ndi anthukazi ŵaŵi.

“Lutirizani kupempha, ndipu mupasikengi; lutirizani kupenja, ndipu musaniyengi.”—Mateyu 7:7