Julani

Lutani pa vo ve mukati

 FUMBU 5

Kumbi Titenere Kugomezga Bayibolu?

Kumbi Titenere Kugomezga Bayibolu?

Kumbi munthu munyaki wakukukambiyanipu vinthu vaboza vakukwasana ndi munthu munyaki? Panyaki mukuvwapu ŵanthu anyaki achikamba za munthu mwenuyu. Tikayika cha kuti mungamuyanja cha munthu waviyo. Kweni nyengu zinyaki mungasintha maŵanaŵanu asani mungamuziŵa umampha. Ndimu so ŵanthu anandi atiliwone Bayibolu.

Ŵanthu anandi wo akusambira ukongwa atiligomezga cha Bayibolu. Mwachiziŵa chifukwa chaki? Anandi akamba kuti buku ili livwika umampha cha, likambapu cha nkhani za sayansi kweniso ndaboza. Kumbi namwi mukuvwapu ŵanthu achikamba vinthu viheni vakukwasana ndi Bayibolu?

Po mwaŵerenge kabuku yaka, kumbi muwona kuti vo Bayibolu likamba pa nkhani za sayansi vauneneska? Ŵanthu anandi awona so viyo. Nawu azizwa kuti vo asambira m’Bayibolu vipambana ukongwa ndi vo alongozgi ŵawu a visopa atiŵasambiza. Mwakuyeruzgiyapu, anyaki akamba kuti Bayibolu lisambiza kuti Chiuta wangulenga vinthu vosi vamoyu ndipuso vambula umoyu mumazuŵa 6 pe nga maola 24. Kweni m’Bayibolu mulivi fundu yakususkana ndi vo asayansi akamba pa nkhani ya utali wa nyengu yo charu ndipuso vinthu vinyaki vikujaliyaku. *

Kweniso, fundu yo Bayibolu likamba yakuti Chiuta ndiyu wakulenga vinthu vamoyu pacharu chapasi yitovya asayansi kuti nawu afufuzengi kuti asaniyi maukaboni pa nkhani yeniyi. Bayibolu likamba kuti Chiuta ndiyu wakulenga vinthu vosi vamoyu ndipu wakuvilenga “mwakulingana ndi mtundu waki.” (Chiyambo 1:11, 21, 24) Fundu izi zipambanaku ndi vo asayansi akamba, kweni zisuskana cha ndi fundu yinyaki yikulu yauneneska yo asayansi akamba. Fundu zakupambanapambana zo asayansi akambapu zilongo kuti ŵanthu angakamba vinthu vakupambanapambana kweni uneneska usinthapu cha.

Pe ŵanthu anandi wo akhumba cha kuziŵa vo Bayibolu likamba chifukwa chakuti apusikika ndi alongozgi ŵawu a visopa. Yiwu awona kuti muvisopa vinandi asambiza vaboza, muchitika vachinyengu kweniso akhuŵizga ŵanthu kuti achitengi nkhondu. Kweni kumbi mbumampha kukamba kuti Bayibolu ndiheni chifukwa chakuwona waka ŵanthu wo atondeka kulondo fundu zaki? Ŵanthu anandi ndipuso asayansi anyaki adandawula kuti ŵanthu anyaki agwirisiya ntchitu fundu yakuti vamoyu vikuchita kusambuka kuti achitengi vinthu mwasankhu. Kumbi tingakamba kuti fundu yakuti vamoyu vikuchita kusambuka njaboza chifukwa chakuti ŵanthu anyaki atiyigwirisiya ntchitu uheni? Kukamba uneneska, mbumampha kufufuza dankha ndi kusaniya maukaboni ngakukwana.

Titikuchiskani kuti muyesesi kufufuza vakukwasana ndi Bayibolu. Muzizwengi ukongwa kuwona kuti vo Bayibolu likamba vipambana ndi vo matchalitchi nganandi ngasambiza.  Mwakuyeruzgiyapu, m’malu mwakuchiska nkhondu ndipuso kutinkhana, Bayibolu lisambiza kuti ateŵeti aku Chiuta atenere cha kuchita venivi. (Yesaya 2:2-4; Mateyu 5:43, 44; 26:52) M’malu mwakuzomereza sankhu ndipuso kugomezga vinthu vambula ukaboni, Bayibolu likamba kuti tikhumbika kuyesesa kusaniya ukaboni wakukwana chifukwa ndiwu ungatiwovya kuti tije ndi chivwanu chakukho. Kweniso ungatiwovya kuti titeŵetiyengi Chiuta ndi mtima wosi. (Aroma 12:1; Aheberi 11:1) M’malu mwakugongowesa ŵanthu kuti alekengi kuŵerenga Bayibolu, Bayibolu lititichiska kuti tisaniyengi kwamuka kwa mafumbu ngakukhumbika ukongwa ngo taŵanthu titijifumba.

Mwakuyeruzgiyapu, kumbi mukujifumbapu kuti: ‘Asani Chiuta waliku, ntchifukwa wuli wazomereza kuti vinthu viheni vichitikengi?’ Bayibolu limuka fumbu ili kweniso mafumbu nganyaki mwakuvwika umampha. * Titikuchiskani kuti muyesesi kusaniya uneneska. Te ndi chigomezgu chakuti musaniyengi kumuka kwakukondwesa, kwauneneska, kwakuvwika umampha ndipuso maukaboni ngauneneska.

^ ndimi 5 Kuti muziŵi vinandi, wonani kabuku kakuti Kumbi Vamoyu Vikujaku Waka Vija? kakupharazgika ndi Akaboni aku Yehova.

^ ndimi 9 Wonani mutu 11 wa buku lakuti Kumbi Tingasambiranji m’Bayibolu? lakupharazgika ndi Akaboni aku Yehova.