Julani

Lutani pa vo ve mukati

Nkhani 102: Yesu Wayuka

Nkhani 102: Yesu Wayuka

KUMBI munthukazi ndi anthurumi ŵaŵi wo, waŵaziŵa? Munthukazi yo ndi Mariya Magdala. Ndipu ŵanthu wo avwala vituŵa mbangelu. Kachipinda ko Mariya walingizgamu, ndiku angumuŵikamu Yesu wati wafwa. Kachipinda ko ndi muunda. Kweni chiŵanda mulivi. Kumbi ndiyani wangutuzgamu? Tiyi tiwoni.

Angelu akambiskana ndi Mariya Magdala

Yesu wati wafwa, asembi angukambiya Pilato kuti: ‘Yesu weche wamoyu wangukamba kuti wazamuyuskika asani pajumpha mazuŵa ngatatu. Sonu tumani ŵanthu kuti akalindengi muunda. Kuti akusambira ŵaki angachimuba ndi kukamba kuti wayuka ku ŵakufwa.’ Pilato wangukambiya asembi kuti atumi asilikali kuti akalindengi muunda.

Kweni mlenjilenji pazuŵa lachitatu kutuliya po Yesu wangufwiya, mungelu waku Yehova wanguza mwamabuchibuchi. Iyu wangutuzgapu mwa pa muunda. Asilikali anguchita mantha ukongwa mwakuti atondekanga kwenda. Pakumaliya paki, ŵati awona mukati mu muunda angusaniya kuti chiŵanda mulivi. Asilikali anyaki anguluta mu msumba ndi kuchikambiya asembi. Kumbi waviziŵa vo asembi aheni anguchita? Yiwu angupaska ndalama asilikali kuti akambengi boza. Yiwu anguti: ‘Mukambengi kuti isi tati tagona ndi usiku, akusambira ŵaki anguza kuziba chiŵanda.’

Pati papita nyengu yimanavi, anthukazi anyaki anguza kuziwona muunda. Yiwu anguzizwa ukongwa kuwona kuti muunda wenga mwazi. Mwamabuchibuchi munguwoneka angelu ŵaŵi akuvwala vituŵa. Yiwu angufumba kuti: ‘Nchifukwa wuli mupenja Yesu munu? Iyu wayuka. Tchimbiyani mukakambiyi akusambira ŵaki.’ Anthukazi yaŵa angutchimbiya liŵiliŵi. Kweni ŵe munthowa munthu munyaki wanguŵamika. Kumbi wamuziŵa kuti wenga yani? Wenga Yesu. Iyu wanguŵakambiya kuti: ‘Lutani mukakambiyi akusambira ŵangu.’

Anthukazi wo ŵati akambiya akusambira ŵaku Yesu kuti iyu wayuka ndipu amuwona, akusambira anguvwana cha. Petro ndi Yohane angutchimbiriya ku muunda kuti akajiwone ŵija, kweni anguchisaniya kuti muunda ngwamwazi. Sonu Petro ndi Yohane ŵati atuwaku, Mariya Magdala wangujariya vuli. Panyengu iyi ndipu wangulingizgiya mu muunda ndi kuwona angelu ŵaŵi.

Kumbi waviziŵa vo vinguchitikiya liŵavu laku Yesu? Chiuta wangulichitiska kuti lisoŵi. Chiuta wanguyuska Yesu ndi liŵavu laumunthu lo wangufwa nalu cha. Iyu wangupaska Yesu liŵavu lauzimu nge lo ŵenalu angelu kuchanya. Kweni kuti Yesu walongo akusambira ŵaki kuti ngwamoyu, iyu wanguvwala liŵavu lakuti ŵanthu angakhoza kumuwona, nge mo tisambiriyengi.

Mateyu 27:62-66; 28:1-15; Luka 24:1-12; Yohane 20:1-12.



Mafumbu

  • Kumbi munthukazi ndi anthurumi ŵaŵi wo ŵe pachithuthuzi po mbayani, nanga yiwu ŵe pani?
  • Nchifukwa wuli Pilato wangukambiya asembi kuti atumi asilikali kuti akalindengi muunda waku Yesu?
  • Kumbi mungelu wanguchitanji pazuŵa lachitatu mulenji Yesu wati wafwa, nanga asembi anguchitanji?
  • Nchifukwa wuli anthukazi anyaki anguzizwa ŵati aluta kuchiwona muunda waku Yesu?
  • Nchifukwa wuli Petro ndi Yohane angutchimbiriya ku muunda waku Yesu, nanga anguchisaniyanji?
  • Nchinthu wuli chinguchitikiya liŵavu laku Yesu, kweni iyu wanguchitanji kuti walongo akusambira ŵaki kuti ngwamoyu?

Mafumbu ngakusazgiyapu

  • Ŵerenga Mateyu 27:62-66 ndi 28:1-15.

    Panyengu yo Yesu wanguyuskika kumbi asembi ŵara, Afarisi ndi anthurumi anyaki ŵara angubudiya wuli mzimu utuŵa? (Mate. 12:24, 31, 32; 28:11-15)

  • Ŵerenga Luka 24:1-12.

    Kumbi nkhani yakuyuskika kwaku Yesu yilongo wuli kuti Yehova wawona anthukazi nge akaboni akugomezgeka? (Luka 24:4, 9, 10; Mate. 28:1-7)

  • Ŵerenga Yohane 20:1-12.

    Kumbi lemba la Yohane 20:8, 9 lititiwovya wuli kuwona kukhumbika kwa kuzizipizga asani tileka kuvwisa umampha mo uchimi unyaki wa m’Bayibolo ufiskikiya? (Ntha. 4:18; Mate. 17:22, 23; Luka 24:5-8; Yoha. 16:12)